Kwamamaza

Gisagara: Abana n’abagabo bugarijwe n’umwanda ukabije

Yanditswe kuya 14-10-2016 saa 13:37' na Prudence Kwizera


Muri iyi minsi bamwe mu batuye Akarere ka Gisagara cyane abana n’abagabo, bari kugaragaraho umwanda ukabije ku mubiri no ku myambaro, ku buryo ubuyobozi buvuga ko buhangayikishijwe n’iki kibazo.

Bamwe mu batuye mu Murenge wa Muganza baganiriye na IGIHE, bemera koko ko batakigira isuku, bakagaragaza ko zimwe mu mpamvu zibitera zirimo amakimbirane arangwa mu ngo zabo, abandi bakitwaza ubukene.

Umugore utashatse ko amazina ye atangazwa agira ati “Inaha abantu batumvikana mu rugo nta suku bafite kuko umugabo ntiyaba atakugurira umwenda, atareba uko abana bameze, atagura isabune ngo nawe urajya kumumesera, iyo ataguhaye amahoro mu rugo nawe uramwihorera.”

Mukarenzaho ati “Umugabo n’umugore basigaye bava guhinga, umugabo agahita yigira mu kabari kwinywera inzoga, umugore agataha akajya mu rugo wenyine, urumva ko hari ubwo abura umwanya wo kwita ku bana ngo abamesere cyangwa akabura isabune, ubwo urumva yabona imbaraga zo kumesera uwo mugabo wagiye kwinywera ataguze n’isabune.”

Hari na bamwe mu batuye uyu murenge bavuga ko kuba bafite umwanda ku myenda bambaye no ku mubiri babiterwa n’ubukene butuma batabasha kwigurira isabune.

Ubwo yari mu nama n’abaturage bo mu Murenge wa Muganza, Clémence Gasengayire,Umuyobozi w’akarere ka Gisagara wungirije ushinzwe imibereho myiza y’abaturage, yababwiye ko bahangayikishijwe n’umwanda usigaye ugaragara ku bana bato ndetse n’abagabo batuye muri ako gace.

Yagize ati “Hari ikintu twari twarasezereye cyitwa umwanda, ariko ni ukuri dusigaye tugenda mu nzira tugahura n’abagabo basa nabi bikatubabaza, abagore musigaye mugerageza kugira isuku ariko abana na bo mubiteho kuko bafite umwanda ukabije.”

Yakomeje atanga urugero kuri umwe mu bagabo bari mu nama, asaba abagore ko aribo bagomba gufata iya mbere bagatoza isuku abagize umuryango wose.

Ati “Urwo ni urugamba abagore mugiye kurwana mukajya mumesera n’abagabo,(…), mutekereze umugabo nk’uriya tumufatiye ku murenge tukamukarabya mu ruhame, murumva bitaba bikabije? N’umugore we byamutera isoni.”

Avuga kandi ko bafashe ingamba zirimo kwigisha abaturage ibyiza by’isuku n’ibibi by’umwanda, ndetse no kububakira ubushobozi nko kubegereza ibigega bifata amazi ndetse no kubaha amatungo bakorora.

Ati “Ni ubukangurambaga turi gukora kugira ngo tubyumvikaneho ko isuku igomba kuba umuco, ni na yo mpamvu turi kugenda tubegereza ibigega bifata amazi, ariko abagore turabasaba gufata iya mbere mu gukorera isuku abana, no gufasha abagabo guhindura imyumvire bagafatanya imirimo yose noneho isuku ikaba umuco mu miryango yabo.”

Indwara ziganjemo impiswi, inzoka zo mu nda zikunze gufata abana, tifoyide n’izindi, ni zo zikunze kwivuzwa n’abantu benshi hirya no hino mu bitaro n’ibigo nderabuzima binyuranye.

Ishami ry’Umuryango w’Abibumbye ryita ku buzima (OMS) ritangaza ko abantu babarirwa hagati ya miliyoni 16 na 33 barwara tifoyide nk’imwe mu ndwara iterwa n’umwanda buri mwaka, muri bo hagati y’ibihumbi 200 na 600 barapfa. Iyi mibare yiganje cyane mu bihugu bikiri mu nzira y’amajyambere byo ku mugabane wa Afurika, Aziya no ku mugabane wa Amerika y’Epfo.

Abagore basabwe kwita ku bagabo n'abana babo barushaho kubamesera imyenda
Abaturage bavuga ko umwanda muri aka karere uterwa ahanini n'amakimbirane yo mu ngo
Abanya-Gisagara bibukijwe ko isuku bagomba kuyigira umuco
Gasengayire avuga ko umwanda muri aka karere ubahangayikishije bikomeye

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved