Hatangiye gutoranywa urubyiruko ruzoherezwa muri Israel kwihugura mu buhinzi n’ubworozi

Yanditswe na Ferdinand Maniraguha
Kuya 13 Kamena 2019 saa 08:20
Yasuwe :
0 0

Minisiteri y’Ubuhinzi n’Ubworozi ku bufatanye n’igihugu cya Israel batangiye gutoranya urubyiruko rw’u Rwanda rwize ibijyanye n’ubuhinzi n’ubworozi kugira ngo rwoherezwe kwihugura muri Israel.

Hashize imyaka itanu u Rwanda na Israel bifitanye ubufatanye, aho abanyarwanda boherezwa muri icyo gihugu bakihugura mu buhinzi n’ubworozi mu gihe cy’amezi 11 nyuma bakagaruka mu Rwanda gushyira mu bikorwa ibyo babonye.

Israel ni igihugu cyateye imbere mu buhinzi n’ubworozi. Bukorwa n’abagera kuri 3 % by’abaturage bacyo ariko babasha guhaza igihugu mu biribwa kandi bagasagurira n’amasoko.

Ni kimwe mu bihugu bimeze nk’ubutayu ariko bifite ikoranabuhanga rikataje mu kuhira imyaka.

Guhera kuri uyu wa Kabiri muri Minisiteri y’Ubuhinzi n’Ubworozi, urubyiruko 450 rwari rwatoranyijwe by’agateganyo ngo rujye kwihugura muri icyo gihugu, rwatangiye kubazwa kugira ngo hatoranywemo 150 bazoherezwa uyu mwaka.

Umukunzi Vanessa, ni umwe mu baganiriye na IGIHE ubwo yari agiye kubazwa ngo arebe ko azatoranywa mu bazajya muri Israel.

Uyu mukobwa warangije Kaminuza mu bijyanye n’ubuhinzi, ubu akaba yahingaga imboga, yavuze ko aramutse agize amahirwe yo gutoranywa, byamuha amahirwe yo kwiga byinshi ku ikoranabuhanga mu buhinzi abanya-Israel bakoresha hanyuma akaza gufasha abanyarwanda kurikoresha.

Uhawenimana Diocres usanzwe ahinga umuceri mu gishanga cya Nyagatare, avuga ko agiye mu mahugurwa muri Israel yagarukana ubumenyi bumufasha kongera umusaruro w’ibyo yakoraga.

Israel hejuru y’ubuhinzi, ni igihugu kibonekamo n’ubworozi bugezweho bw’amatungo nk’inka, inkoko n’amafi.

Ritha Kwibuka wize ibijyanye no kwita ku matungo yavuze ko ageze muri Israel ikintu cya mbere yakwihutira kumenya ari uburyo bongera umusaruro mu bworozi bwabo.

Ati “Tugiyeyo byadufasha, twaza tukareba niba wari mu bworozi bw’amafi ukaza ukagira icyo ufasha ababikora, niba ari mu nkoko ukamenya ngo bvigenda bitya ngo twongere.”

Umunyamabanga Uhoraho muri Minisiteri y’Ubuhinzi n’Ubworozi, Musabyimana Jean Claude, yavuze ko impamvu bohereza urubyiruko rwize ubuhinzi n’ubworozi muri Israel, ari ukugira ngo babone umwanya uhagije wo gushyira mu bikorwa ibyo bize.

Ati “Buriya kenshi iyo umuntu arangije Kaminuza mu buhinzi n’ubworozi ubundi yakabaye ari umuntu ushobora kujya mu buhinzi, agacunga imirimo y’ubuhinzi ikamubyarira inyungu. Akenshi rero ntabwo abenshi ayo mahirwe bayabona. Iyo bagize Imana bakajya muri iyi gahunda bamara amezi 11 noneho bari mu mirimo koko nyayo ijyanye n’ubuhinzi.”

Yakomeje agira ati “Iyo bagarutse abenshi baraza bagatangira gukora sosiyete zabo z’ubuhinzi n’ubworozi abandi bagakora koperative, abandi bakabona imirimo mu bigo binyuranmye byongera umusaruro.”

Musabyimana yavuze ko ari n’umwanya wo kwereka urubyiruko ko ubuhinzi n’ubworozi ari ikintu cyabyarira inyungu abagikora bitandukanye nuko benshi babifata.

Ambasaderi wa Israel mu Rwanda, Ron Adam, yavuze ko kuba ubuhinzi ari urwego rutunze benshi mu banyarwanda, gahunda yo kohereza abanyeshuri muri Israel izagira akamaro kanini cyane.

Ati “Ubuhinzi ni urwego rutunze benshi hano mu Rwanda, ni ngombwa kurushoramo imari ku buryo biva mu buryo gakondo bikajya mu buryo bw’ikoranabuhanga. Iyi gahunda yo kohereza abanyeshuri izafasha kugira igisekuru gishya cy’abahinzi babifitemo ubumenyi kandi hizerwe ko abatangiye ubuhinzi babikora kinyamwuga.”

Mbonigaba Aman Valens yagiye muri Israel mu 2016. We na bagenzi be bamaze guhugurwa, bagarutse mu Rwanda bashing sosiyete Agri Win Ltd, igamije guteza imbere ubuhinzi hifashishijwe ikoranabuhanga.

Kuri ubu batubura ingemwe z’ibiti by’imbuto ziribwa, ku buryo bizeye ko amasomo bakuye muri Israel atazabapfana ubusa.

Nk’umuntu wamaze igihe muri Israel, avuga ko u Rwanda rwabishatse rwateza imbere ubuhinzi kurusha icyo gihugu.

Ati “Dufite imvura igwa mu gihe cyiza, nta gihe haraza izuba ngo ubushyuhe burenze dogere 36 , dufite imigezi muri Israel nta migezi bagira. Urubyiruko rw’u Rwanda ruruta urwa Israel , hafi ya bose ni abashaje ariko bagatanga umusaruro mwinshi kuturusha.”

Nibura abagera kuri 70% by’abanyarwanda bagejeje igihe cyo gukora bari mu mirimo y’ubuhinzi n’ubworozi ariko bugatanga 30 % by’umusaruro mbumbe w’igihugu.

Mu myaka itanu u Rwanda rumaze mu bufatanye na Israel mu buhinzi, abanyeshuri basaga 400 bamaze koherezwa mu mahugurwa muri icyo gihugu.

Umunyamabanga Uhoraho muri Minagri, Musabyimana Jean Claude, Ambasaderi Adam Ron n'abagize Sosiyete Agri Win
Ubuhinzi bwo muri Israel bwifashisha ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza