Kwamamaza

“Guha ubutabazi bw’ibanze abafite uburwayi bwo mu mutwe ntibisaba amashuri”

Yanditswe kuya 7-10-2016 saa 17:29' na Jean Pierre Tuyisenge


Ikigo gishinzwe Ubuzima mu Rwanda, RBC gisaba buri wese kwita ku bantu bagize indwara zo mu mutwe, kuko ngo bidasaba ko umuntu aba yarize amashuri menshi cyangwa asanzwe abakora iby’ubuvuzi.

Ubuyobozi bw’iki kigo buvuga ko hirya no hino mu Rwanda bwahasanze aba barwayi bakunze kudahabwa agaciro,bagashyirwa mu kato nyamara ngo kubitaho bidasaba ubuhanga bwinshi.

Dr. Yvonne Kayiteshonga, Umuyobozi w’Ishami rishinzwe indwara zo mu mutwe muri RBC mu kiganiro yahaye itangazamakuru kuri uyu wa 7 Ukwakira 2016, yasabye buri wese kubigiramo uruhare.

Yagize ati “ Ubufasha bw’ibanze ntibusaba kuba umuntu ari umuhanga mu kuvura indwara zo mu mutwe cyangwa ufite amashuri ahanitse cyane muri byo, buri muntu wese ubwo bufasha yabutanga, ntibisaba no kubyiga umunsi wose.”

Nubwo iyo havuzwe ibibazo byo mu mutwe, bamwe bumva ibisazi, ngo ibi birimo uburwayi buri mu byiciro bitandukanye, nk’uko inzobere mu by’ubuzima bwo mu mutwe zibitangaza.

Dr.Jean Damascene Iyamuremye, Umukozi muri RBC mu gashami gashinzwe ubuvuzi bw’indwara zo mu mutwe yagize ati “Uburwayi bwo mu mutwe buri mu byiciro bitandukanye, burimo ubutuma umuntu yiruka ku gasozi ari bwo bamwe bita ‘ibisazi’, hari ubutera kujunjama, ubukora ku mitekerereze y’umuntu, ubutuma ubufite ahindura imyifatire, hakaba n’ubutuma habaho guhindagurika kw’amarangamutima, n’ubutuma umuntu adasinzira”.

Ubuyobozi bw’iki kigo buvuga ko hari indwara zo mu mutwe ziterwa n’ibiza, aho umuntu abona ibimubayeho agahungabana, bikazajya bihora bimugaruka mu bitekerezo.

RBC ivuga ko icyo yishimira ari uko abantu bafite ibibazo byo mu mutwe bagana serivisi z’ubuvuzi barushijeho kwiyongera, ikavuga ko bigaragaza ko abantu bamaze gusobanukirwa ko indwara zo mu mutwe atari amadayimoni nkuko benshi babyitaga mu myaka yashize.

Tariki ya 10 Ukwakira buri mwaka, u Rwanda rwifatanya n’ibindi bihugu kwizihiza umunsi mpuzamahanga wahariwe kwita ku buvuzi bw’indwara zo mu mutwe.

Insanganyamatsiko y’uyu mwaka igira iti "Twite ku buzima bwo mu mutwe dutanga ubutabazi bw’ibanze".

Dr. Yvonne Kayiteshonga, Umuyobozi w’Ishami rishinzwe indwara zo mu mutwe muri RBC
Dr.Jean Damascene Iyamuremye, Umukozi muri RBC mu gashami gashinzwe ubuvuzi bw’indwara zo mu mutw

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved