Kwamamaza

Imvano y’amakuru y’iyirukanwa rya Alice Cyusa na Haguma ku buyobozi bwa Diaspora Nyarwanda

Yanditswe kuya 23-11-2016 saa 05:19' na IGIHE


Komite ngenzuzi ya Diaspora Nyarwanda iherutse gufata icyemezo cyo kwirukana burundu, Alice Cyusa wari umaze umwaka n’amezi 11 ari umuyobozi w’Ihuriro ry’Abanyarwanda baba mu mahanga ku rwego rw’Isi na Norbert Haguma wari Visi Perezida we, babashinja ‘amakosa akomeye ashobora gusenya umuryango’.

- Komite ngenzuzi ya Diaspora Nyarwanda yasohoye itangazo rihagarika Perezida na Visi Perezida wayo

- Abahagaritswe ni Alice Kabagire Cyusa na Norbert Haguma

- Alice ati “Komite yafashe icyemezo nta burenganzira ifite”

Iyi komite yahagaritse aba bayobozi nyuma yo gusanga mu mikorere yabo harimo ‘ibibazo biteye ubwoba ku buryo bidakemuwe vuba na bwangu’ abanyarwanda ba Diaspora Nyarwanda bahura n’ingaruka nyinshi zirimo kuba umuryango wasenyuka bitewe n’amakimbirane, amatiku n’amacakubiri aterwa n’imikorere idahwitse y’aba bayobozi bahagaritswe.

Umwanzuro uhagarika aba bayobozi bombi wafashwe na Komite ngenzuzi igizwe na Apollo Mbabazi, Julienne Mukabucyana na Padiri Eric Déo Kabera; kuwa 17 Ugushyingo 2016; nyuma y’uko mu Ukuboza 2015 nabwo hari hafashwe icyemezo cyo kubahagarika ariko baza guhabwa umwanya wo kwikosora.

Itangazo ryirukana burundu aba bayobozi IGIHE ifitiye kopi, rigira riti “ mu nama yabereye muri Minaffet yamaze amasaha menshi agera kuri ane n’igice yari iyobowe na Minisitiri w’Ububanyi n’Amahanga; Alice Kabagire Cyusa yahawe umwanya uhagije wo kwisobanura, ariko birangira bigaragariye buri wese ko ibyo yahaniwe ari ukuri kandi bifatika.”

“Nuko Alice Kabagire Cyusa agirwa inama yo gusaba imbabazi kandi yizeza ko bitazasubira maze na bagenzi be bo muri komite bagirwa inama yo kumubabarira bakanamuha amahirwe yo kwikosora nuko birangira bose bemeye izo nama bagiriwe.”

“Iyo nama yabereye muri Minaffet yarangiye abari mu nama bose bizeye ko hagiye kubaho kwikosora ariko siko byagenze ahubwo amafuti yarushijeho gukaza umurego biba bibi kurushaho kugeza magingo aya.”

Amakosa Kabagire na Haguma bashinjwa

Iyi komite ivuga ko ibyaha basabiye imbabazi batigeze babihagarika cyangwa ngo babigabanye ahubwo byafashe indi ntera kuko bahisemo gukorera mu bwiru no gusuzugura bagenzi babo muri komite. Ibyo byatumye abashoboraga kubagira inama bahezwa, bimwe mu byemezo bakabimenya impitagihe cyangwa bakabimenya bivuye mu itangazamakuru.

Iri tangazo rigira riti “By’umwihariko mwateguye urugendo rwo kujya muri Norvège, mwirengagiza ubutumire mwahawe nk’umuyobozi wa RDGN mu gikorwa cyari kiyobowe na First Lady w’u Rwanda cyabereye Washington DC. Ibi bikaba byarababaje abantu benshi bavugaga ko Komite ya RDGN itahaye agaciro icyo gikorwa cyabereye aho mutuye muri USA.”

Iyi komite ivuga ko Cyusa yageze n’aho ahagarikwa mu buyobozi bwa Diaspora muri Leta ya Indiana aho asanzwe atuye ashinjwa kuvangira ubuyobozi bwo muri Diaspora yaho no kuyicamo ibice.

Iri tangazo rikomeza rigira riti “Mwangije imikoranire myiza yari isanzweho hagati ya RDGN na Minaffet. By’umwihariko mwebwe Alice Kabagire Cyusa mwubahutse ndetse mutuka urwego rwa Minaffet rushinzwe abanyarwanda baba mu mahanga mu rwandiko rwanyu rwo kuri e-mail rwa tariki ya 27 Ukwakira 2016 mushinja umuyobozi warwo ibi bikurikira: ububeshyi, gusenya RDGN, kunaniza abayobozi ba RDGN, gucamo ibice n’amacakubiri abagize diaspora ngo bimworohere kubayobora, gukoresha igitugu…”

“Mu rwego rwa gahunda zanyu zitazwi kandi zihariye mwebwe Alice Kabagire Cyusa na Norbert Haguma mwashyizeho ubwanyu, ntawe mugishije inama urwego rwa Njyanama ya RDGN; munaruha inshingano zikomeye (zisanzwe ari iza Komite) harimo no gutegura no kuyobora amatora kandi ibyo bakabikora mu gihe kitarenze isaha imwe ku itariki ya 14 Ukuboza 2016. Ibi bikaba byaragaragarije benshi ko mutegura gahunda zo kwiba amatora.”

Alice Cyusa ati ’ni agatsiko mbona kiyemeje guteza rwaserera’

Mu kiganiro yagiranye na IGIHE, Alice Cyusa Kabagire, yatangaje ko ibiri gukorwa ari abashaka kumuvana ku buyobozi bibumbiye mu cyo yise ’agatsiko kagamije guteza rwaserera’.

Ati “Ntabwo aribyo, ntabwo ari ukuri. Ni amakuru bahawe n’agatsiko ka bamwe muri twebwe, ka bamwe muri komite yanjye ndetse na bamwe bo mu muryango w’abanyarwanda baba mu mahanga. Ni agatsiko mbona gasa n’aho kiyemeje guteza akavuyo, guteza rwaserera.”

“Ntabwo bintunguye, ntabwo bintangaje cyane kuko n’ubushize, umwaka ushize mu ntangiriro z’ Ugushyingo barabikoze bagerageza gukora coup d’état birabananira kuko zitemewe.”

Uyu munyarwandakazi uba muri Leta Zunze Ubumwe za Amerika yari yatorewe kuyobora Ihuriro ry’Abanyarwanda baba mu mahanga mu mwiherero wateranyije abarigize mu Karere ka Gatsibo tariki 17 Ukuboza 2014.

Yakomeje atangaza ko inzira byanyuzemo kugira ngo atorwe ari nazo zizakoreshwa mu gushaka umusimbura we mu matora ateganyijwe mu Ukuboza uyu mwaka.

Ati “Inshingano twahawe ubwo twatorwaga mu myaka ibiri ishize turacyazikomeje. Turimo turategura amatora, dufite inama rusange y’umuryango wacu ejo bundi mu kwa 12 aho tuzagira ibiganiro, hanyuma nimugoroba nibwo tuzatora komite nshya izatangira imirimo yayo umwaka utaha mu kwezi kwa mbere ku itariki eshatu.”

Nyuma y’uyu mwanzuro wirukana Alice Cyusa na Norbert Haguma ku buyobozi bwa Diaspora Nyarwanda ku Isi hashyizweho Augustin Dufatanye nka Perezida wayo na Yves Cyaka Nkusi nk’Umubitsi akaba anashinzwe ibijyanye n’amakuru mu gihe abandi bose bakomeza imirimo yabo bari basanganywe.

“Komite yafashe icyemezo nta burenganzira ifite”

Alice Cyusa yakomeje atangaza ko ibivugwa ko hari amatiku mu miyoborere ya Diaspora Nyarwanda bihabanye n’ukuri. Ati “ Nta macakubiri, nta matiku ahari haba muri Indiana, haba muri Diaspora muri rusange. Iyi ni coup d’état ikozwe na ngenzuzi, bitabaho. Ni ubugira kabiri, muri manda y’imyaka ibiri twari twatorewe.”

Yongeyeho ati “ Mu miryango iyo ariyo yose, ntaho biba ho ko ngenzuzi yirukana uwo ariwe wese mu bagize Komite nyobozi. Umuntu akurwa mu buyobozi n’urwego rwamushyizeho. Ngenzuzi ishinzwe gukora raporo, ikayishyikiriza Inama rusange, ikabyigaho, akaba ariyo ifata icyemezo.”

Yakomeje avuga ko ngenzuzi y’Ihuriro ry’Abanyarwanda baba mu mahanga ishinzwe kugenzura umutungo waryo. Ati “ Ntabwo twirukanywe, ntabwo twasimbuwe, kuko urwego rwa RDGN rwafashe icyo cyemezo, rutabifitiye uburengazira.”

Norbert Haguma na Alice Kabagire Cyusa bahagaritswe ku buyobozi bw'Ihuriro ry'Abanyarwanda baba mu mahanga ku Isi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved