"Gukurikiranwa ntibivaho ngo ni uko igihugu cyivanye muri ICC"

Yanditswe na Uwishyaka Jean Louis
Kuya 9 Ugushyingo 2016 saa 08:36
Yasuwe :
0 0

Umuyobozi w’Umuryango mpuzamahanga uharanira amahoro n’ubutabera mu Rwanda (RCN), akaba n’impuguke mu mategeko mpuzamahanga mpanabyaha, Hugo Moudiki Jombwe, asanga inkundura y’ibihugu yo kwivana mu bagengwa n’amasezerano ashyiraho Urukiko Mpuzamahanga Mpanabyaha(ICC) ikwiye kujyana no gutekereza kure kw’abatuye uyu mugabane.

Mu minsi yashize u Burundi bwivanye mu bihugu bigengwa n’ayo masezerano, ndetse Gambie, Congo Brazzaville na Afurika y’Epfo nabyo byatangaje ko bishaka gutandukana nabyo.

Ubwo Jombwe yahuguraga abanyamakuru bibumbiye mu muryango uharanira amahoro (PaxPress), yagarutse kuri iyi nkundura n’icyo bivuze kuri Afurika, maze yemeza ko kuba ibihugu bikomeje kwiyomora kuri ICC, bitavuze ko bishobora gukora ibyaha ngo bicire aho.

Ati “Leta zifite uburenganzira busesuye bwo gusinya amasezerano runaka cyangwa ntiziyasinye, kuko ibihugu bifite ubusugire bwabyo, ariko mu gihe yakora ibyaha bikomeye ntiyabura kubikurikiranwaho.”

Avuga ko iyo hari abayobozi mu gihugu runaka bagaragaweho ibyaha binyuranye, ngo akanama ka Loni gashinzwe amahoro n’umutekano ku Isi gashobora gusaba ko igihugu cyangwa abayobozi runaka bakurikiranwa kandi ngo n’ubundi birangira bikozwe na ICC.

Ati “Gukurikiranwa bizakomeza, nubwo bica mu nzira nyinshi ndetse zinanije, ariko gukurikiranwa ntibivaho ku gihugu ngo ni uko cyivanye muri ICC.”

Leta zitekereza kwiyomora kuri urwo rukiko ngo zagombye kureba niba zidashaka gutiza umurindi umuco wo kudahana, kuko ngo n’ubundi uru rukiko rukurikirana ibyaha mpuzamahanga.

Jombwe asanga ibihugu bigize ubutabera bukora neza, bitagera aho ICC igira abo ikurikirana, ariko ngo kuko buba butakoze akazi kabwo ni yo mpamvu urwo rukiko rukurikirana bamwe. Yemeza ko ibyo bihugu bikwiye kongera ubushobozi bw’inzego z’ubutabera zabyo, zikabasha kugenza ibyaha imbere mu bihugu no ku rwego rwa Afurika.

Yasabye sosiyete sivile n’indi miryango itandukanye gukomeza gufasha ibihugu gukomera ku ntego yo guca umuco wo kudahana.

Jombwe asanga ibihugu bikomeje kwivana muri urwo rukiko bigamije kwerekana akababaro bifite ko ICC yibasira Abanyafurika, nyamara ngo harimo no kutabara neza kuko bakwivanamo cyangwa batabikora ngo batazabura gukurikiranwa n’ubutabera.

Avuga ku rukiko Nyafurika, Jombwe yasobanuye ko narwo hari aho rugaragaza intege nke, cyane bijyanye n’ingigo z’amategeko rugenderaho zigena ubudahangarwa bw’abaperezida, abaminisitiri n’abandi bo hejuru. Aha yibaza uburyo Perezida runaka yafata ubutegetsi ku ngufu maze urwo rukiko ntirumuburanishe bitewe n’izo ngingo zigena ubudahangarwa bw’abayobozi.

Urwo rukiko rwa Afurika ngo nirwo rwari rukwiye kubaburanisha, ariko kuko rutabikora ngo ni ngombwa ko bikorwa na ICC.

Mu bayobozi bo muri Afurika ICC ikurikiranyeho ibyaha binyuranye birimo iby’intambara n’ibyibasiye inyokomuntu, barimo Perezida wa Sudani, Omar Al Bashir ndetse rwanatangaje ko rugiye gukora iperereza mu bihugu birimo u Burundi, Repubulika Iharanira Demukarasi ya Congo na Gabon bitewe n’imvururu zahabaye.

Hugo Jombwe ahamya ko ibihugu bidakwiye kumva ko kwivana muri ICC bizatuma bidakurikiranwaho ibyaha byakoze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza