Guverinoma iri kwiga uko ibyiciro by’ubudehe byavanwa mu bigenderwaho hatangwa inguzanyo muri Kaminuza

Yanditswe na Ferdinand Maniraguha
Kuya 2 Gicurasi 2019 saa 09:10
Yasuwe :
0 0

Minisiteri y’Ubutegetsi bw’Igihugu (MINALOC) iri gutekereza uburyo kugendera ku byiciro by’ubudehe mu gutoranya banyeshuri bazajya bahabwa inguzanyo muri Kaminuza y’u Rwanda byavanwaho.

Byatangajwe n’Umunyamabanga wa Leta ushinzwe imibereho myiza y’abaturage muri MINALOC, Alvera Mukabaramba.

Hashize igihe abanyeshuri binubira gahunda yo kugendera ku byiciro by’ubudehe igihe hatoranywa abahabwa inguzanyo yo kwiga muri Kaminuza n’amashuri bya Leta mu gihe barangije amashuri yisumbuye.

Ubwo buryo bavuga ko kubukoresha hari ababirenganiramo bakimwa amahirwe yo kwiga Kaminuza kandi baratsinze kuko ibyiciro by’ubudehe bemeza ko bitajyanye n’ubushobozi imiryango yabo ifite.

Mukabaramba aganira na The New Times yavuze ko icyo kibazo bakizi ahubwo ikigiye gukorwa ari ukuganira na Minisiteri y’Uburezi kugira ngo harebwe uburyo ibijyanye n’ubudehe bivanwa mu bigenderwaho.

Yagize ati “Turashaka kuvana ubudehe mu bigenderwaho ngo umunyeshuri ahabwe inguzanyo, hasigare harebwa uko umunyeshuri yatsinze amasomo n’ibyo agiye kwiga muri Kaminuza.”

Kuri ubu abanyeshuri bafite imiryango iri mu cyiciro cya mbere, icya kabiri n’icya gatatu nibo bemererwa guhabwa inguzanyo yo kwiga Kaminuza mu gihe bujuje ibindi bisabwa.

Icyakora nabo bagenda basumbanya amahirwe kuko uri mu cyiciro cya mbere yujuje ibindi byose aba arusha mugenzi we uri mu cyiciro cya gatatu.

Icyiciro cy’ubudehe gihabwa amanota 20 mu bigenderwaho ngo umunyeshuri ahabwe inguzanyo yo kwiga muri Kaminuza. Amanota umunyeshuri yagizi bihabwa amanota 40 ndetse n’amasomo umunyeshuri aziga bigahabwa amanota 40.

Abagiye kwiga amasomo ajyanye n’ubumenyi n’ikoranabuhanga bahabwa amahirwe menshi kurusha abandi.

Nzeyimana Emmanuel yarangije amashuri yisumbuye mu 2016 mu ishami ry’Icyongereza, Igifaransa n’Ikinyarwanda (EFK) . Yarangije afite amanota amwemerera gukomeza muri Kaminuza. Icyakora ntibyamukundiye kuko icyiciro cy’ubudehe cyamwitambitse kandi umuryango we nta bushobozi bwo kumwishyurira wari ufite.

Aganira na The New Times yagize ati “Nagize amanota 49 kuri 73 twakoreyeho ariko nta nguzanyo nahawe kuko umuryango wanjye uri mu cyiciro cya gatatu. Nyamara hari abanyeshuri bo mu cyiciro cya mbere narushaga amanota babonye inguzanyo.”

Umwaka ushize amafaranga y’ishuri muri Kaminuza y’u Rwanda yarongerewe, aho mu bijyanye na Siyansi yavuye ku bihumbi 900 Frw agera kuri miliyoni ebyiri naho mu masomo rusange agirwa ibihumbi 800 avuye ku bihumbi 600.

Mu Ugushyingo umwaka ushize ubwo yari mu muhango wo gutanga impamyabumenyi ku barangije muri Kaminuza y’u Rwanda, Minisitiri w’Intebe, Dr Edouard Ngirente, yavuze ko intego ari ugushyiraho uburyo bufasha umwana w’umunyarwanda wese wabonye amanota amwemerera kujya muri Kaminuza y’u Rwanda hatagendewe ku bushobozi.

Yagize ati “Ikigamijwe ni uko nta mwana w’umunyarwanda ufite amanota amwemerera kwinjira muri Kaminuzay’u Rwanda wazabura amahirwe yo kwinjiramo kubera ko adafite amikoro.”

Depite Munyangeyo Théogene aherutse kubwira IGIHE ko adashyigikiye ko ubudehe buba igipimo kigenderwaho ku muntu ushaka kwiga muri Kaminuza ahabwa inguzanyo mu gihe yatsinze.

Yagize ati “Wowe reba abatsinze urebe abo igihugu gikeneye hanyuma duce akarongo, abatsinze bafite ya manota bose ubahe umwenda ariko udahereye ku byiciro.”

Mu banyeshuri basaga ibihumbi 13 bari basabye inguzanyo yo kwiga muri Kaminuza mu mwaka w’amashuri 2018/19, abayemerewe basaga gato 8400.

Ifoto igaragaza abanyeshuri bishimira ko barangije amasomo yabo muri UR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza