Gisozi: Uko abahoze mu mihanda n’abacuruzaga agataro bagobotswe binyuze mu myuga

Yanditswe na Tombola Felicie
Kuya 15 Nyakanga 2017 saa 10:24
Yasuwe :
0 0

Abagera kuri 64 barimo urubyiruko rwahoze ku mihanda, abagore bacuruzaga agataro, abakobwa babyariye iwabo n’abatari bafite icyo gukora, bahinduriwe ubuzima nyuma yo kwigishwa imyuga itandukanye ibafasha kubona ubushobozi bwo kwitunga batanduranyije.

Ubwo bagaragazaga ibyo bagezeho hagamijwe gukundisha abakiri mu buzima bwo ku mihanda n’ababyuka bicaye kugana imyuga, kuri uyu wa Gatanu, tariki ya 14 Nyakanga 2017, abigishwa na Nsabimana Jean Marie Vianney mu rugo iwe aho yashinze ikigo kigisha imyuga ku buntu batangaje ko bageze ku rwego batatekerezaga.

Kwizera Eric w’imyaka 24 wahawe ubumenyi bwiyongera ku bwo yakuye Iwawa yatangaje ko mu gihe ahamaze yungutse byinshi birimo gukora akabati, ibitanda n’intebe.

Yagize ati “Navuye Iwawa nigishijwe ibyo kubaza, nageze hanze ubuzima burankubita, ndongera nsubira mu biyobyabwenge. Naje kumenya amakuru ko Nsabimana yigishiriza ubuntu ndaza aranyakira. Mu mezi atatu maze hano mfite konti muri Sacco iriho asaga ibihumbi 200, kandi nyakura mu biraka nkora mbikesha uyu mugiraneza wanyigishije, ubu natangiye gutekereza kuzagura ikibanza mu cyaro.”

Nzeyimana Oscar na we wari mu buzima bwo mu muhanda yagize ati “Nararaga ku bikarito, itabi ryaranyishe, kuza kwiga byangaruriye ubuzima kuko uretse kureka ibiyobyabwenge kuko mba ndi mu kazi mpuze, ubu nikodeshereza inzu, mfite matola, naguze intebe byose mbikesha amasomo nahawe.”

Abagore bahoze mu bucuruzi bw’agataro n’abataragiraga icyo bakora uko ari 41 bigishwa kudoda ibikapu, uduseke, gushushanya imitako ku buryo ibihangano byabo bituma bakomeza kwibeshaho.

Nsabimana Jean Marie Vianney wigisha uru rubyiruko n’abahoze bacuruza agataro ni umugabo w’imyaka 43. Amaze igera kuri 15 akora ububaji n’ubugeni mu buryo bwa gihanga.

Abajijwe uko yatangiye igikorwa cyo kwigisha ku buntu urubyiruko n’abagore batari bafite imibereho yatangaje ko na we hari uwigeze kumugirira neza, yumva kumwitura kwiza ari ukwigisha abandi ngo be kuzasabiriza bafite imbaraga.

Yagize ati “Kuko ibi bintu ari impano, hari umuntu wabonaga ibyo nkora akabikunda, najyaga gusaba akazi bakakanyima bakambwira ko nta muntu ukora ibyo atize. Ikintu yakoze yaragendaga akanyishingira kugira ngo bampe akazi. Yabinkoreye nk’imyaka itanu nanjye ndazamuka ntangiza uwanjye mushinga.”

Mu 2009 Nsabimana agize igitekerezo cyo kwitura uwamwigishije, abinyujije mu kwigisha abandi benshi.

Ati “Nababazwaga no kubona urubyiruko rwicaye ku mihanda kandi rufite imbaraga, natangiriye Kicukiro nkodesha nkazana umwe, babiri bityo bityo ngeraho nzanamo n’abagore n’abakobwa. Habaye hato nza hano ku Gisozi kuko ho ntahakodesha ariho ntuye.”

Mu bantu basaga 250 amaze kwigisha abavanye mu ngeso mbi no mu burara, bamwe muri bo bashinze ’atelier’ zabo, abandi ni abanyabugeni.

Yakomeje agira ati “ Iyo mbarebye ni ubwo hari abo mba ntibuka ko nafashije, nshima Imana ko yampaye impano nziza nanjye nkaba nyikoresha mu kugira icyo nkorera igihugu cyanjye mu guhindura ubuzima bw’abandi.”

Uyu mugabo afite inzozi zo kwigisha abantu igihumbi ku mwaka hirya no hino mu gihugu imyuga itandukanye irimo kuboha, gushushanya, ubudozi, ububaji n’ibindi ariko agira imbogamizi z’ibikorwaremezo nk’amashuri n’ibikoresho byo kwifashisha.

Avuga ko yifuza inzego za Leta n’izabikorera bakomeza kumushyigikira uko abona ubuzima bw’abacuruza agataro, abadafite imirimo n’abakiri mu mihanda bayobotse imyuga babasha kubaho neza.

Urubyiruko rwiganjemo abahoze mu muhanda bahinduriwe ubuzima binyuze mu kwigishwa imyuga
Bigishwa imyuga itandukanye irimo no gukora ibihangano bishushanyije
Nsabimana afite imashini abahoze bacuruza agataro n'ababyariye iwabo bigishirizwaho kudoda
Kwizera Eric avuga ko agiye kugura ikibanza mu cyaro nyuma yo kuva mu biyobyabwenge akayoboka ishuri ry'imyuga
Mutabazi Emmanuel ufasha abiga gushushanya yatangaje ko bibagirira akamaro kuko ibihangano byabo bigurwa cyane
Nsabimana avuga ko azi imyuga 43 ariko adafite uburyo bwo kuyigisha yose kuko nta mikoro ahagije
Nsabimana Jean Marie Vianney wigisha imyuga abahoze ku mihanda no mu bucuruzi bw'agataro butemewe yatangaje ko yabitangiye ashaka kwitura uwamugiriye neza
Nsabimana Jean Marie Vianney yerekana uburyo bashushanya ku rubaho hakoreshejwe umwotsi aho gusiga amarangi
Abakora ububaji bavuga ko batangira kubona amafaranga bataranasoza amasomo y'amezi atandatu baba bagenewe
Aya ma-'vase' ashyirwamo indabo, bayakora mu mapine aba yarashaje ubusanzwe usanga ajugunywa
Bamwe bigishwa kubaza abandi gukora ubugeni haba mu gushushanya, gukora za tableau n'ibindi
Abigishwa na Nsabimana bashushanyije Perezida Kagame bakoresheje ubugeni biga butari ubwo gukoresha irangi
Igitanda gifite amapine ni kamwe mu dushya bafite mu mikorere yabo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza