Hatangiye ubushakashati bwimbitse ku bukana bw’imyitwarire ibangamira abaturage mu Rwanda

Yanditswe na Iradukunda Serge
Kuya 22 Kanama 2019 saa 07:20
Yasuwe :
0 0

Ikigo cy’Igihugu Gishinzwe Igororamuco (NRS) cyatangiye ubushakashatsi bwimbitse ku birebana n’ubukana bw’imyitwarire ibangamira abaturage irimo ubuzererezi, uburaya, ubujura bworoheje, gukoresha ibiyobyabwenge, ubusinzi mu ruhame, gusabiriza n’ibindi, harebwa impamvu ziyitera, icyakorwa ngo icike burundu ndetse n’akamaro ka gahunda y’igororamuco mu Rwanda.

Ubushakashatsi ku birebana n’ubukana bw’imyitwarire ibangamira abaturage mu Rwanda buzagaragaza ahantu hagaragara abantu benshi bafite iyi myitwarire muri buri karere; amoko y’imyitwarire ibangamira abaturage agaragara muri buri karere n’umubare w’abayifite n’impamvu nyamukuru zitera iyo myitwarire ndetse n’ingamba zafatwa kugira ngo iyo myitwarire icike burundu mu Rwanda.

Inyigo ku bijyanye n’akamaro ka gahunda y’igororamuco mu Rwanda yo izasesengura impinduka nziza zigaragara ku bahoze ari abana bo mu muhanda bagororewe mu Kigo Ngororamuco cya Gitagata n’ibigo ngororamuco byigenga, ndetse n’impinduka nziza zigaragara ku rubyiruko rwagororewe mu Kigo Ngororamuco cya Iwawa.

Iyi nyigo kandi izagaragaza ibyagezweho n’ibigo ngororamuco bya Gitagata, Iwawa n’ibigo by’abigenga, igaragaze ahari intege nke muri gahunda z’igororamuco z’ibi bigo, yerekane abarangije amasomo y’igororamuco bagasubira mu myitwarire ibangamira abaturage ndetse yerekane n’ingamba zafatwa kugira ngo gahunda z’igororamuco zirusheho kugera ku ntego zazo.

Umuyobozi Mukuru wa NRS, Bosenibamwe Aimé, yavuze ko ubu bushakashatsi kandi buzafasha NRS gukora igenamigambi ry’imyaka itanu, rizakorwa bitarenze uyu mwaka w’ingengo y’imari wa 2019-2020.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza