‘Hari ikuzimu nta gushidikanya’- Ubuhamya bw’uwari Ambasaderi w’u Bubiligi mu gihe cya Jenoside

Yanditswe na IGIHE
Kuya 10 Gicurasi 2019 saa 07:07
Yasuwe :
0 0

Kuwa 6 Mata 1994, indege ya Perezida Habyarimana, yarahanuwe, igihugu cyose gicura imiborogo mu mezi yakurikiyeho, umujinya mwinshi wari mu bantu urasandara, urwango rw’imyaka mirongo rwigaragariza muri Jenoside yakorewe Abatutsi igahitana abarenga miliyoni.

Ambasaderi Johan Swinnen wari uhagarariye u Bubiligi mu Rwanda, yagarutse ku isura y’igihugu muri icyo gihe n’imyaka 25 nyuma ya Jenoside yakorewe Abatutsi, abantu baratemagurwa n’umuhoro kugeza bapfuye, abagore batwite baratemwa, abana bakubitwa ku bikuta.

Johan avuga ko iki gihe “Hari ikuzimu nta gushidikanya ...gutakaza icyizere gukomeye. Abantu twavuganye kuwa 5 Mata bishwe kuwa 6 Mata”.

“Inshuti, abavandimwe n’abaturanyi. Byari ibintu bibi ubwo ababiligi 10 bicwaga kuwa 7 Mata. Abaturage 12 b’ababiligi icyo gihe nabo barapfuye. Nari ku rutonde rw’abantu bagombaga kwicwa”.

“Abahutu bafataga Umubiligi nk’umututsi. Hari urutonde rw’abantu bagombaga kwicwa kandi ko twebwe ‘Ababiligi’ dushobora kuba twari kuri urwo rutonde”.

Kuwa 13 Mata, avuga ko yajyanywe ku kibuga cy’indege mu modoka yamukuye mu rugo. U Bubiligi bwavugaga ko yagombaga kugenda mbere ariko yashatse kuhaguma kugeza ubwo guhungisha ababiligi byatangiraga.

Ageze mu Bubiligi yabaye umujyanama mu bya dipolomasi wa Minisitiri w’Intebe, Dehaene. Ibi ngo bikaba byaramufashije kudahahamurwa n’ibyo yabonye mu Rwanda.

Nasinziraga neza, sinigeze ngira ukwigunga cyangwa ngo ndare nabi. Agahinda ariko birumvikana ko kari kagihari ndetse nkibaza ibibazo; Iki, nde, kubera iki...

Yakomeje kugira icyizere

Mu gutangira ibya dipolomasi, Johan yakoze mu Burundi. Yari azi imvururu z’amoko ndetse n’ibibazo by’ubukungu mu karere. Ariko yabonaga icyizere mu Rwanda nk’igihugu gikorana n’u Bubiligi kuko ubufatanye bw’ibihugu byombi mu iterambere bwabyaraga umusaruro.

Ati “Mu myaka namaze mu Rwanda, nahoraga nshaka uburyo bwo kuvuga ntabogama, gutangiza no gusigasira ibiganiro mu nzira itoroshye y’amahoro n’amavugurura”.

Byari bikomeye ariko iyo hagize ibitungana ni ibyishimo ko ubashije gutanga umusanzu nk’umuhuza. Itegeko Nshinga ryaravuguruwe, hari ibitangazamakuru byinshi kandi bifite ubwisanzure bwo kuvuga, ubukungu byabonekaga ko bushoboka, ariko hari ibyatumaga hari ibigorana.

Guhera mu 1959, nyuma y’uko Abahutu bafashe ubutegetsi, imvururu zishingiye ku moko zarimakajwe zasize ibihumbi magana by’abatutsi bahungira mu bihugu bituranyi birimo Uganda. Ibi byateje ibibazo byinshi, hibazwa uko izo mpunzi zingana gutyo zitazatahuka. Inzu zabo n’ubutaka byaratwawe, urwango no gutakaza icyizere ari byo byiganje.

Amasezerano ya Arusha yo mu 1993, yagombaga kuba imvano y’amahoro no kubana kw’abadahuje amoko. Yateganyaga ugusangira ubutegetsi, byashyiraga mu mwanya mwiza FPR-Inkotanyi, bikaba byarongereye urwikekwe n’ubundi rwari rusanzwe ruhari.

Imitwe yari ihuriye mu masezerano ntabwo yari iyo kugirirwa icyizere muri iyo nzira y’amahoro kuko nk’Abahutu batinyaga ko batangira kurutwa n’abatutsi bari bake.

Guhanurwa kw’indege ya Habyarimana wari umaze gutorwa na mugenzi we w’u Burundi, cyabaye igihombo gikomeye ku bari bafitiye icyizere ayo masezerano.

Ibiganiro n’abakoraga Jenoside

Amb. Johan avuga ko Nyuma y’urupfu rwa Habyarimana, yagiranye ibiganiro na bamwe mu ba Minisitiri bo muri Guverinoma yiyise iy’abatabazi, icyo gihe ubwicanyi bwa kinyamaswa bwari burimbanyije.

Aba ba Minisitiri bamubwiye ko bashaka ko u Bubiligi bugira icyo bukora kugira ngo bushimangire icyizere cyabwo kuri iyo Guverinoma. Byari bitangaje, nabitekerejeho, jenoside yari igezemo hagati. Ntabwo cyari igihe cyo gusaba kugira icyo dukora mu bya politiki.

U Rwanda nyuma ya Jenoside

Amb. Johan avuga ko buri gihe hari icyo azi ku Rwanda. Ati “Nzi amakosa n’ibibazo, nabonye amaraso n’imyivumbagatanyo. Ariko nabonye by’umwihariko ubushobozi bw’ibyiza byinshi. Nabonye iterambere nubwo habayeho amahano nka Jenoside yakorewe Abatutsi”.

Nyuma y’imyaka 20 nibwo Amb Johan yagarutse mu Rwanda atangazwa no kongera kwiyubaka ndetse yumva ko umwuka mubi warangiye kera, u Rwanda ruri ku ntebe y’intsinzi.

Ati “Igihugu gihagaze neza mu bukungu, u Rwanda ruri mu cyerekezo kizima, rufite inyota y’ibikorwa remezo bikomeye”.

“Niba ushaka gutangiza ubucuruzi mu Rwanda biroroshye kurenza mu Bubiligi, ntabwo ari njye ubibona gutyo ahubwo ni Banki y’Isi. Ntushobora kubyiyumvisha ku gihugu cyanyuze mu bihe bikomeye”.

Yavuze kandi ko inzira y’ubwiyunge yatumye abanyarwanda babasha kuririra ababo bazize Jenoside yakorewe Abatutsi no kubibuka, agaruka ku makosa yakozwe na Loni n’ibindi bihugu bikomeye byagombaga gutabara u Rwanda.

Ati “Umuryango Mpuzamahanga wakoze amakosa akomeye yo kutagira icyo ukora cyangwa gukererwa. U Bubiligi, u Bufaransa, Leta zunze Ubumwe za Amerika na Loni, bose bafite uwo mutwaro ku mutwe. Ariko aba mbere bireba ni abanyarwanda”.

Ambasaderi Johann Swinnen azwiho kandi kuba yaroherereje inyandiko y’ubutumwa bwihuse (télex) kuwa 1 Werurwe 1994, abayobozi b’u Bubiligi agaragaza ko RTLM itangaza "amagambo akongeza urwango ndetse no gutsemba igice kimwe cy’abaturage."

Yanandikiye Minisiteri y’ububanyi n’amahanga y’u Bubiligi ko MINUAR nta bubasha n’imbaraga zo guhagarika ibikorwa by’ubugome bw’Interahamwe n’intwaro zakwizwaga mu baturage uko bwije n’uko bukeye.

Ambasaderi Johan Swinnen wari uhagarariye u Bubiligi mu Rwanda mu gihe cya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza