Hatangijwe gahunda igamije gushishikariza abanyamahanga kwiga mu Rwanda

Yanditswe na Iradukunda Serge
Kuya 12 Kamena 2019 saa 08:21
Yasuwe :
0 0

Study in Rwanda yamuritswe nka gahunda nshya igamije gushishikariza no gufasha abanyeshuri b’abanyamahanga kwiga muri kaminuza zo mu Rwanda.

Yamuritswe kuri uyu wa Kabiri, tariki ya 11 Kamena 2019, mu kiganiro cyahuje itangazamakuru n’abashinzwe kumenyekanisha Study in Rwanda, abayobozi ba za kaminuza zikorera mu gihugu, abanyeshuri b’abanyamahanga biga mu Rwanda n’abandi.

Gakwandi Claude watangije iyi gahunda yavuze ko igitekerezo cyaje nyuma yo kubona amashuri yo hanze aza mu Rwanda na bo bumva ko bashyiraho uburyo bureshya abanyeshuri bo hanze kuza kwigira mu Rwa Gasabo.

Yagize ati “Dutangira hagati ya 2004 na 2006, twafashaga ibigo byo muri Canada kuza hano gushaka amashuri. Wasangaga hari abanyeshuri benshi basabye kujya kwiga muri Canada ariko bakabima viza.’’

Mu 2010 nibwo amashuri yo muri Canada yatangiye kuza ndetse Ambasade ya Canada mu Rwanda isabwa ubufasha bwo gusobanurira abanyeshuri bashaka kwiga muri icyo gihugu.

Yakomeje avuga ko “Mu 2014, abanyeshuri n’ababyeyi barabyitabiriye batangira kumenya Canada no kumva ko hari amashuri meza ndetse batangira kwiyishyurira bakajya kwigayo.’’

Gakwandi yavuze ko icyo gihe aribwo batekereje gushyiraho ikigo cyateza imbere uburezi mu Rwanda.

Ati “Twakoze ubushakashatsi tureba niba abo mu bihugu bya Afurika baza kwigira hano, twagiye mu by’Uburengerazuba, Iburasirazuba n’Amajyepfo, dusanga abantu benshi bakunda kuza hano mu Rwanda, bararuzi kandi bakunda ubuyobozi bwacyo, bahabwa umutekano kuko iyo ikintu cyabo kibuze bahita bafashwa.’’

Gakwaya yashishikarije Kaminuza zo mu Rwanda yaba iza leta n’izigenga kugira ibyo zihindura nko kongera ingengo y’imari, aho abanyeshuri baryama mu kwitegura gufasha Study in Rwanda kugera ku ntego zayo.

Umuyobozi wungirije ushinzwe Amasomo muri Kaminuza y’Amahoteli, Ubukerarugendo, Ikoranabuhanga n’Ubucuruzi (UTB), Prof Dr Gustave Tombola, yavuze ko hari byinshi u Rwanda rufite byatuma abanyamahanga baza kurwigamo.

Yagize ati “Mbere na mbere iyo urebye uburyo Visa y’u Rwanda itangirwa ku kibuga cy’indege, icya kabiri iyo urebye uburyo u Rwanda rufite umutekano aho umuturage ashobora kugenda igihugu cyose amasaha 24 kuri 24 ni ikintu cyakururira umuntu kuza kwiga mu Rwanda.’’

Yanavuze ko imiyoborere y’igihugu na yo ishobora kuba iturufu kuko ‘‘mu Rwanda dufite amategeko arengera abashoye imari mu burezi kandi bifasha cyane gahunda ya Study in Rwanda.”

UTB iherutse gushyira ku isoko abanyeshuri barindwi b’abanyamahanga basoje amasomo ya kaminuza.

Allah Hadji Kabo ukomoka muri Sierra Leone wiga muri African Leadership University ifite icyicaro i Kigali yavuze ko uburezi buyitangirwamo buri ku rwego rwiza.

Yagize ati “Ubumenyi duhabwa hano ni bumwe nk’ubutangirwa muri Kaminuza ya Harvard. Iyo ugiye mu bihugu byinshi by’i Burayi usanga abantu benshi babiteje imbere ari Abanyafurika. Ndabizi ko impinduka nazana mu Rwanda zizagirira akamaro Abanyafurika kandi mu myaka 25 umugabane uzaba ufite amaboko kandi u Rwanda ni rwo rwabaye intangiriro. Study in Rwanda ni umugisha kuri benshi bazaza kwiga mu Rwanda.”

Study in Rwanda yiyemeje ko nibura buri mwaka izajya izana abanyeshuri b’abanyamahanga bari hagati ya 1500 na 2000.

Gakwandi yavuze ko “Dushobora kuzana n’abanyeshuri miliyoni eshanu mu myaka itanu. Iyo baje rero biteza imbere ubukungu bw’igihugu.’’

Gahunda ya Study in Rwanda yitezweho kuzamura ireme ry’uburezi binyuze mu gushishikariza kaminuza mpuzamahanga gufungura amashami yazo mu Rwanda no gusangira ubunararibonye binyuze mu guhugurana hagati y’abarimu b’izo mu gihugu no hanze yacyo.

Hari kaminuza zamaze gushinga ibirindiro mu Rwanda zirimo iy’Abanyamerika yigisha Ikoranabuhanga, Carnegie Mellon University Africa ikorera i Kigali n’iy’Ubuvuzi, University of Global Health Equity (UGHE), iherereye i Butaro mu Karere ka Burera.

Hatangijwe gahunda igamije gushishikariza abanyamahanga kwiga mu Rwanda no kuzamura ireme ry'uburezi ryifuzwa mu cyerekezo cy'igihugu
Ikiganiro cyatangiwemo ibitekerezo by'abarimo n’abashinzwe kumenyekanisha Study in Rwanda, abayobozi ba za kaminuza n'amashuri yisumbuye mu gihugu n'abanyeshuri b’abanyamahanga biga mu Rwanda
Abitabiriye iki kiganiro batanze ibitekerezo bitandukanye
Ikiganiro cya gahunda ya Study in Rwanda igamije gushishikariza abanyamahanga guhahira ubumenyi mu Rwanda cyabereye muri Serena Hotel

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza