Gutakaza ubunyarwanda ntawe bitagizeho ingaruka kandi mbi- Minisitiri Kaboneka

Yanditswe na Kanamugire Emmanuel
Kuya 24 Ugushyingo 2016 saa 11:08
Yasuwe :
0 0

Ubwo hasozwaga Itorero ry’abakorera imiryango itari iya leta Minisitiri w’Ubutegetsi bw’Igihugu, Francis Kaboneka yabwiye abaryitabiriye ko gutakaza ubunyarwanda ntawe bitagizeho ingaruka kandi mbi bityo ko bagomba kubwigisha bikaba byanarenga imbibi z’u Rwanda.

Abasaga 200 ni bo bari bitabiriye iri torero ryamaze icyumweru kimwe, kuva ku wa 17 kugeza ku wa 23 Ugushyingo 2016, i Nkumba mu Karere ka Burera.

Minisitiri Kaboneka yavuze ko impamvu ya Ndi Umunyarwanda ari uguharanira kugarura agaciro “twatakaje”, ubwo abanyarwanda bicaga abandi muri Jenoside yakorewe Abatutsi mu 1994.

Yagize ati “Impamvu twigisha Ndi Umunyarwanda ni uko twatakaje ubunyarwanda kandi ntawe bitagizeho ingaruka mbi, ibi bigomba no kurenga kuba umunyarwanda ahubwo bikagera ku kuba umunyafurika. Aha ni ho hari agaciro twatakaje dukwiye guharanira.”

Yakomeje abasaba kurushaho kwita kubo bakorera kuko iterambere ry’abo bakorera ari ryo ribaraje ishinga.

Ati “Imiryango itari iya leta na leta twese tugomba kugira icyerekezo kimwe kireba ku muturage, twese tumuhurijeho ubushobozi bwacu yava mu bibazo agatera imbere.”

Bamwe mu bitabiriye iri torero bemeza ko babonye umwanya mwiza wo gucengera amateka y’u Rwanda no kubona ahari ibibazo kandi ko biteguye gufasha abanyarwanda kubivamo hadategerejwe akimuhana.

Rulinda Innocent yagize ati “Muri iri torero twahigiye indangagaciro zizatuma turushaho guteza imbere abanyarwanda, hari ubwo twakoraga tudashyize hamwe imbaraga; icyo ni cyo tugomba gukosora kandi igenamigambi ryacu rigashingira ku muturage.”

Mujawingoma Murigo Zipola yavuze ko “Mu muco nyarwanda hahozeho imiryango itari iya leta, ingamba dukuye hano ni ugukora neza kandi mu nyungu z’abaturage, twabonye amateka y’u Rwanda aho rwavuye n’aho rugeze dusanga turi abantu badasanzwe tugomba no gukora ibidasanzwe dukoresha ubushobozi dufite kugira ngo tuzamure abanyarwanda ntawe urebye ku nyungu ze bwite.”

Iri torero ry’imiryango itari iya leta ryatorejwemo impamyabigwi 216 ryari rifite insanganyamatsiko igira iti “Dukorere mu miryango itari iya leta twimakaza ishyaka ryo gukunda u Rwanda.”

Abitabiriye iri torero basabwe kwigisha Ndi Umunyarwanda ikarenga imbibi z'u Rwanda
Minisitiri w'Ubutegetsi bw'Igihugu, Francis Kaboneka na Rucagu Boniface, Umuyobozi wa Komisiyo y'Itorero ry'Igihugu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244