Hari gukorwa ikoranabuhanga rizajya rimenyesha abantu igihe umuriro w’amashanyarazi uraburira

Yanditswe na Ferdinand Maniraguha
Kuya 5 Ukuboza 2017 saa 08:45
Yasuwe :
0 0

Ikigo gishinzwe gukwirakwiza umuriro w’amashanyarazi (EUCL) cyatangaje ko kiri gukora uburyo buzajya bufasha kuvugana n’abafatabuguzi bacyo, bakamenya igihe umuriro uraza kuburira mbere y’uko biba.

Ubusanzwe iki kigo cyifashishaga amatangazo amwe agacishwa kuri radiyo cyangwa ku mbuga nkoranyambaga, kimenyesha abafatabuguzi bacyo igihe umuriro uraburira n’igihe ugarukira.

Ubu buryo ntabwo bwageraga kuri bose bagirwaho ingaruka n’ibura ry’umuriro.

Umuyobozi wa EUCL, Maj Eng Kalisa Jean Claude, kuri uyu wa Mbere yavuze ko bari gukora uburyo bazajya bifashisha bavugana na buri mufatabuguzi, akamenya hakiri kare igihe umuriro uri buburire.

Yagize “[système] Turiho turayitunganya ariko nubwo itaratungana neza turacyagerageza kubwira abafatanyabikorwa cyangwa abafatabuguzi bacu dukoresheje amatangazo yacu yaba ari kuri radiyo cyangwa dukoresheje imbuga nkoranyambaga.”

Yakomeje agira ati “Iyo système turumva tuzayirangiza neza nk’umwaka utaha, ni ukuvuga 2018. Aho tuzashobora kujya noneho tuvugana n’abo bafatanyabikorwa, tukamubwira tuti kuva iyi saha kugera iyi saha ushobora kuza kuba udafite umuriro cyangwa udafite serivisi yacu kubera impamvu izi n’izi.”

Ikibazo cy’icikagurika ry’umuriro rya hato na hato cyakunze kwinubirwa cyane cyane n’ibigo bikenera umuriro mwinshi nk’inganda. Ibi bigo byagiye bitura iki kibazo Ikigo gishinzwe iterambere (RDB) bikigaragariza ko bibatera igihombo.

Umunyamabanga wa Leta ushinzwe ingufu, amazi , isuku n’isukura muri Minisiteri y’ibikorwaremezo, Germaine Kamayirese, kuri uyu wa Mbere ubwo hasinywaga amasezerano y’inguzanyo ya miliyoni 125 z’amadolari hagati ya Banki y’Isi n’u Rwanda, yavuze ko amwe muri ayo mafaranga bagiye kuyashora mu gusana imiyoboro yangiritse yatumaga haba icika cy’umuriro rya hato na hato.

Muri Mutarama uyu mwaka, mu Rwanda habarirwaga abafatabuguzi b’umuriro w’amashanyarazi ibihumbi 600.

Umuyobozi wa EUCL, Maj Eng Kalisa Jean Claude

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza