Huye: Babangamiwe n’ikimpoteri cy’imyanda cyashyizwe hafi y’ingo

Yanditswe na Prudence Kwizera
Kuya 9 Kanama 2017 saa 11:53
Yasuwe :
0 0

Bamwe mu baturage batuye mu kagari ka Sovu, umurenge wa Huye, bavuga ko babangamiwe n’umunuko uturuka mu kimpoteri cy’imyanda cyubatse hafi y’ingo zabo ndetse n’umwanda ukururwa n’amasazi bakaba bafite impungenge z’ubuzima bwabo.

Icyo kimpoteri giherereye mu mudugudu wa Kabagendera cyari kimaze igihe muri ako kagari kitubakiye, ubuyobozi buza kucyubaka ku buryo bugezweho kugira ngo imyanda ibora n’itabora itandukanywe ibyazwe umusaruro urimo ifumbire n’ibicanwa.

Abaturage bavuga cyabahasanze bamaze igihe bahatuye, kandi ko kibabangamiye bakifuza ko bakwimurwa bitaba ibyo kigaterwamo imiti ibarinda umunuko n’amasazi.

Elise Uwimana yagize ati “Iki kimoteri batwegereje ni imbogamizi kuko uroza amasahani ugasanga yuzuyeho isazi, waha umwana ibiryo ukabona yuzuyemo. Umunuko wo uraturembeje kuko kitunukira amanywa n’ijoro”.

Undi muturage witwa Felicien Munyeshyaka ati “Icyo twifuza ni uko batuvana hano hafi yacyo cyangwa bakajya bateramo imiti ibuza umunuko n’amasazi kuza hano mu ngo zacu.”

Umuyobozi w’Akarere ka Huye, Kayiranga Muzuka Eugene, avuga ko kuba umunuko n’amasazi bigera mu ngo z’abaturage biterwa n’amakosa ya Kompanyi ishinzwe gucunga icyo kimpoteri kuko amabwiriza avuga ko bagomba guhita batunganya imyanda yose ihageze.

Muzuka ati “Hari kompanyi twashyizeho ishinzwe gutunganya imyanda iva hirya no hino, ubundi mu mabwiriza bafite ni uko imyanda yose ije bahita bayitunganya kugira ngo itazana umunuko cyangwa isazi. Ibyo byose rero nibyo turi kurwana nabyo, kuko rimwe na rimwe hari ubwo batabyubahiriza”.

Ku kijyanye no kwimura abaturage batuye hafi y’icyo kimpoteri, Kayiranga avuga ko bari kubiteganya mu ngengo y’imari y’umwaka utaha.

Yagize ati “Hari ikibazo cy’abaturage bahaturiye, ni ingo zitari nyinshi, ibyo nabyo twiyemeje ko tuzareba uburyo twabara hariya tukareba n’icyo byadutwara kugira ngo bariya baturage babe bakwimuka turebe ahandi tubashyira kuko byanze bikunze hariya hantu hashobora kuzababangamira. Urebye mu ngengo y’imari y’umwaka utaha ibyo bintu tugomba kubiteganya, byanze bikunze niko bigomba kumera, tugomba gukora uko dushoboye dufatanyije na Kompanyi icunga iriya myanda abantu bakareba uburyo umunuko n’amasazi bidakwiye kuba byinshi hariya hantu”.

Nubwo hari abinubira ko iki kimpoteri kibateza umunuko n’umwanda abatuye mu mujyi bo bishimira ko imyanda iva mu ngo zabo ifite aho ishyirwa ndetse hashyizweho n’uburyo bwo kuyibyaza umusaruro, kuko mbere yajugunywaga mu mujyi rwagati hafi y’isoko, ibintu byari bibabangamiye cyane.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza