Kwamamaza

“Gukunda igihugu bikwiye kuba indangamuntu buri munyarwanda agendana”

Yanditswe kuya 5-11-2016 saa 08:00' na Jean Pierre Tuyisenge


Umuyobozi wungirije w’Umujyi wa Kigali Ushinzwe Ubukungu Busabizwa Parfait, yasabye abanyarwanda kugira umuco mwiza wo gukunda igihugu, ndetse bikaba nk’indangamuntu buri wese agendana.

Kuri uyu wa 4 Ugushyingo 2016, nibwo Umujyi wa Kigali washoje ukwezi kwahariwe kuzirikana ku bikorwa byo gukunda igihugu.

Busabizwa yaboneyeho gusaba intore z’uturere twa Gasabo, Kicukiro na Nyarugenge tugize umujyi wa Kigali, kwitwararika kugira umuco n’imyitwarire bihesha agaciro igihugu.

Yagize ati “ Gukunda u Rwanda, kurukorera bikwiriye kuba indangamuntu twese duhuriyeho ndetse dukwiye kwitwaza igihe cyose. Dukwiye kuzirikana ko ibikorwa byo gukunda igihugu ari byo bigejeje u Rwanda aho rugeze ubu, ndetse duharanire gusigasira ibyo tumaze kugeraho tunatanga amakuru hakiri kare ku kintu icyo ari cyo cyose gishobora guhungabanya umutekano wacu.”

Yasabye abari bateraniye aho kurushaho kwimakaza umuco nyarwanda bakima amatwi ibibi bituruka hanze.

Ukwezi kwahariwe kuzirikana ibikorwa byo gukunda igihugu kwakozwemo ibikorwa bitandukanye birimo imiganda, kugurira Mituweli imiryango itishoboye no gutera inkunga amakoperative atandukanye akorera mu Mujyi wa Kigali.

Hakozwemo ibiganiro byari bigamije gusobanurira abantu amasomo yo gukunda igihugu, haba muri za kaminuza no mu mashuri atandukanye yisumbuye, hibandwa ku kwibutsa abantu umuco nyarwanda, kwirinda ibiyobwabwenge no kwicungira umutekano.

Umukozi muri Minisiteri y’Uburinganire n’Iterambere ry’Umuryango, Nkundimfura Rosette yashimye uburyo u Rwanda ruha agaciro umugore, avuga ko ari kimwe mu bikorwa byo gukunda igihugu.

Yavuze ko kuva na kera umugore yafatwaga nk’ingirakamaro mu rugo. Ati “ Muribuka ko na mbere iyo umwami yabaga akiri umwana muto, nyina umubyara ni we wayoboraga, ubu rero dushima Leta y’Ubumwe yahaye agaciro umugore ndetse akaba na we afata ibyemezo mu buyobozi.”

Muri ibi birori hamuritswe bimwe mu bikorwa by’iterambere bikorerwa mu mujyi wa Kigali, byiganjemo ubukorikori.

Uku kwezi kwatangijwe ku wa 8 Ukwakira 2016, kukaba kwari gufite insanganyamatsiko igira iti “ Gukunda igihugu ni ishema ryacu, ni agaciro kacu.”


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved