Hari gusuzumwa uburyo Abanyarwanda bose bapimwa ibikumwe, isura na DNA

Yanditswe na Hakizimana Jean Paul
Kuya 27 Mata 2019 saa 08:01
Yasuwe :
0 0

Umunyamabanga Mukuru w’Urwego rw’Ubugenzacyaha RIB, Col. Ruhunga Jeannot yatangaje ko hari kwigwa umushinga wo gufata ibimenyetso bya gihanga, DNA, ibikumwe n’isura by’abanyarwanda bose, bishobora kuzajya byifashishwa mu gutanga ubutabera bwihuse igihe bibaye ngombwa.

Yabitangaje kuri uyu wa Gatanu mu kiganiro n’abanyamakuru nyuma y’umwiherero w’abayobozi bakuru b’inzego zose zibumbiye mu rwego rw’ubutabera.

Muri uwo mwiherero hafatiwemo imyanzuro 16 harimo uwa 10 uvuga ko hagomba kwigwa ku buryo abanyarwanda bose bafatwa DNA, ibikumwe n’isura, bikazajya byifashishwa mu bugenzacyaha mu gutanga ibimenyetso bidashidikanywaho.

Col Ruhunga yavuze ‘byaragaragaye ko DNA, ibikumwe n’isura bikenewe kugira ngo biteze imbere ubutabera bitanga ibimenyetso bidashidikanywaho mu nkiko.’

Ati “DNA ni kimwe mu bimenyetso bya gihanga bidashidikanywaho, uwo mushinga rero uzagendana n’indi myinshi irimo gufata ibikumwe n’isura. Ni ikintu kinini kizaba gikubiyemo ubumenyi bushobora gufasha Ubugenzacyaha kubona ibimenyetso bizajya bijyanwa mu rukiko bidashidikanywaho, hashingiwe ku ikoranabuhanga n’aho rigeze.”

“Ni umushinga ukiri kwigwaho, igisigaye ni ugushaka amikoro ashobora kudufasha kubikora.”

Umuyobozi Mukuru wa Laboratwari y’u Rwanda y’Ibimenyetso Bishingiye ku Bumenyi n’Ubuhanga Bikoreshwa mu Butabera (RFL) ACP Dr. Sinayobye François, yabwiye IGIHE ko kugira ngo bapime DNA ku mugore, umugabo n’umwana, nibura bisaba amafaranga arenga gato ibihumbi 267 Frw, ku buryo iyo ubaze usanga gupima DNA ku banyarwanda barenga miliyoni 12 bizatwara miliyari nyinshi.

Col. Ruhunga yasobanuye ko igiciro kitabuza igihugu gukora imishinga y’iterambere.

Ati “Nibiba ibyo gufata DNA igihugu cyose turizera ko ibiciro bizagabanuka. Leta ikora imishinga ihenze inyungu ikaboneka nyuma, iyo uwo mushinga wagiye mu bikorwa kuko ntabwo igiciro cyatuma igihugu kidakora imishinga y’iterambere.”

“Ni byo iterambere rirahenda ariko no kutarigira birahenda kurushaho, kuri uyu mushinga wa DNA uracyari mu nyigo, ishyirwa mu bikorwa ni ikindi, inyigo nirangira bizagendera ku bushobozi igihugu kizaba gifite mu kuwushyira mu bikorwa.”

Yavuze ko ubushobozi nibuba buke hashobora gufatwa umwanzuro ko byakorwa mu gihe kirekire cyangwa mu byiciro, wenda hakabanza ibikumwe n’isura, DNA ikaza nyuma.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza