Hari abahinzi batandukanya ifumbire mvaruganda bagendeye ku mabara

Yanditswe na Prudence Kwizera
Kuya 14 Kamena 2018 saa 01:27
Yasuwe :
0 0

Mu turere dutandukanye two mu Ntara y’Amajyepfo hari bamwe mu bahinzi bavuga ko batazi gukoresha inyongeramusaruro zirimo amafumbire mvaruganda bigatuma imyaka bahinze irumba bakabura umusaruro.

Ni mu gihe inzobere mu buhinzi zivuga ko amafumbire mvaruganda atandukanira ku myunyungugu iyagize bityo abahinzi bakwiye kuyakoresha babanje gusobanuza.

Bamwe mu bahinzi bo mu turere twa Huye, Nyaruguru na Nyanza baganiriye na IGIHE, bavuga ko nta bumenyi buhagije bafite ku gukoresha amafumbire ariko iyo bashaka kuyashyira ku bihingwa bayatandukanya barebeye ku mabara yayo.

Hari n’abavuga ko bafata ifumbire mvaruganda yose babonye bakayishyira ku gihingwa batitaye kucyo yagenewe ariko bigatuma batabona umusaruro bari biteze.

Umwe mu bahinzi ati “Njyewe uko mbizi ifumbire y’umukara ifumbizwa ibishyimbo naho itari umweru cyane ijya gusa n’ikigina ifumbizwa ibirayi, iy’umweru dede yererana cyane ifumbizwa ingano; ni aho nzitandukanyiriza”.

Undi muhinzi witwa Bajeneza Alphonse ati “Ibintu byo gutandukanya amafumbire bikunze kumenywa n’abantu bakunze guhinga ikawa kuko nibo twumva bahamagara mu matangazo ngo bazajye gufata ifumbire cyangwa imiti. Twebwe abahinzi basanzwe dupfa gushyira ku bihingwa ariko ntabwo byera neza”.

Mu byifuzo byabo, abahinzi bagaragaje ko hashyirwaho uburyo bwo kujya babasobanurira uko amafumbire mvaruganda akoreshwa ndetse n’aho atandukanira.

Umwe mu nzobere mu buhinzi wo mu Karere ka Nyaruguru, Mukeshimana Sylvere, agira inama abahinzi ko mbere yo gukoresha ifumbire mvaruganda cyangwa izindi nyongeramusaruro bakwiye kubanza gusobanuza.

Ati “Amafumbire mvaruganda atandukanira ku myunyungugu, kuyatandukanya ukoresheje amabara ntabwo ari byo kuko ifumbire imwe ishobora kugira amabara atandukanye. Ni byiza kumenya ifumbire ukamenya n’igihingwa yagenewe gukoreshwaho, icyiza umuhinzi aba agomba kugenda akavugana n’umucuruzi w’amafumbire, akamusobanurira. Ushobora gufata ifumbire ukayikoresha ku gihingwa itagenewe bigatuma umusaruro ubura”.

Muri gahunda ya Guverinoma y’u Rwanda y’imyaka irindwi kuva 2017 kugera 2024 mu rwego rwubuhinzi, biteganyijwe umusaruro w’ibikomoka ku buhinzi uzongerwa mu bwinshi no mu bwiza kugira ngo ingano y’ibyoherezwa ku masoko mpuzamahanga iziyongere.

Ibi bikaba byazagerwaho neza ari uko buri munyarwanda afite ubumenyi mu gukoresha inyongeramusaruro bityo abahinzi bagasaba ko hakongerwa ubukangurambaga mu kubigisha uko zikoreshwa.

Abahinzi benshi ntibazi uburyo ifumbire mvaruganda ikoreshwa...
Abahinzi basaba ko bashyirirwaho uburyo bwo kumenya imikoreshereze y'ifumbire

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza