Hagaragajwe ko Afurika idashobora gutera imbere ikigendera ku byakozwe n’indi migabane

Yanditswe na Evariste Nsengimana
Kuya 26 Gicurasi 2018 saa 05:51
Yasuwe :
0 0

Abakurikiranira hafi iby’imiyoborere y’ibihugu baragaje ko Afurika idashobora gutera imbere mu gihe itabasha gukora no gutangaza ibikorwa byayo ngo ibe aribyo yifashisha mu gukemura ibibazo biyugarije, ahubwo igakomeza kwigana ibyakozwe n’indi migabane birimo demokarasi, uburezi n’ibindi.

Kuri uyu wa 25 Gicurasi 2018, ubwo hizihizwaga umunsi wo kwigenga kwa Afurika, Umunyamabanga Mukuru wa Pan-African Movement mu Rwanda, Cyrus Munyaburanga Nkusi, yavuze ko ishusho y’ukwigenga kwa Afurika atari nziza ndetse kugira ngo ihinduke bisaba igihe.

Ati “Ni urugendo ariko turabona tuzabigeraho. Impamvu ni uko abanyafurika bagenda bumva ko kuba umwe birusha ko umuntu akora ku giti cye. Ikindi ni uko tubona ubuhahirane hagati y’ibihugu bya Afurika aricyo cyatuma Abanyafurika banamenyana. Ikindi, guteza imbere ururimi rwacu, bigahera mu nteganyanyigisho, muri gahunda zijyanye n’uburyo abana biga, tukiga ibintu byo muri Afurika, amateka yaho, umuco waho, tukanagerageza guhanga imirimo.”

Yakomeje asobanura ko Afurika ifite ubutunzi bwose bushoboka ahubwo ko icyo ibura ari uguhuriza no kurandura inzangano ziganisha ku bukene n’ubuhunzi, abanyamahanga buririho bavuga ngo baje gufasha kandi bishakira gusahura ubukungu bwayo.

Umuyobozi uhagarariye Afurika mu kigo nyunguranabitekerezo muri Afurika n’Uburengerazuba bwa Aziya (International IDEA’s Africa and West Asia), Prof. Adebayo Olukoshi, yavuze ko buri gihugu kigomba kwishakira demokarasi ikibereye kugira ngo gitere imbere.

Ati “Demokarasi itandukana igihugu ku kindi. Buri kimwe gikwiye gushaka demokarasi ikibereye, ijyanye n’ibyifuzo by’abaturage. Hashize imyaka irenga 60 ibihugu bya Afurika bibonye ubwigenge, ntabwo igihe ari kirekire cyane [...] hari ibibazo byinshi bikibangamiye ibihugu byinshi by’umugabane wacu birimo n’ubushake by’ibihugu byadukolonezaga bitaragenda kubera bikishakiramo inyungu zabyo.”

Yunzemo ati “Intambwe ya mbere kuri twe abanyafurika kugira ngo twiyake abahoze badukoloniza bakibangamiye ubwigenge bwacu, ni uguha imbaraga Afurika [Pan Africanism].”

Pan Africanism ni umuryango uharanira agaciro k’abakomoka muri Afurika. Umunsi wo kwigenga kwa Afurika ubaye nyuma y’ibiganiro bimaze iminsi bitangirwa mu Rwanda, bigamije gushaka icyakorwa ngo uyu mugabane urusheho gutera imbere.

Hagaragajwe ko kugira ngo Afurika itere imbere ari uko ibihugu biyigize bishyira hamwe
Hatanzwe ibiganiro bigaruka ku bikenewe kugira ngo Afurika yigenge
Abitabiriye ibirori by'umunsi w'ukwigenga kwa Afurika mu biganiro ku hazaza h'uyu mugabane

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza