GS Kagugu Catholique yibutse abazize Jenoside iremera imfubyi y’uwahigishaga wishwe

Yanditswe na Cyprien Niyomwungeri
Kuya 17 Kamena 2017 saa 12:04
Yasuwe :
0 0

Urwunge rw’amashuri rwa Kagugu Catholique, rwibutse abari abarimu n’abanyeshuri bahigaga bishwe muri Jenoside yakorewe Abatutsi mu 1994, rufasha umwana w’umwe mu bahigishaga gutangiza ubucuruzi buciriritse mu rwego rwo kwiyubaka.

Uyu muhango wabaye ejo ku wa Gatanu, abanyeshuri b’iri shuri riherereye mu murenge wa Kinyinya mu Karere ka Gasabo, bakoze urugendo rwo kwibuka berekeza ahitwa kuri burende hafite amateka y’uko ingabo zahoze ari iza RPF zaneshereje ingabo za Ex-FAR zikabatesha iyo mbunda yo mu bwoko bwa burende yarasaga Abatutsi.

Umuyobozi wa GS Kagugu Catholique, Habanabashaka Jean Baptiste, yabwiye itangazamakuru ko bahisemo kujya kuri iyi burende ngo basobanurirwe ubutwari bwaranze ingabo zari iza RPF, zigahagarika Jenoside yakorerwaga Abatutsi mu 1994.

Yagize ati “Twahageze kugira ngo dusobanurirwe amateka yaho, ibyahabereye icyo gihe, uko urugamba rwahabereye, tunasobanurirwe uburyo ingabo zari iza RPF zahagaragarije ubutwari bukomeye zirokora Abatutsi benshi bicwaga.’’

Yakomeje avuga ko ari inshuro ya kabiri bibuka abari abarimu n’abanyeshuri b’iri shuri bishwe muri Jenoside, aho kugeza ubu ubushakashatsi bukomeje gukorwa bumaze kugaragaza abarimu batanu, abanyeshuri batanu n’abandi bahigaga bataha mu kigo cya Croix-Rouge Kacyiru.

Habanabashaka avuga ko mu rwego rwo gufasha abarokotse Jenoside umwaka ushize baremeye umukecuru wari ufite umugabo w’umwarimu kuri iki kigo, wari afite inzu imuvira bakamusanira. Uyu mwaka bwo bafashije umwana w’uwari umwarimu witwaga Deo Kayinamura kwiyubaka.

Yagize ati “Uyu mwaka dufite umwana warokotse ariko Se akaba yari umwarimu kuri iki kigo, twamuremeye ku buryo agiye gutangira ubucuruzi buciriritse tukaba twizera y’uko agomba kugira aho ava n’aho agera.’’

Dear Pauline wafashijwe yashimiye iri shuri kuba ryaramuzirikanye, avuga ko bigiye kumufasha guhindura ubuzima bwe.

Yagize ati “Byatunejeje cyane ko badutekerejeho nk’abasigaye ku babyeyi bacu bigishaga aha, ni igikorwa gihambaye kuguha icyo wakora ukabasha kwiteza imbere. Bigiye kumfasha cyane kuko niba ntagiraga icyo nkora ndakibonye, nubwo ari ubucuruzi buciriritse ariko hari icyo buzahindura ku buzima bwanjye, hari aho buzamvana bukangeza.”

Igikorwa cyo kuremera abarokotse, gifasha kwigisha abana uburyo bwo gufashanya no kunganirana no kumva ko aho umwe aguye undi agomba kumuhagurutsa.

Umuyobozi wa Ibuka mu murenge wa Kinyinya, Kalinda Callixte, avuga ko kwibuka mu mashuri bituma urubyiruko rusobanurirwa amateka ya Jenoside, rugakuramo amasomo yo kuyirinda no kurwanya ingengabitekerezo yayo.

Yasabye ababyeyi kubwira abana amateka nyayo ya Jenoside yakorewe Abatutsi, bityo bigire kuri ayo mateka mabi ababyeyi babo banyuzemo, birinde ko abakurikirana ahubwo bandike amateka mazima.

Yagize ati “Turasaba ababyeyi kubwira abana babo amateka nyayo yaranze igihugu cyacu kugeza ubwo habaye Jenoside yakorewe Abatutsi. Uko bagenda babangiza bagoreka amateka, niko bica abana kandi dukeneye kuzagira abana beza b’ejo hazaza.”

Buri wa gatatu wa buri cyumweru ishuri rya GS Kagugu Catholique ryateganyije ibiganiro guhera saa kumi kugera saa kumi n’imwe, aho abana baganirizwa cyane cyane ku mibanire y’abanyarwanda, kwimakaza indangagaciro na kirazira byarangaga Abanyarwanda bigatuma batishora mu macakubiri.

Ibi bizatuma abana bakura neza bibuka ibyabaye kandi baharanira ko Jenoside itazongera gusubira ukundi.

Abanyeshuri ba GS Kagugu Catholique bibutse bagenzi babo bazize Jenoside yakorewe Abatutsi
Abo mu miryango y'abakoraga n'abigaga muri GS Kagugu Catholique bifatanyije n'ishuri mu muhango wo kwibuka
Dear Pauline yashimiye GS Kagugu Catholique yamuzirikanye
Umuyobozi w'Ishuri GS Kagugu Catholique, Habanabashaka Jean Baptiste
Umuyobozi wa Ibuka mu Murenge wa Kinyinya, Kalinda Callixte

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza