Huye: Bari mu gihirahiro nyuma yo gucutswa ku nkunga y’ingoboka

Yanditswe na Kanamugire Emmanuel
Kuya 4 Ugushyingo 2016 saa 11:54
Yasuwe :
0 0

Bamwe mu bageze mu zabukuru bo mu Murenge wa Huye, mu Karere ka Huye bavuga ko bafite impungenge z’imibereho yabo, nyuma yuko bagiye gufata inkunga y’ingoboka bagatungurwa no gusanga barakuwe ku rutonde rw’abayihabwa.

Abo twaganiriye bari mu kigero cy’imyaka iri hagati ya 70 na 80 y’amavuko, bavuga ko inkunga y’ingoboka bari basanzwe bahabwa ariyo yari ibafatiye runini ku buryo hari n’abavuga ko ubwo bayikuweho batazi uko bagiye kubaho.

Umunyamakuru wa IGIHE yasuye imiryango itatu y’abageze mu zabukuru batuye mu Kagari ka Muyogoro, mu Murenge wa Huye, bavuga ko bari basanzwe bafata inkunga y’ingoboka, ariko baje kugwa mu kantu babwiwe ko bakuwe ku rutonde rw’abayihabwa.

Emmanuel Urimubenshi, umusaza w’imyaka 78 y’amavuko na we wakuwe kuri uru rutonde, ntabasha kuvuga kubera ubumuga. Umukecuru babana avuga ko ubuyobozi bwamubwiye ko kumukura ku rutonde byatewe nuko yahatahanye umukobwa ushoboye gukora.

Uyu mukecuru avuga ko uyu mukobwa koko ari uwe ariko atamubyaranye na Urimubenshi, ahubwo bagiye kubana amufite, kandi adashobora kwishingira umuntu utari se. Umukecuru ubwe bigaragara ko ageze mu zabukuru akavuga ko amafaranga ibihumbi 7 500 y’inkunga y’ingoboka ariyo yamufashaga kwita kuri uyu musaza, kuko atakibasha no guhaguruka.

Akomeza avuga ko urugo rwabo rukennye kuko nta sambu yo guhinga ihagije bafite kandi nta n’itungo boroye usibye ihene imwe baragiriye umuturanyi.

Undi mukecuru utuye mu kagari ka Muyogoro avuga ko yagiye gufata ingoboka asanga atakiri ku rutonde kandi ngo atanafite umuntu n’umwe wo kumufasha.

Ati "Naragiye bambwira ko ntakiba mu mashini, mbura uko mbigenza none ubu sinzi uko ngiye kubaho."

Mu gushaka kumenya iby’iki kibazo twagerageje kuvugana n’Umuyobozi w’Akagari ka Muyogoro ntibyadukundira kuko ngo yaba hari ibyo ari gukurikiranwaho na Polisi y’Igihugu.

Umunyamabanga Nshingwabikorwa w’Umurenge wa Huye, Cassien Dukundimana, avuga ko nta kidasanzwe cyabaye, akemeza ko inkunga bahabwa igira amabwiriza.
Ati "Amabwiriza avuga ko iyo nkunga ifatwa n’umuntu utakibashije gukora kandi utanafite undi muntu wamufasha mu mibereho ye isanzwe."

Dukundimana akomeza avuga ko bisanzwe ko hari ubwo umuntu yaba yafataga inkunga y’ingoboka afite abana biga ariko barangiza bakamukura ku rutonde rw’abayihabwa kuko aba abonye abo kumufasha.

Ati "Usanga hari abemera ko bafite abana bakavuga ko badafite akazi ariko bakwiye kumenya ko baba bafite imbaraga zo gukora bityo bagashaka akazi mu mirimo y’amaboko."

Uyu muyobozi ashimangira ko umuntu ufite umwana ugifite imbaraga adashobora kubona inkunga y’ingoboka kuko ngo mu bishingirwaho bamutoranya haba habuzemo icyo kintu kandi kikaba ari ikintu ndenderwaho gikomeye.

Mu karere ka Huye hagaragara bamwe mu bageze mu zabukuru bashinja Ubuyobozi bw’Inzego z’Ibanze kubakura ku rutonde rw’abahabwa inkunga y’ingoboka babaziza ko banze ko bagabana amafaranga y’iyo nkunga.

Ibi babifata nk’akarengane, ariko batinya kubivuga ngo bitabagiraho ingaruka, kuko ngo iyo bamaze gushyirwa ku rutonde bemejwe n’abatuye umudugudu ko bakennye, ubuyobozi ku nzego z’ibanze buza bukababwira ko nibamara gufata amafaranga bazayagabana.

Uyu musaza avuga ko yakuwe ku rutonde rw'abagenerwa inkunga y'ingoboka akaba yibaza uko azabaho mu gihe nta bundi bushobozi afite
Umukecuru na we uvuga ko inkunga y'ingoboka ari yo yari itunze umuryango we, akaba yarayambuwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244