Guverineri Gatabazi yanenze abayobozi baha serivisi abambara ‘ikoti wateraho imyaka ikamera kubera umwanda’

Yanditswe na N.Kubwimana Janvière
Kuya 21 Kanama 2019 saa 08:51
Yasuwe :
0 0

Guverineri w’Intara y’Amajyaruguru, Gatabazi Jean Marie Vianney, yavuze ko umuyobozi wese ubona umuturage ufite umwanda ukabije akabifata nk’ibisanzwe na we aba afite ikibazo gikomeye.

Ubu butumwa yabutangiye mu nama yabaye kuri wa 21 Kanama 2019, yahuje abayobozi b’intara, abanyamadini n’amatorero n’abashinzwe umutekano, yari igamije gufatira hamwe ingamba zo kurandura ikibazo cy’umwanda kigaragara mu Majyaruguru.

Guverineri Gatabazi yavuze ko abayobozi baha serivisi abaturage bafite umwanda ukabije baba bakwiye kunengwa byaba ngombwa bakabihanirwa.

Yagize ati “Kuba umuturage aza kwaka serivisi yambaye igikoti wateraho imyaka ikamera kubera umwanda, aheruka gukaraba mu gihe na we ubwe atibuka, warangiza ya serivisi ukayimuha kubera ko umwanda afite uwufata nk’ikintu gisanzwe ntabwo aribyo. Na we waba ugifite ikibazo cy’imyumvire, nakugana asa atyo musubizeyo kandi nibiba ngombwa umunengere mu bandi na we azakorwa n’isoni abicikeho. Abayobozi bakira abantu nk’abo bo bakwiye kubihanirwa kuko kumwigisha babifite mu nshingano.”

Abitabiriye iyi nama na bo bagaragaje ko umwanda udakwiye gufatwa nk’ikintu gisanzwe ahubwo ukwiye kwirindwa.

Umuyobozi wa Islam mu Ntara y’Amajyaruguru, Sheikh Ismail Seif, yavuze ko umwanda udakwiye kuba nk’akamenyero mu bantu.

Yagize ati “Umwanda ukwiye gufatwa nka kirazira mu muco Nyarwanda, ntugomba kumva ko umuntu ufite umwanda ukabije ukwiye kwitabwaho ari uwo musengana, ahubwo ni wa wundi muturanye, musangira, na wawundi mudafite ikindi kibahuza ukamwigisha ko umwanda ari imbogamizi ku bukungu bw’igihugu no kubuzima bwe n’abamukomokaho.”

Umuyobozi w’Akarere ka Rulindo, Kayiranga Emmanuel, na we ati “Hari abibwira ko umwanda ugira abakene gusa , ariko siko bimeze, biratangaje aho usanga umuntu atwaye imodoka nziza, yaba afite icyo kurya cyangwa kunywa, akajugunya mu muhanda icyo yariragamo, nk’abo baba bakwiye kubihanirwa. Ni ugukomeza kwigisha ibijyanye n’isuku ariko ntitwibande gusa kuri bariya batishoboye.”

Mu nshuro ebyiri zikurikirana Perezida Paul Kagame asura Intara y’Amajyaruguru, yagiye anenga cyane abayobozi bayo ko abaturage baho bagira umwanda anabasaba gukaza ingamba zo gukemura icyo kibazo.

Muri Gicurasi 2019, Perezida Kagame wari mu ruzinduko mu Ntara y’Amajyaruguru n’Uburengerazuba nibwo aheruka guhagarara mu Mujyi wa Musanze aramutsa abaturage benshi bari ku mihanda.

Bimwe mu bituma umwanda ukunda kugaragara mu baturage bo mu Majyaruguru harimo kuba hakiri umubare munini w’abaturage bakibana n’amatungo mu nzu aho habarurwa abagera ku 13,608 barimo 6000 bo mu Karere ka Musanze.

Intara y’Amajyaruguru n’abafatanyabikorwa bayo biyemeje kurandura burundu ikibazo cy’umwanda bitarenze amezi atatu.

Guverineri Gatabazi yagaragaje ko umuyobozi ugifata umwanda nk'ikintu gisanzwe na we aba afite ikibazo
Abayobozi batandukanye n'abakuru b'amadini n'amatorero basabwe kudafata umwanda ukigaragara mu baturage nk'ikintu gisanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza