Gisagara: Imibiri y’abazize Jenoside yakorewe Abatutsi isaga ibihumbi 50 igiye kwimurwa

Yanditswe na Jean Pierre Tuyisenge
Kuya 14 Gashyantare 2018 saa 10:45
Yasuwe :
0 0

Ubuyobozi bw’Akarere ka Gisagara butangaza ko bugiye kwimurira imibiri y’abazize Jenoside yakorewe Abatutsi isaga 50 000 mu rwibutso rushya rwuzuye rutwaye miliyoni 500 z’amafaranga y’u Rwanda, rwubatse mu Murenge wa Kabuye muri ako karere.

Umuyobozi w’Umuryango uharanira inyungu z’Abarokotse Jenoside yakorewe abatutsi (Ibuka) mu Karere ka Gisagara, Uwiringiyimana Emmanuel, yabwiye KT Press ko urwo rwibutso rushya ruzafasha akarere kose.

Yagize ati “ Twari tumaze iminsi dukora ku mushinga wo kubaka urwibutso rwa Jenoside yakorewe Abatutsi rugezweho, ruzafasha akarere kose.”

Ubwo ubwicanyi bwatangiraga muri Mata 1994, icyahoze ari Perefegitura ya Butare cyasigaye kidakozweho, gusa mu minsi mike yakurikiyeho, Théodore Sindikubwabo wigeze kuba Perezida w’u Rwanda wari waravukiye muri ako gace, yahavugiye imbwirwaruhame yatumye haba jenoside kugeza no muri Gisagara.

Urwibutso rwuzuye hafi y’aho Sindikubwabo yavugiye iyo mbwirwaruhame yatumye mu Karere ka Gisagara konyine abantu basaga 50,000 bahasiga ubuzima.

Umuyobozi wa Ibuka yavuze ko mu 1995 hubatswe urwibutso rwa Jenoside yakorewe Abatutsi i Kabuye aho imibiri yashyinguwe ariko rwakomeje kugenda rwangirika bituma akarere kubaka urundi rushya.”

Uwiringiyimana avuga ko mu gihe u Rwanda rwitegura kwibuka Jenoside yakorewe Abatutsi, akarere ka Gisagara kagiye gutangira kwimurira imibiri mu rwibutso rushya. Yavuze ko igikorwa cyo kwimura imibiri kizatwara asaga miliyoni 96 z’amafaranga y’u Rwanda.

Hagati aho, igikorwa cyo gusana inzibutso kiri gukorwa hirya no hino mu gihigu kugira ngo izitameze neza zisimbuzwe inshya.

Mu gihe hirya no hino mu gihugu havugwa ko hari inzibutso zitameze neza, Umunyamabanga Nshingabikorwa wa Ibuka, Naphtal Ahishakiye, yavuze ko ibiganiro bikomeje muri buri karere kubira ngo iyo mibiri ishyinguwe ahantu hatameze neza yimurirwe ahandi.

Yagize ati “ Twamaze kubyereka abafatanyabikorwa muri buri karere kugira ngo tuganire ku kibazo cy’inzibutso za Jenoside. Ibyo biganiro byatangiye umwaka ushize, bizakomeza muri uku kwa kabiri n’ukwa gatatu tubarure izitameze neza.”

Ahishakiye yavuze ko ibikorwa byo gushyingura bushya imibiri y’abazize Jenoside yakorewe Abatutsi bikenera ibintu byinshi, atanga urugero rw’uko haba hakenewe itsinda ribanza kuyisukura n’ingengo y’imari yo kugura amasanduku .

Urwibutso rwa Jenoside rwa Kabuye mu Karere ka Gisagara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza