Abanyarwanda ntibazihanganira abagifite amagambo y’amacakubiri -ACP Badege

Yanditswe na Rene Anthere Rwanyange
Kuya 14 Mata 2013 saa 11:35
Yasuwe :
0 0

Umuvugizi wa polisi y’u Rwanda ACP Theos Badege atangaza ko Abanyarwanda batazihanganira abantu bose bagifite amagambo arimo ivangura.
ACP Theos Badege yabitangaje mu muhango wo kwibuka Abatutsi bazize Jenoside mu murenge wa Gisozi, wabaye ku mugoroba wo ku wa Gatanu tariki ya 12 Mata muri Kaminuza yigenga ya Kigali ULK.
Uyu muhango wo kwibuka Abatutsi bazize Jenoside wabanjirijwe n’urugendo rwo kwamagana Jenoside n’ingengabitekerezo, rwatangiriye ku murenge wa Gisozi rusorezwa ku rwibutso (...)

Umuvugizi wa polisi y’u Rwanda ACP Theos Badege atangaza ko Abanyarwanda batazihanganira abantu bose bagifite amagambo arimo ivangura.

ACP Theos Badege yabitangaje mu muhango wo kwibuka Abatutsi bazize Jenoside mu murenge wa Gisozi, wabaye ku mugoroba wo ku wa Gatanu tariki ya 12 Mata muri Kaminuza yigenga ya Kigali ULK.

Uyu muhango wo kwibuka Abatutsi bazize Jenoside wabanjirijwe n’urugendo rwo kwamagana Jenoside n’ingengabitekerezo, rwatangiriye ku murenge wa Gisozi rusorezwa ku rwibutso rwa Jenoside rwa Kigali ruri ku Gisozi, ahashyizwe indabo ku mva zishyinguyemo imibiri y’Abatutsi bishwe muri Jenoside basaga ibihumbi 250.

ACP Theos Badege mu kiganiro yagejeje ku bari baje muri uyu muhango, yibanze ku mutekano muri rusange, yavuze umutekano w’abacitse kw’icumu rya Jenoside ndetse n’Abanyarwanda ucunzwe neza. Ati “Aho u Rwanda rugeze ntabwo tuzihanganira umuntu wese uzagaragaraho amagambo asesereza, ahakana cyangwa apfobya Jenoside.”

Depite Kaboneka Francis watanze ikiganiro cyavugaga ku mateka n’ibimenyetso bya Jenoside yavuze ko Jenoside yakorewe Abatutsi yateguwe. Ati “Jenoside yarateguwe ndetse ikorerwa igeragezwa mu Bugesera, no mu bindi bice bitandukanye by’igihugu.”

Bimwe mu bimenyetso byerekana ko Jenoside yakorewe Abatutsi yateguwe ni Radiyo RTLM yahitishaga amagambo abiba urwango mu banyarwanda, ndetse n’inama zabaga zibiba urwango mu banyarwanda.

Umuyobozi w’Akarere ka Gasabo Ndizeye Willy yabwiye abaturage bo murenge wa Gisozi, ko kwibuka ari inshingano za buri munyarwanda. Ati “Mu mvura ikomeye nk’iyi, umunsi nk’uyu, isaha nk’iyi hari Abatusi barimo kwicwa, tutagomba kwibagirwa.”

Ndizeye yasabye abarokotse Jenoside kudaheranwa n’agahinda ahubwo bagashishikarira kwiteza imbere mu byo bakora.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza