Gitifu w’Akarere ka Muhanga yabijijwe icyuya no gusobanura icyatumye akwepa Abadepite

Yanditswe na Philbert Girinema
Kuya 30 Nzeri 2016 saa 10:22
Yasuwe : XX
0

Umunyamabanga Nshingwabikorwa w’Akarere ka Muhanga, Gasana Celse, ntiyorohewe imbere ya PAC ubwo yasabwaga ibisobanuro ku kuba Abadepite barasuye ako Karere bakamuhamagara akabura kugeza ubwo hiyambajwe umukozi ushinzwe ubuhinzi na Gitifu w’Umurenge.

Gitifu w’Akarere ka Muhanga yabijijwe icyuya no gusobanura icyatumye akwepa Abadepite

Umuyobozi Wungirije wa Komisiyo y’Inteko Ishinga Amategeko, ishinzwe kugenzura imicungire n’imikoreshereze y’Imari n’Umutungo wa Leta (PAC), Depite Theoneste Karenzi yabisobanuye kuri uyu wa 29 Nzeri, ubwo Gasana Celse yari mu bayobozi b’Akarere ka Muhanga bari bitabye iyo komisiyo ngo basobanure amakosa yagaragaye muri raporo y’Umugenzuzi Mukuru w’Imari ya Leta mu mwaka wa 2014/2015.

Depite Karenzi yagize ati “Twaje i Muhanga mu kwezi kwa mbere tuje kureba ibirombe bya mine, urabyibuka? Twaguhamagaye inshuro nyinshi, […] Watubwira agaciro muha inshingano zanyu. Niba twari tuje kureba ibintu bijyanye na za mine n’uburyo bikorwa mu karere kanyu?

“Inyandiko zaraje, duhamagara buri munsi na mbere y’uko tuva i Karongi tuza i Muhanga, ntacyo tutakoze, tukarinda n’iyo tujyana na Gitifu w’Umurenge hamwe na goronome (umukozi ushinzwe ubuhinzi), wanze kuza kutujyana kuri terrain (aho bikorerwa). Tubwire niba ubwo butumwa utarabubonye.”

Mu gusubiza, Gasana yavuze ko ubwo butumwa yabubonye kandi nyuma yabahamagaye agasaba imbabazi.

Kimwe mu byababaje Abadepite kugeza aho basabira Gasana ibisobanuro mu ruhame, ni uko bari bavuye mu tundi turere basura ibikorwa bya za mine, aho babashije kubonana n’abandi bayobozi bose basigariyeho ba Meya na ba Visi Meya bari bari mu bikorwa byo kwiyamamaza, ariko bageze i Muhanga, Umunyamabanga Nshingwabikorwa yanga kuboneka.

Iyo Komisiyo ya PAC yagombaga kugirana inama n’ubuyobozi bw’Akarere bwari buhagarariwe na Gasana Celse icyo gihe, ariko byabaye ngombwa ko iyo nama isubikwa nk’uko Umuyobozi wungirije w’iyo komisiyo akomeza abivuga.

Gasana Celse, Umunyamabanga Nshingwabikorwa w'Akarere ka Muhanga

Uretse kwibutsa ko yahamagaye asaba imbabazi, ntiyigeze abasha kugaragariza Abadepite icyatumye yanga kuza kubonana na bo ngo basure ibirombe ubundi bagirane inama, gusa imbabazi yazihawe, ndetse Depite Nkusi Juvenal Umuyobozi wa PAC ategeka ko bipfundikirirwa aho.

Imibare idahura mu bitabo by’ibaruramari

Raporo y’Umugenzuzi Mukuru w’Imari ya Leta, igaragaza ko hagati y’amafaranga Akarere ka Muhanga karangije Umwaka w’Ingengo y’Imari gafite n’ayo katangiranye undi mwaka, harimo ikinyurayo cya 224,176,352.

Ako Karere kandi kasibye mu bitabo by’ibaruramari byako umwenda w’amafaranga 31,501,326 kari kaberewemo n’abandi bantu, kakaba kari kasobanuriye umugenzuzi w’imari ya Leta ko azakomeza kwishyuzwa, ariko ngo yaje gusibwa hakurikijwe ibiteganywa n’amategeko.

Hari kandi ikinyuranyo kidafitiwe ibisobanuro cya miliyoni 39 kiri hagati y’amafaranga akarere kagombaga kwinjiza n’ayo kinjije mu misoro, ibi ngo bikaba binajyana n’uburyo urutonde rw’abasora rutari rufututse.

Ku kirebana n’iyubakwa ry’isoko ryadindiye bikabije, Akarere ka Muhanga kasobanuye ko byatewe n’uko Rwiyemezamirimo yataye imirimo agahunga igihugu bitewe n’ibibazo yari afite mu mirimo yakoraga no mu tundi turere.

Mbere y’uko abadepite batangariza Akarere ka Muhanga ko bakiriye ibisobanuro byako, Umuyobozi wako, Uwamariya Beatrice, yongeye gusaba imbabazi ku bitaragenze neza byose mu karere ayoboye, yizeza ko bigiye kunozwa.

Ati “Turashima cyane inama mwatugiriye kandi ibitaratungana tuzabinoza, tuboneyeho no gusaba imbabazi kuri ibyo bitatunganye kandi navuga ngo ‘kwihana ni ukubireka’.

Uwamariya Beatrice, Umuyobozi w'Akarere ka Muhanga

Akarere ka Muhanga ni aka gatandatu mu kwesa imihigo kugeza ubu, kahwituriwe kwita ku gukurikirana imishinga yako, kwita ku mitangire y’amasoko, ibyo abayobozi bakabijyanisha no kumva neza ko ari ubutumwa batumwemo n’igihugu, bityo bakirinda gutatira icyizere baba bagiriwe.

Umuyobozi w'Akarere, uwa Njyanama na Gitifu b'Akarere ka Muhanga
Depite Nkusi Juvenal, Umuyobozi wa PAC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza