Hagaragajwe ko hari abayobozi bica amategeko nkana mu gutanga akazi muri leta

Yanditswe na Iradukunda Desire
Kuya 14 Kamena 2018 saa 02:59
Yasuwe :
0 0

Minisitiri w’abakozi ba Leta n’umurimo, Rwanyindo Kayingwa Fanfan, yavuze ko hari abayobozi bacyirengagiza amategeko mu mitangire y’akazi ugasanga bahombeje leta kandi hari uburyo bwagenywe bigomba kunyuramo utaretse n’ikoranabuhanga ryifashishwa.

Iyi Minisiteri ivuga ko nubwo mu rwego rwo guca ikimenyane n’icyenewabo mu itangwa ry’akazi, mu 2016 yatangije ikoranabuhanga rikoreshwa mu gupiganira akazi, hakigaragara abantu bashyirwa mu kazi batabikwiye bikajyana leta mu nkiko.

Kuri uyu wa Gatatu nibwo habaye inama yahuje inzego zitandukanye, haganirwa ku buryo bwo kunoza imitangire y’akazi.

Minisitiri Kayirangwa yagize ati “Nubwo dukoresha ikoranabuhanga hari aho bidakunda kuko hari ipiganwa rikorwa hakoreshejwe ikoranabuhanga ariko nyuma yaho hari n’ibindi bigomba gukorwa n’abantu. Icyo gihe hashobora kugaragara ikimenyane.”

Yashimangiye ko abashinzwe imitangire y’akazi bagomba kubahiriza amategeko mu gihe batanga akazi, ndetse no mu gihe hari umukozi wakosheje akabihanirwa hirindwa ko yagusha leta mu gihombo.

Umunyamabanga Nshingwabikorwa wa Komisiyo y’Abakozi ba Leta, Angelina Muganza, yagaragaje ko abatanga akazi hari ubwo birengagiza amategeko, bakaziregura ko ari uburangare bagize.

Yagize ati “Hari iteka rya perezida rivuga ukuntu abakozi ba Leta bashakwa n’uko bashyirwa mu myanya. Ugasanga hari inzego zimwe cyangwa abayobozi b’inzego bamwe n’abakozi bashinzwe abakozi bahitamo abakozi n’abakora ibizamini bakaba ari nabo bashyirwa mu myanya.”

“Ukabona ko hari ingingo zigize itegeko zitubahirijwe ndetse zituma ushobora kuvuga uti harimo ikimenyane, icyenewabo cyangwa ruswa.”

Mu nama yahuje abayobozi batandukanye na Minisiteri y’Abakozi ba Leta n’Umurimo, hagaragajwe ko kuba abakozi bashyirwa mu myanya hadakurikijwe amategeko ari kimwe mu bikorwa bihombya leta .

Abayobozi beretswe ko imitangire mibi y'akazi itera leta igihombo
Umunyamabanga Nshingwabikorwa wa Komisiyo y’Abakozi ba Leta, Angelina Muganza
Abayobozi batandukanye batanze ibitekerezo ku kunoza imitangire y'akazi
Abayobozi batandukanye bitabiriye ibi biganiro
Minisitiri w'Abakozi ba Leta n'Umurimo, Rwanyindo Kayirangwa Fanfan

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza