Guverineri Gatabazi yagaragaje uko ikibazo cy’amakimbirane mu miryango cyakemuka

Yanditswe na Evariste Nsengimana
Kuya 30 Nzeri 2017 saa 05:51
Yasuwe :
0 0

Guverineri w’Intara y’Amajyaruguru, Gatabazi Jean Marie Vianney, asanga amakimbirane yo mu miryango aterwa n’ibintu bitandukanye birimo ubuharike, ubukene n’ibindi bikwiye gukemurwa n’abawugize binyuze mu kugaragarizanya urukundo no gukora naho abapfakazi bakirinda gushaka abandi bagabo, ibyo yagereranije no kuba ‘abagore ba Yesu’.

Ikibazo cy’amakimbirane mu muryango cyakunze kugarukwaho cyane nka kimwe mu bibangamiye umuryango nyarwanda, aho byagiye bigaragara abashakanye ubwabo bicana, bica abana babo cyangwa n’abana bakica ababyeyi n’izindi ngero z’ihohoterwa.

Iki kibazo cyanaganiriwe mu nama y’Igihugu y’umushyikirano ya 14, kivugwaho cyane ubwo Umunyamabanga wa leta ushinzwe Itegeko Nshinga n’andi mategeko, Evode Uwizeyimana, yumvikanye anenga igitekerezo cyari gitanzwe na Musenyeri Nzakamwita ku muryango mwiza.

Ubwo yari mu Karere ka Rulindo kuri uyu wa 29 Nzeri 2017 mu gikorwa cyo gutangiza ‘Umudugudu w’icyitegererezo mu ikoranabuhanga’, Guverineri Gatabazi yavuze ko abanyarwanda muri rusange basabwa gukura amaboko mu mifuka bagashaka ubukire bahereye kuri bike bafite.

Gatabazi yavuze ko uko umuntu akira hari abagira ishyari bagatangira kumurwanya no kumuca intege ariko umuti wabyo ari ugukora cyane.

Yagaragaje ko ibibazo byinshi by’abaturage bigaruka ku makimbirane mu muryango, ati “Tujya mu bibazo by’abaturage hakaza iby’abagore babaza abagabo babataye, abana b’abakobwa babyariye iwabo, hakaza abashaka kujya mu cyiciro cya mbere wamubaza amakuru ugasanga niwe urara arwana n’umugabo, niwe watawe n’umugabo. Umugabo n’umugore bashyize hamwe, abenshi bageze mu cyiciro cya Gatatu. Abarwana bapfa ubusa bose bari mu cya mbere. Nta kindi cyahabavana usibye gushyira hamwe.”

“Ndashaka ko uyu munsi abagabo n’abagore, abapfakazi n’ubundi ku bemera, abapfakazi baba ari abagore ba Yesu, iyo uri umupfakazi ufite abana batanu ukajya kongeramo uwa Gatandatu, abandi bazana amakimbirane muri urwo rugo. Mushyire hamwe, abo bagore, abo bagabo ni abantu mwakundanye mukabahitamo ntawubahagaze hejuru.”

Yakomeje asobanura ko atumva uburyo umuntu wagendesheje imisozi umusore ajya kumutereta nyuma amubera mubi anenga abagabo bajya mu ndaya kandi basize abo bishakiye.

Guverineri Gatabazi yagiriye inama abashakanye kwirinda amakimbirane ko umuryango urimo amakimbirane nta terambere rishobora kuwugeramo ahubwo ikihageze cyose kibapfira ubusa.

Gatabazi yanagarutse ku kibazo cy’abakoresha ibiyobyabwenge, ababwira ko ari intandaro y’ubwicanyi bwa hamwe na hamwe mu miryango, aho uwabinyoye ateza umutekano muke rimwe na rimwe bikavamo kwicana.

Umwanzuro wa Gatatu w’inama y’Igihugu y’umushyikirano ya 14, ugaruka ku gukomeza gushyira imbaraga muri gahunda zo kubaka umuryango Nyarwanda aho ugira uti ‘gushimangira ubufatanye hagati y’inzego za Leta, ababyeyi, abarezi, abikorera, sosiyete sivile n’imiryango ishingiye ku madini mu kurushaho kubaka umuryango nyarwanda’.

Guverineri w'Intara y'Amajyaruguru, Gatabazi Jean Marie Vianney, yasabye abashakanye kwimika urukundo birinda amakimbirane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza