Kwamamaza

Huye: Abacuruzi baravugwaho uburiganya mu gutanga inyemezabuguzi ya EBM

Yanditswe kuya 8-11-2016 saa 13:18' na Prudence Kwizera


Abakiriya bagura ibicuruzwa bitandukanye mu mujyi wa Huye baravuga ko binubira amwe mu manyanga akorwa n’abacuruzi iyo babasabye ko babaha inyemezabuguzi y’ibyo bamaze kugura, bityo bagasaba ko inzego zibishinzwe zagira icyo zikora kuri iki kibazo.

Bamwe mu bakiriya baganiriye na IGIHE bavuga ko uburiganya nk’ubwo bukunze gukorwa n’abacururiza mu tubari, amaduka no muri resitora.

Basobanura ko iyo bagerageje gusaba inyemezabuguzi itangwa n’akamashini ka EBM (Electronic Billing Machine), abacuruzi bababwira ko akamashini kabuze rezo, abandi bakavuga ko urupapuro rwashize, hakaba n’abahita bongeza ibiciro.

Umwe mu baguzi witwa Emmanuel Nsengimana, atanga urugero rw’ibyamubayeho ubwo yasabaga inyemezabuguzi ya EBM.

Yagize ati “Nagiye kugura flash disk mu iduka riri hariya mu isoko rya Huye, umucuruzi twumvikana ko muha ibihumbi 3 500, noneho amaze kuyimpa ndamubwira nti ‘ngaho mpa na fagitire ya EBM’, ahita ansubiza ngo ‘niba unsaba fagitire urampa ibihumbi bine’.”

Mahoro Theophile na we avuga ko muri tumwe mu tubari tugaragara mu mujyi wa Huye, hari aho yagiye asaba inyemezabuguzi ya EBM bakamubwira ko bidashoboka ko ayibona akibaza niba koko bamubwije ukuri.

Yagize ati “Hari aho nayisabye bambwira ko “connection” yabuze, akamashini katari gukora ubwo nta kundi ndabishyura ndataha. Hari n’ahandi bambwiye ko urupapuro rwashize batumije urundi kandi ngo rutaraza, nabwo ndishyura ndataha”.

Mu bahahira mu mujyi wa Huye baganiriya na IGIHE, hari abavuga ko abacuruzi bataragira umuco wo kwibwiriza gutanga inyemezabuguzi ya EBM, kuko ngo bategereza ko umukiriya ayisaba bitaba ibyo bakamwihorera.

Abakiriya bamaze kumenya ibyiza byo gusaba inyemezabuguzi ya EBM
Benshi mu bahahira mu mujyi wa Huye baganiriya na IGIHE bagaragaje ko bamaze kumenya ibyiza byo kwaka inyemezabuguzi ya EBM igihe bamaze guhaha.

Clemence Uwamahoro yagize ati “Gusaba fagitire nzi akamaro kabyo, kuko bituma imisoro yinjira mu isanduku ya Leta ikazakoreshwa mu bikorwa by’amajyambere biteza imbere igihugu, nko kubaka amashuri, imihanda, gutera inkunga abakene n’ibindi”.

Gabriel Gasana na we yagize ati “Fagitire bagomba kuyimpa kuko umusoro ninjye uba wawishyuye, umucuruzi atayimpaye yaba yibye igihugu. Ikindi kandi ni uko badushyiriyeho tombola, ku buryo umuntu umusabye iyo fagitire aba afite amahirwe yo gutombora”.

Abacuruzi akora amanyanga bararye bari menge

Emmy Mbera, Umuhuzabikowa w’umushinga wa EBM mu kigo cy’Igihugu cy’imisoro n’Amahoro (RAA), avuga ko umucuruzi wese wanditse ku misoro ku nyongeragaciro mu mirimo ye y’ubucuruzi ategetswe gutanga inyemezabuguzi ya EBM igihe cyose agize icyo agurisha.

Yagize ati “Umucuruzi arasabwa gutanga inyemezabuguzi ku mukiriya wese umugannye atitaye ku giciro cy’igicuruzwa agiye kugurisha, kandi akibwiriza kuyitanga igihe bayimwatse n’igihe batayimwatse. Nta mpamvu rero yo kuvuga ngo nasabwa fagitire arazamura igiciro bari bumvikanye”.

Mbera akomeza avuga ko hari ibihano bitandukanye biteganyirijwe abacuruzi bakora amanyanga mu gutanga inyemezabuguzi ya EBM, akavuga ko babihabwa bijyanye n’uburemere bw’ikosa bakoze.

Yagiriye inama abakiriya ko igihe umucuruzi abimye inyemezabuguzi ya EBM bashobora kureka kugura ibicuruzwa bye bakajya kugurira ahandi, cyangwa bagatanga amakuru ku Kigo cy’Imisoro n’Amahoro.

Isoko rya kijyambere ry'Akarere ka Huye

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved