Gusubiramo ibyiciro by’ubudehe mu migambi y’imena ya PL

Yanditswe na Ferdinand Maniraguha
Kuya 24 Kanama 2018 saa 08:01
Yasuwe :
0 0

Ishyaka riharanira ukwishyira ukizana kwa buri muntu (PL) ryatangaje ko niritorerwa kujya mu Nteko Ishinga Amategeko, umutwe w’abadepite rizahanira ko ibyiciro by’ubudehe bisubirwamo.

Byatangajwe kuri uyu wa Kane ubwo PL yiyamamarizaga mu turere twa Nyagatare na Gatsibo mu Murenge wa Karangazi na Kiramuruzi mu Ntara y’Iburasirazuba.

Ibyiciro by’Ubudehe bivuguruye byatangajwe mu 2016, byagaragaje ko mu cyiciro cya mbere harimo ingo 376,192 zigizwe n’abantu 1,480,167, ni ukuvuga 16% by’Abanyarwanda bose.

Icyiciro cya kabiri cyari kirimo ingo 703,461 zigizwe n’abantu 3,077,816 bangana na 29.8% by’Abanyarwanda bose.

Icyiciro cya gatatu cyo kirimo ingo 1,267,171 zituwe n’Abanyarwanda 5,766,506 bangana na 53.7% by’Abanyarwanda bose, mu gihe icya Kane kirimo ingo 11,664 zituwe n’Abanyarwanda 58,069, bahagarariye 0.5% by’abatuye igihugu cyose.

Ni ibyiciro bitakiriwe neza n’abaturage bose cyane ko ari byo bishingirwaho hatangwa serivisi zitandukanye nka Mituelle de Santé, kwiga n’ibindi.

Umuyobozi wa PL, Donatille Mukabalisa, yatangaje ko nibatorwa bazakurikirana ishyirwa mu bikorwa rya gahunda zigamije kuvana abaturage mu bukene kugira ngo abashyizwe mu byiciro by’ubudehe runaka bazamuke babivemo.

Yavuze ko bazaharanira ko ibyiciro by’ubudehe binozwa, abatishoboye bagafashwa koko atari mu nyandiko gusa.

Ati “Ibyo ni ibintu tuzakurikirana kugira ngo binozwe kurushaho ndetse n’abagenewe za gahunda zigamije kubavana muri bya byiciro, boye kubigumamo mu buryo bw’inyandiko ahubwo babivemo bazamuke bajye no mu bindi byiciro kugira ngo igihugu cyacu cyoye gukomeza gutanga amafaranga yo gufasha ahubwo kirusheho gushyira imbaraga muri gahunda zibafasha kwifasha.”

PL kandi ivuga ko izaharanira ko ibyiciro by’ubudehe bidashingirwaho mu gutanga serivisi zimwe na zimwe nk’uburezi.

Mukabalisa yagize ati “Ni ukureba imbogamizi zaba zirimo kugira ngo abantu bazisesengure barebe ibikwiye gukorwa bitabujije uburenganzira abafite ubushobozi bwo kwiga, umuntu abashe kwiga atazitiwe n’icyo ari cyo cyose cyamubuza kwiga.”

Mugabire Jean, umwe mu baturage bakurikiranye imigabo n’imigambi ya PL i Karangazi, yavuze ko byaba byiza ibyiciro by’ubudehe bidashingiweho mu gutanga serivisi zose by’umwihariko ku bashaka kujya kwiga muri Kaminuza.

Yagize ati “Ufite ubushobozi bwo gutangira amafaranga umwana ku ishuri wayatanga, burya nta wifuza gufashwa ariko nk’umuntu wo mu cyiciro cya kabiri n’icya gatatu, ntabwo yashobora kwishyurira umwana Kaminuza.”

“Icyo twasaba ni uko umwana wageze muri Kaminuza iwabo bari mu cyiciro cya kabiri cyangwa icya gatatu bakomeza bagafashwa kwishyurirwa.”

Mu bindi PL yavuze izibandaho nitorerwa imyanya mu Nteko harimo guteza imbere ubuhinzi n’ubworozi bw’umwuga, kongerera ubushobzi urwego rw’akagali n’ibindi.

Amatora y’abadepite ku banyarwanda baba mu mahanga azaba tariki 2 Nzeli naho ku bari imbere mu gihugu ni tariki 3 Nzeli 2018.

Ishyaka PL rizaba rirangwa n’impine y’izina raryo hamwe n’inyenyeri eshatu z’umuhondo ziri mu ibara ry’icyatsi.

Ku rutonde rw’abakandida b’iri shyaka, harimo 80 iri gushakira imyanya mu nteko.

Mukabalisa yavuze ko bazaharanira ko ibyiciro by'ubudehe bisubirwamo
Urubyiruko rwa PL rususurutsa abatuye i Karangazi
Munyangeyo Théogène umwe mu bakandida ba PL
PL yatanze abakandida 80 bayihagarariye mu gushaka amajwi
Umuyobozi w'Akagali ka Mbare muri Karangazi ubwo yakiraga abayoboke ba PL
Ibyishimo byari byose ubwo iri shyaka ryiyamamazaga
Byari ibyishimo ubwo abayoboke ba PL bageraga mu kibuga kiri mu kagali ka Mbare
Guillaume Serge Nzabonimana (iburyo) aganira na Mukabalisa Donatille uyobora PL
Imibereho myiza y'abaturage ku isonga y'ibyo abadepite ba PL bazashyira imbere nibagera mu Nteko
Abakandida PL yaserukanye muri aya matora y'abadepite

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza