Kwamamaza

U Bwongereza bwokejwe igitutu kuri Twitter ngo bwohereze batanu bakekwaho Jenoside

Yanditswe kuya 29-11-2016 saa 16:00' na IGIHE


Abanyarwanda bakoresha imbuga nkoranyambaga by’umwihariko Twitter batangije ubukangurambaga bwotsa igitutu Leta y’u Bwongereza bayisaba kohereza mu Rwanda, abantu batanu bakurikiranyweho ibyaha bya Jenoside yakorewe Abatutsi muri Mata 1994, bagicumbikiwe muri iki gihugu.

Byatangiye gukorwa binyuze kuri hashtag yashyizweho yiswe ‘#ExtraditeUK5’, basaba u Bwongereza gutera intambwe bakarekura aba bagabo, bakoherezwa mu Rwanda gukurikiranwa n’ubutabera ku byaha bya Jenoside bashinjwa ko bakoze.

Abasabirwa koherezwa kuburanishirizwa mu Rwanda ni Bajinya Vincent, ukora mu by’ubuvuzi, Mutabaruka Célestin wahoze ari Pasiteri ndetse n’abandi batatu bahoze ari abayobozi mu nzego za Leta barimo Ugirashebuja Célestin, Munyaneza Charles na Nteziryayo Emmanuel.

Uko ari batanu bafatiwe mu Bwongereza mu bihe bitandukanye guhera muri 2013 nyuma y’ubusabe bwa Leta y’u Rwanda.

Hashize imyaka icumi Leta y’u Rwanda n’iy’u Bwongereza bakoze iperereza bakemeranya ko aba batanu bakekwa ko bagize uruhare muri Jenoside yakorewe Abatutsi muri Mata 1994.

Nyuma yo gushyira umukono ku masezerano y’imikoranire mu by’ubutabera, muri 2007 u Rwanda rwashyikirije u Bwongereza abagomba gutabwa muri yombi.

Inkiko zo mu Bwongereza zategetse ko abakekwaho Jenoside boherezwa kuburanira mu Rwanda muri 2008, ariko muri 2009 Urukiko Rukuru rwo mu Bwongereza ruza kubivuguruza.

Iki kibazo cyongeye kubyutswa muri 2013, ubwo u Rwanda rwagaragarazaga ko rufite ubushobozi bwo guha ubutabera buboneye, abakurikiranyweho Jenoside runasaba ko boherezwa.

Bimwe mu bihugu byo ku mugabane w’u Burayi birimo Norvège n’u Buholandi ndetse na Leta Zunze Ubumwe za Amerika na Canada byasinye amasezerano y’imikoranire na Leta y’u Rwanda yo kohereza abakekwaho Jenoside kuburanira mu gihugu.

Mu myaka 22 ishize Jenoside yakorewe Abatutsi mu Rwanda ibaye, u Rwanda ntirwahemye gusaba ibihugu bicumbikiye abantu bagize uruhare muri Jenoside kubohereza bagahabwa ubutabera, ariko bimwe bigenda byinangira.

Abakoresha Twitter bifashishije Hashtag #ExtraditeUK5 basaba u Bwongereza kohoreza mu Rwanda abakurikiranyweho ibyaha bya Jenoside

Kanangire Christian yagize ati “Abacitse ku icumu rya Jenoside yakorewe Abatutsi mu Rwanda bababajwe n’uburyo u Bwongereza bukomeje gukingira ikibaba abakurikiranyweho ibyaha bya Jenoside.”

Rugasagaguhunga we yagize ati “Mu gihe abacitse ku icumu basaba ko abakekwaho ibyaha bya Jenoside bahabwa ubutabera, u Bwongereza bwakomeje gutsimbarara ku kubaburanisha bavuga ko bazabaha ubutabera buboneye.”

Dr Peter Mahirwe na we yagize ati “ Nyuma y’imyaka 22, Ubutabera bw’u Bwongereza buracyacumbikiye bamwe mu bakekwaho kugira uruhare mu mugambi wo gucura, gutegura no gushyira mu bikorwa Jenoside.”

Kuwa Mbere w’iki Cyumweru, tariki ya 28 Ugushyingo nibwo urukiko Rukuru rw’i Londres mu Bwongereza rwatangiye kumva ubujurire bw’aba Banyarwanda batanu basaba ko batakoherezwa kuburanishirizwa mu Rwanda ku byaha bakekwaho byo kuba baragize uruhare muri Jenoside yakorewe Abatutsi mu 1994.

Aba Banyarwanda batanu bakurikiranyweho ibyaha bya Jenoside ni bantu ki?

Bajinya Vincent bita Brown akekwaho kuba mu itsinda ryari rifitanye isano rya hafi na Perezida Habyarimana Juvénal wari Perezida mu gutegura Jenoside no kwica Abatutsi benshi muri Kigali. Ubwo bwicanyi bwagiye bukorerwa kuri za bariyeri ku bufatanye n’interahamwe.

Bajinya yatawe muri yombi na Polisi yo mu Bwongereza kuya 28 Ukuboza 2006, nyuma y’ubusabe bwa Leta y’u Rwanda.

Bajinya yasabye ubuhungiro mu Bwongereza, mu gihugu yakoreye imyaka myinshi nk’Umuganga mu bitaro bya Praxis ndetse aza no guhindura izina rye yiyita Vincent Brown

Mutabaruka Célestin yahoze ari Pasiteri mu itorero ry’abapantekote, aregwa kugira uruhare mu gufatanya n’interahamwe mu gutegura, guhagarikira no gushyira mu bikorwa ubwicanyi bwakorewe abasaga ibihumbi 20 barimo abagabo abagore n’abana.

Munyaneza Charles yari Burugumesitiri w’iyahoze ari Komini Kinyamakara mu Perefegitura ya Gikongoro, na we aregwa kugira uruhare mu gutegura no gushyira mu bikorwa umugambi wa jenoside ndetse no kuyobora ibitero byagabwaga ku mugezi wa Mwogo muri Gikongoro byaguyemo abatutsi benshi.

Ugirashebuja Célestin yavutse mu 1953. Yahoze ari Burugumesitiri wa Komini Kigoma muri Perefegitura Gitarama, na we aregwa gutegura no gushyira mu bikorwa umugambi wa Jenoside, aho yari ayoboye. Bivugwa ko yatanze itegeko ku nterahamwe ryo kwica Abatutsi bari bajyanywe ku biro bye kuri komini, abaha n’amabwiriza yo kujya guhiga Abatutsi aho byakekwaga ko bihishe ngo bicwe.

Mu cyumweru cya kabiri cy’ukwezi kwa kane, 1994, Ugirashebuja yayoboye igitero cy’abagendaga bahiga ndetse bakanafata ku ngufu abagore.

Akimara kugera mu buhungiro yakomeje gutangaza amagambo abiba urwango hagati y’Abanyarwanda.

Nteziryayo Emmanuel yahoze ari Burugumesitiri wa Komini Mudasomwa muri Gikongoro aregwa kugira uruhare mu itegurwa n’ishyirwa mu bikorwa ry’umugambi wa Jenoside.

Yayoboye kandi interahamwe mu bwicanyi bwabereye muri ako gace bwaguyemo abatutsi benshi. Mu Bwongereza yabayeyo yihishahisha ndetse yiyita Emmanuel Ndikumana.

Mutabaruka Célestin wahoze ari Pasiteri
Nteziryayo Emmanuel
Bajinya Vincent bita Brown akekwaho kuba mu itsinda ryari rifitanye isano rya hafi na Perezida Habyarimana Juvénal wari Perezida mu gihe cya Jenoside
Munyaneza Charles wahoze ari Burugumesitiri w’iyahoze ari Komini Kinyamakara mu Perefegitura ya Gikongoro
Ugirashebuja Célestin wahoze ari Burugumesitiri wa Komini Kigoma muri Perefegitura Gitarama

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved