Harifuzwa ko 60% by’imanza z’ubucuruzi zajya zikemurirwa mu buhuza

Yanditswe na Tombola Felicie
Kuya 12 Werurwe 2018 saa 07:26
Yasuwe :
0 0

Perezida w’Urukiko rw’Ikirenga, Sam Rugege, yatangaje ko urwego rw’ubucamanza mu Rwanda rwifuza ko nibura 60 % by’imanza z’ubucuruzi zajya zikemurirwa mu rwego rw’ubwunzi kuko aribwo byihuta kurenza kugana inkiko ndetse buri ruhande rukanyurwa.

Perezida w’Urukiko rw’Ikirenga yagaragaje iki cyifuzo ubwo yatangizaga amahugurwa y’iminsi itanu agamije kongerera ubumenyi abacamanza bo mu nkiko z’ubucuruzi, abavoka, anyamategeko bo mu bigo by’imari, abo mu mabanki n’abo mu Kigo cy’imisoro n’amahoro ku bijyanye no kunga abafitanye ibibazo mu bucuruzi kurenza kujya mu nkiko.

Yagize ati “Turashaka ko ibibazo byose cyangwa amakimbirane yose ashoboka yakemurwa mu buryo bwo kumvikana, mu buryo bwo kunga kuko dusanga iyo abantu bumvikanye bagenda bose banezerewe cyangwa naho baba batishimiye ibyavuyemo byose uko biri kose bumva ko hari icyo bavanyemo.”

Yatangaje ko ubundi iyo bagiye mu nkiko uretse kuba bimara igihe kirekire ngo usanga buri wese aba yifuza gutsinda kandi bidashoboka.

Ati “Iyo bagiye mu nkiko hagomba kugira utsinda n’utsindwa, akenshi utsindwa ntabyemera neza, aba aziko nawe yari akwiriye gutsinda, bikarangira abantu bashwanye, batavugana. Ibyo rero nibyo dushaka ko byagabanyuka maze ibibazo byinshi, amakimbirane menshi bigakemurwa mu buryo bw’ubwumvikane.”

Rugege yagaragaje ko ibibazo bikemukira muri ubwo buryo bwifuzwa bikiri bike cyane.

Yagize ati “Ubundi ntibirenga 5% ku bantu bemera kumvikana ku bibazo, turumva bishobotse byazamuka bikagera nko kuri 60% kuko nk’ahandi nabonye mu gihugu cya Trinidad and Tobago barabitangiye maze mu mushinga w’igerageza nk’iryo tugiye gutangira imanza 65% mu mwaka wa mbere zakemuwe mu bwumvikane.”

Akomeza avuga ko no mu bindi bihugu bikoresha ubu buryo usanga 90% by’imanza bikemurwa mu bwumvikane, n’u Rwanda akaba ari ho rwifuza kuganisha.

Perezida w’Urukiko Rukuru rw’Ubucuruzi, Kamera Emmanuel, yavuze ko uburyo bw’ubwunzi bufite ari bwiza kuko abantu bagira uruhare mu kwikemurira ikibazo cyabo, hakabonekamo umwanzuro utuma batandukana bakemuye ikibazo bari bafite ariko bagakomeza no kubana neza.

Akomeza asobanura ko impande zifitanye ibibazo zizajya zihuzwa n’abacamanza cyangwa ba Abavoka.

Kamera ati “Umucamanza igihe abona ikibazo kiberanye no kugikemura mu bwunzi kitagiye mu nkiko ngo haboneke utsinze n’utsindwe azajya abigiraho inama impande zombi. Na Avoka nawe azajya abigiraho inama abakiriya be namara kubunga babe bamugenera igihembo nk’uko mu rukiko n’ubundi bari kuzamuhemba.”

Uruhande rutanyuzwe n’ubwunzi rushobora kwiyambaza urukiko ariko uwakoraga akazi ko kubunga ntabe ariwe wongera kubaburanisha.

Kwitabaza inzira yo kunga byitezweho kuzagira uruhare mu gukemura ikibazo cy’ibirarane mu nkiko.

Kamere avuga ko nibura buri mwaka mu nkiko eshatu z’ubucuruzi, urwa Musanze, Huye na Nyarugenge habarurwa imanza ibihumbi bitatu, hakaba hari n’izirenza umwaka zitaraburanishwa bitewe n’imiterere yazo.

Ati “Twibwira ko turamutse dufashe inzira y’ubwunzi hari imibare myinshi y’imanza zagabanyuka, zacibwaga kandi uretse kuba abantu batatakaza umwanya wabo, twanarushaho kugira sosiyete nziza kuko burya iyo umwe atsinze undi mu rukiko hazamo inzigo.”

Amahugurwa arimo gutangwa ku gukemura imnaza z’ubucuruzi mu nzira yo kunga ari gutangwa n’inzobere z’Abanyamerika zimaze imyaka irenga 30 mu bukemurampaka n’ubwunzi.

Abahuguwe bashobora kugenda bagatangira gukoresha uburyo bw’ubwunzi kuko itegeko ryari risanzwe ribibemerera ariko bikaba bisa nk’aho bitakorwaga .

Perezida w’Urukiko rw’Ikirenga, Sam Rugege, afungura amahugurwa ku kunga abafitanye ibibazo mu bucuruzi
Bruce Edourads, inzobere mu bukemurampaka n'ubwunzi mu manza ndetse na Perezida w'Urukiko rw'Ikirenga, Prof Sam Rugege

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza