HRW yasabiwe kwirukanwa mu Rwanda, Kenneth Roth uyiyobora yitwa ‘Imbwa y’Interahamwe’

Yanditswe na Rabbi Malo Umucunguzi
Kuya 19 Ukwakira 2017 saa 05:13
Yasuwe :
0 0

Abagize Inteko Ishinga Amategeko bagaragaje akababaro n’uburakari batewe ba raporo y’Umuryango Human Rights Watch (HRW), basaba ko wirukanwa mu gihugu ndetse ukajyanwa mu nkiko, bitewe n’uko basanga icyegeranyo uheruka gusohora ku Rwanda cyari kigamije guhungabanya Abanyarwanda n’ubuyobozi bwabo.

Kuri uyu wa Kane nibwo mu Nteko Ishinga Amategeko habaye ikiganiro nyunguranabitekerezo kuri raporo yasohowe na HRW muri Nyakanga yise “All Thieves Must Be Killed” [ugenekereje mu kinyarwanda ni “abajura bose bagomba kwicwa”], aho ivuga ko hari abantu 37 bishwe n’abapolisi, abasirikare, inkeragutabara cyangwa DASSO, mu turere twa Rubavu na Rutsiro.

Perezida wa Komisiyo y’Igihugu y’Uburenganzira bwa Muntu, Nirere Madeleine, yavuze ko muri iyo raporo HRW yatanze amakuru atari yo kuko mu iperereza komisiyo yasanze hari abantu barindwi bavugwaga ko bishwe n’abasirikare kandi bakiriho.

Yanavuze ko hari n’abandi byavugwaga ko bishwe nyamara bazize urupfu rusanzwe n’abo komisiyo yasanze batabaho.

Nirere yakomeje avuga ngo “Ni raporo irimo ibinyoma byinshi.” Ikindi ko iyo itavuga ko umuntu runaka yishwe n’uyu n’uyu, ahubwo igenekereza ngo uyu muntu “yishwe na polisi cyangwa abasirikare cyangwa Dasso.”

Ati “Hari n’amakuru twabonye ko bahaga amafaranga abantu bakabavana Rubavu bakabajyana Musanze bakababaza, nabyo ni ibintu tubona bitemewe […] HRW yagejeje iyi raporo ku muryango w’Abibumbye, Komisiyo Nyafurika y’uburenganzira bwa muntu, abaterankunga b’u Rwanda, tugasanga izo nzego zagezwaho amakuru y’ukuri tugasaba n’izo nzego kudaha agaciro iyo raporo, tukanasaba HRW kujya yubahiriza amahame agenga iperereza no kujya ibaza impande zose bireba.”

Abagize Inteko Ishinga Amategeko basabye ko HRW yamaganwa

Nyuma y’ibisobanuro bya Nirere, Abadepite n’Abasenateri basaga 20 bahise basaba ijambo bashima raporo komisiyo yabazaniye, Depite Mukayuhi Rwaka Constance avuga ko yamagana “raporo z’ubutitsa za HRW ku gihugu cyacu zigamije guca intege iterambere ry’Abanyarwanda. Mu muco wacu kubika umuntu akiriho ni ikizira, nkabona ari ibintu bibi bikwiye kwamaganwa.”

Senateri Niyongana Gallican yavuze ko ibigaragara mu buhamya bw’abantu byavuzwe ko bishwe ari akumiro, kandi imikoranire y’u Rwanda na HRW isanzwe igendera ku masezerano avugurwa buri mwaka.

Muri ayo masezerano ngo harimo ko HRW igomba gushingira ku bunyamwuga no kugaragaza ibintu bishingiye ku bimenyetso, ariko ngo ibyo ikora bituma umuntu yibaza niba ibikubiye muri ayo masezerano byubahirizwa.

Yakomeje agira ati “Ntabwo numva niba kubika umuntu akiriho bigaraza ubunyamwuga nk’umuryango uvuga ko ukora ubuvugizi, izo mpuhwe nkumva zaba ari nka zimwe za bihehe, nkumva harimo agasuzuguro, ubwirasi n’ikindi ntazi baba bagenderaho.”

Yavuze ko Guverinoma yasuzuma neza niba amasezerano ya HRW n’u Rwanda akwiye kongerwa, “hakarebwa niba koko ibyo twasezeranye byubahirizwa.”

Depite Nyiramadirida Fortunée we yavuze ko iyi raporo igamije gusenya u Rwanda n’Abanyarwanda, nk’aho ivuga ko umuntu yishwe azira ko yasibye umuganda.

Yakomeje agira ati “Nibaza niba uyu muryango utaregwa nk’uko Abanyarwanda batangaga ubuhamya babyifuje. Icyo twareba ni uko habaho kurega tugasabira indishyi bano baturage, ikindi ni uko bakwandika inyandiko inyomoza ibi banditse.”

Abadepite kandi bakemanze niba uyu muryango wigenga, cyangwa niba hari abantu bawihishe inyuma ukorera mu nyungu zabo.

Depite Mukayijore Suzanne yavuze ko niba Ingabo z’u Rwanda zoherezwa mu butumwa bw’amahoro zikanabihererwa ishimwe, nta kuntu mu gihugu zaba zivuga ko abanyarwanda bakwiye kwicwa.

Yanavuze ko kuba hari abantu bavanwaga i Rubavu bakajyanwa i Musanze ngo abe ariho babarizwa, abaturage bakwegerwa bakigishwa ko kubeshya bitari mu ndangagaciro nyarwanda, ariko n’abavuzwe ko bapfuye kandi bakiriho “bashakirwa abavoka bakarega Human Rights Watch.”

Depite Hindura yavuze ko abantu bakorera HRW atari abaswa ku buryo baba batazi ibyo bakora, icyo bagambiriye ari Perezida wa Repubulika n’umutekano w’Abanyarwanda. Ati “Iyi raporo yatanzwe turi hafi kujya mu matora y’umukuru w’igihugu, ubwo murumva neza icyo bashakaga.”

Visi Perezida w’Umutwe w’Abadepite, Mukama Abbas we yavuze ko HRW ikwiye kwirukanwa mu Rwanda, cyane ko Umuryango udaharanira inyungu (ONG) udakwiye gutesha igihe leta.

Yagize ati “Ndi kwibaza impamvu HRW, ni ONG, mwumve ONG idutesha umwanya idutesha agaciro. Abavuze ngo dusuzume imikoranire yacu, njye nasaba ko tuyirukana, kuko na BBC ibibazo yaduteye twarayirukanye kandi twakomeje kubaka igihugu cyacu. Igihugu ni igihugu, nta muntu wadukora mu jisho rimwe, kabiri, ntabwo byakwemerwa. Aba bantu bagaragaje ko bapfuye, ese twe dufite ubushobozi bwo kubazura? Bazutse se ntibahoze bavuga? Niba bigeze aho, niyo mpamvu nasaba ko twabirukana muri iki gihugu.”

Depite Ruku Rwabyoma we yavuze uyu muryango umaze imyaka 50 uyoborwa na Kenneth Roth, ukomeje kugaragaza uburakari bukomeye ku Rwanda binyuze no muri iyi raporo HRW yakoze, ariko ngo hari abantu bamwe bakomeje guceceka ntibamwamagane.

Yakomeje agira ati “Natwandikeho uko ashaka, turacecetse, turacecetse. Hari abamukurikira ibyo avuze ugasanga babitwaye nkaho bifite ishingiro. Ni imbwa y’Interahamwe [Mumbabarire gukoresha iryo jambo mu nteko] isingiza uvuze nabi u Rwanda uwo ariwe wese.”

“Ubu yabaye noneho umuvugizi w’umukobwa umwe numvise wazuye abantu bakandika ilisiti y’abamushyigikiye. Ubu yagiye ku ilisiti ye aramushyigikira, aravuga ko akubitwa buri gihe aho afungiye hariya, we na nyina na murumuna we.”

“Mwemere batwandikeho ibyo bashaka kuko bamwe muri twe turacecetse [...] Ntihakagira utuvugira ibimenyetso twe twabigaragaza uko biri kandi mu gihe nyacyo, ariko nyabuneka, uyu muntu nise intozo tumuhagurukire twese kuko ntasiba buri munsi.”

Nyuma y’ibitekerezo bitandukanye, Inteko Ishinga Amategeko yamaganye Umuryango Human Rights Watch ‘kubera ibikorwa n’amakuru bigayitse bigaragara muri raporo wakoze’; isaba Guverinoma ‘kongera gusuzuma amasezerano y’imikoranire n’uyu muryango, ku buryo ibikorwa bigayitse bikomeje kuwuranga mu guharabika isura y’u Rwanda n’Abanyarwanda bitakomeza gukorwa hashingiwe cyangwa hitwajwe ayo masezerano atanakurikizwa’.

Perezida wa Komisiyo y’Igihugu y’Uburenganzira bwa Muntu, Nirere Madeleine, yavuze ko muri raporo HRW, yatanze amakuru atari yo kuko mu iperereza komisiyo yasanze hari abantu barindwi bavugwaga ko bishwe n’abasirikare kandi bakiriho / Ifoto: Rwanda Parliament
Perezida w'Inteko Ishinga Amategeko Umutwe w'abadepite,Mukabalisa Donatille / Ifoto: Rwanda Parliament
Kenneth Roth uyobora Human Right Watch yiswe ‘Imbwa y’Interahamwe’

Inkuru bifitanye isano: Agahinda n’urujijo ku bavuzwe muri Raporo ya Human Rights Watch


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza