Gufungura umupaka wa Gatuna ntibyakuyeho umuburo ku Banyarwanda batekereza kujya muri Uganda

Yanditswe na Rabbi Malo Umucunguzi
Kuya 11 Kamena 2019 saa 12:20
Yasuwe :
0 0

Minisitiri w’Ububanyi n’Amahanga w’u Rwanda, Dr Richard Sezibera, yavuze ko Abanyarwanda bakigirwa inama yo kutajya muri Uganda, nubwo mu mpera z’icyumweru gishize byatangajwe ko umupaka wa Gatuna wari umaze iminsi uvugururwa ugiye gufungurwa by’agateganyo.

Muri Gashyantare nibwo Ikigo cy’Igihugu cy’Imisoro n’Amahoro mu Rwanda (RRA), cyahagaritse amakamyo yacaga ku mupaka wa Gatuna uhuza u Rwanda na Uganda kubera imirimo yo kubaka umupaka uhuriweho n’ibihugu byombi. Amakamyo n’imodoka ziremereye bisabwa gukoresha uwa Kagitumba.

Uganda yakomeje kuvuga ko icyo u Rwanda rwakoze ari ugufunga umupaka mu gihe n’umubano w’ibihugu byombi utifashe neza ariko u Rwanda rushimangira ko umupaka udafunze.

Ku wa 7 Kamena RRA yemeje ko “amakamyo atwaye imizigo iremereye yemerewe by’agateganyo kwambukiranya umupaka wa Gatuna mu gihe cy’ibyumweru bibiri uhereye tariki 10 Kamena 2019 kugeza tariki 22 Kamena 2019”, bisabwe n’ Ikigo gishinzwe gutunganya imihanda, RTDA, gushaka gusuzuma ko imirimo yakozwe itabangamira urujya n’uruza rw’amakamyo atwara imizigo iremereye.

Mu kiganiro yagiranye na The New Times kuri uyu wa Mbere, Minisitiri Sezibera yavuze ko nubwo uyu mupaka ugiye gufungurwa by’agateganyo, abanyarwanda bagisabwa kwirinda kujya muri Uganda kubera ihohoterwa bakomeje gukorerwayo.

Ati “Ubutumwa ntabwo bwahindutse. Buvuga ko Abanyarwanda bakwiye kutajya muri Uganda. Ibyo ntabwo byahindutse.”

Muri Werurwe uyu mwaka Minisitiri Sezibera yabwiye IGIHE ko abanyarwanda bakwiye kutajya muri Uganda kubera ko umutekano wabo utizewe, nyuma y’abandi amagana bari bamaze igihe bafatirwayo bagakorerwa iyicarubozo ndetse bamwe bakicwa.

Yagize ati “Turasaba Abanyarwanda kutajya muri Uganda, kubera ko baragenda bagafatwa, bagahohoterwa, bagafungwa, bamwe bakicwa, abandi bakirukanwa mu gihugu, ni ibibazo bimaze igihe. Ntabwo twifuza ko abanyarwanda bakomeza kugira ibibazo muri Uganda. Abanyarwanda turabasaba kutajya Uganda kugeza igihe ibi bibazo bikemukiye.”

Kuri uyu wa Mbere kandi Minisitiri Sezibera yagiranye ikiganiro n’abasenateri bagize Komisiyo y’Ububanyi n’Amahanga, Ubutwererane n’Umutekano, bungurana ibitekerezo ku bijyanye n’ubutwererane bugamije iterambere ry’ubukungu.

Yabagaragarije ko politiki y’igihugu muri urwo rwego igamije gushishikariza abikorera mu bihugu bitandukanye kubyaza umusaruro amahirwe y’ubucuruzi ari mu gihugu.

Yanavuze ko Guverinoma ishishikajwe no gufasha abikorera bo mu Rwanda, ngo nabo babashe gushinga ibikorwa byabo mu mahanga, ahaboneka amahirwe mu nzego zinyuranye.

Minisitiri Sezibera yagiranye ikiganiro n'abasenateri ku bijyanye n’ubutwererane bugamije iterambere ry’ubukungu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza