Hatangijwe umushinga wo kubaka inzu 3000 zizafasha ab’amikoro make gutunga icumbi muri Kigali

Yanditswe na Habimana James
Kuya 3 Kamena 2019 saa 06:48
Yasuwe :
0 0

Minisitiri w’Ibikorwa remezo, Amb. Gatete Claver, yatangije umushinga ugiye kubakwamo inzu 3000 mu Murenge wa Nyamirambo, Akarere ka Nyarugenge, ukaba uzafasha abari basanzwe nta nzu bafite kubera ubushobozi buke.

Inzu 2200 nizo zigiye kubakwa n’ikigo Remote Group naho izindi 800 zubakwe na Girinzu.

Izi nzu zigiye kubakwa kuri hegitari 42 mu gihe cy’umwaka umwe zizaba zuzuye, ni mu mushinga wa Rugarama Park Estate, ku bufatanye bwa Remote Group, Banki Itsura Amajyambere y’u Rwanda (BRD) na Shelter Afrique.

Mu mezi atandatu icyiciro cya mbere kizaba kirangiye. Abazaba barebwa no gutunga izi nzu ni abahembwa hagati y’ibihumbi 200-900 by’amafaranga y’u Rwanda ku kwezi.

Inzu ifite icyumba izagura amafaranga y’u Rwanda miliyoni 12, ifite ibyumba bibiri igure miliyoni 18, hazabaho igura miliyoni 23 naho ifite ibyumba bine yo izagura miliyoni 35 Frw.

Minisitiri w’Ibikorwa remezo, Amb. Gatete Claver, yavuze ko uyu ari umushinga wo kubaka amacumbi ibihumbi bitatu kandi akazubakwa mu gihe gito ndetse akazaba yubatswe mu buryo bukoreshejwe ikoranabuhanga.

Ati “Aba ni abishyize hamwe barimo BRD, Shelter Afrique na Remote Group, barafatanyije bashyira hamwe amafaranga, noneho Remote Group n’iyitwa Girinzu, nibyo bigo bigiye kubaka aya macumbi.”

Yakomeje avuga ko ibiciro by’izi nzu bigaragaza ko buri munyarwanda wese ashobora kubona icumbi kandi ku buryo bworoshye.

Uburyo leta ifasha abashaka inzu zihendutse

Kimwe mu bigora abashaka kubaka cyangwa kugura inzu, harimo aho kubaka, ibyo kubakisha ndetse n’ibikorwa remezo.

Mu rwego rwo gufasha abashoramari bashaka kubaka inzu ziciriritse zifasha abanyarwanda bafite ubushobozi buke, leta yashyizeho ikigega kitwa (Affordable Housing Fund), aho ishyiramo amafaranga ifatanyije n’abafatanyabikorwa, aya mafaranga agahabwa amabanki.

Aya niyo mafaranga azajya afasha ushatse ya nzu kuyafatamo ideni ariko iryo deni akazajya aryishyura mu gihe kirekire kandi inyungu ikazaba iri hasi, bitandukanye n’andi madeni amabanki asanzwe atanga.

Muri iki kigega harimo miliyoni 150 z’amadorali acungwa na BRD, akazahabwa amabanki kugira ngo agurizwe abashaka izi nzu zihendutse.

Amb.Gatete yakomeje agira ati “Ayo mafaranga ntabwo ari ayo kubaka ahubwo iyo aba bashoramari bamaze kubaka hari abantu baba bakeneye za nzu ariko akenshi ikibazo kihaba ni uko kugira ngo uzabone ya nzu wasangaga bihenze, ibi byatumye leta ishaka amafaranga akazajya ahabwa abo bantu bakayishyura mu gihe kirekire.”

Umuyobozi Mukuru wa BRD, Eric Rutabana, yavuze ko kugira ngo umuntu abone inzu azajya anyura muri banki asanzwe akorana nayo.

Ati “Aha niho uzajya usabira amafaranga yo kugura ya nzu, kugira ngo ushobore kuba wafata iyi nzu bisaba ko unyura ku kigo nka Rugarama Park Estate cyangwa kuri Remote group ukiyandishaka, hariho ibisabwa birimo ko ugomba kugaragaza inzu wifuza kugura, ukagaragaza ubushobozi bwawe bwo kwishyura, aho niho bahera bareba ikigero cy’inzu ushobora kugura hanyuma ukegera banki yawe kugira ngo ikugurize amafaranga.”

Ati “Ariya mafaranga miliyoni 150 z’amadorali BRD niyo iyacunga ariko azanyuzwa muri banki zose kugira ngo buri muntu wese ushaka gufata inguzanyo yo kugura izi nzu ashobore kuyabona, ntabwo ari ngombwa ko ujya muri BRD kuguza.”

Rutabana yavuze ko umuntu uzajya abona iyi nguzanyo azajya ayishyura mu gihe kirekire kandi ku nyungu nto ugereranyije n’ayari asanzwe.

Yagize ati “Ubusanzwe iyo wajyaga gushaka amafaranga muri banki wasangaga ahenze kuko ahera kuri 16% kuzamura, ikindi ukazayishyura mu gihe gito ni ukuvuga imyaka 5 cyangwa 10, aya yo bazajya bayishyura hejuru y’imyaka 20 kandi bayabone ku kiguzi kiri hasi, dutekereza ko inyungu itazarenga 11%.”

Yavuze ko aya ari amahirwe ku banyarwanda bafite ubushobozi buke kuko ubusanzwe umuntu atashoboraga kuba yabona inzu igura miliyoni 12,15, 18 cyangwa 35 Frw.

Trevor Green, umuyobozi Mukuru wa Remote Group, yijeje abanyarwanda ko izi nyubako zizaba zikomeye, cyane ko ibikoresho bizazubakishwa bimaze imyaka irenga 100 bikoreshwa hirya no hino ku Isi, haba ku mugabane w’u Burayi, Aziya n’ahandi.

Uyu ni umushinga uzatwara miliyoni 131 z’amadolari, abantu ibihumbi 14 bakaba aribo uzakira.

Ubushakashatsi bwakozwe mu 2012 bwagaragaje ko inzu zikenerwa mu Mujyi wa Kigali buri mwaka zingana 31,279 mu gihe haboneka gusa 1000, ibi bisobanuye ko buri mwaka haboneka icyuho cy’inzu 30,279.

Iyi nzu izaba ifite ibyumba bibiri igure miliyoni 18 Frw
Kimwe mu byumba bizaba bigize iyi nyubako ya miliyoni 18 Frw
Aha hazaba ari mu ruganiriro rw'iyi nzu
Amatafari agezweho akorwa n'ikigo Remote Group azakoreshwa mu kubaka
Trevor Green, umuyobozi Mukuru wa Remote Group, yijeje abanyarwanda ko izi nyubako zizaba zikomeye
Minisitiri w'ibikorwa remezo ubwo yatahaga ahagiye gukorerwa uyu mushinga wo kubaka izi nzu ziciriritse
Mu mwaka umwe gusa izi nzu zizaba zamaze kubakwa
Ambasaderi wa Amerika mu Rwanda, Peter Vrooman, nawe yitabiriye iki gikorwa
Minisitiri w’Ibikorwa remezo, Amb. Gatete Claver yavuze ko uyu ari umushinga wo kubaka amacumbi ibihumbi bitatu kandi akazubakwa mu gihe gito
Umuyobozi Mukuru wa BRD, Eric Rutabana, yavuze ko kugira ngo umuntu abone inzu azajya anyura muri banki asanzwe akorana nayo
Umuyobozi Mukuru wa Shelter Afrique, Andrew Chimphondah yavuze ko biteguye kugeza inzu zihendutse ku banyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza