Huye: Bifuza ko bimwe mu bigo bya leta byimuriwe i Kigali byasubizwayo

Yanditswe na Kanamugire Emmanuel
Kuya 1 Ugushyingo 2016 saa 05:19
Yasuwe :
0 0

Kuba Huye yaragizwe umwe mu mijyi itandatu yunganira Kigali, abawutuye basanga byaba byiza ibigo nka Kaminuza y’u Rwanda, NIRDA, RAB, Inzu Ndangamurage n’ibindi bigaruye icyicaro muri aka karere.

Byagarutsweho mu Nteko rusange y’Abanyamuryango ba FPR Inkotanyi bo mu karere ka Huye, yateranye ku Cyumweru tariki ya 30 Ukwakira 2016.

Mu mateka y’u Rwanda, Huye yari izwi nk’igicumbi cy’ibigo bikuru mu burezi n’ubushakashatsi, aho hagaragaraga Kaminuza Nkuru y’u Rwanda, Ikigo cy’Igihugu cy’ubushakashatsi mu by’ubuhinzi (Isar) ubu yabaye RAB, Ikigo cy’Ubushakashatsi ku bumenyi n’ikoranabuhanga (IRST) n’ibindi birimo Inzu Ndangamurage y’u Rwanda.

Kugeza ubu ibi bigo byose byimuriye ibyicaro i Kigali, ibituma benshi mu batuye mu Karere ka Huye bibaza impamvu yabyo, dore ko bavuga ko byatumye umujyi wabo usubira inyuma mu iterambere.

Abanyamuryango ba FPR Inkotanyi bagaragaje ko kuba Huye ifite umujyi ujyanye n’uburezi ndetse n’ubushakashatsi, byagakwiye ko higwa uburyo icyicaro gikuru cya Kaminuza y’u Rwanda n’ibindi bigo by’ubushakashatsi byagarurwa.

Albert Rutayisire yagize ati “Iterambere ryacu n’iry’umujyi wacu ryarahungabanye kubera ko biriya bigo babijyanye i Kigali, tukaba twifuza ko byagaruka kuko natwe dukeneye iterambere”.

Pascal Sahundwa nawe yagize ati “Ni ukuvuga ngo hari ibigo birimo RAB, IRST, n’ibindi, nta mpamvu yuko bijya kure, ahubwo uko byagombye kugenda, ibigo bimwe bitewe n’imiterere yabyo bikwiye kugira ibyicaro mu Ntara”.

Ibi bigo ngo biramutse bifite icyicaro mu Ntara byafasha muri gahunda yo guteza imbere imijyi yunganira Kigali, bityo bakifuza ko iyi ngingo yakwigwaho n’inzego zibishinzwe by’umwihariko.

Kayiranga Muzuka Eugene, Umuyobozi w’Akarere ka Huye, yavuze ko bikwiye ko Huye nk’umujyi wa Kabiri ugira ibikorwaremezo bikomeye, bityo ibyifuzo by’abanyamuryo bikaba bigiye koherezwa ku rwego rw’Igihugu kugira ngo bifatweho umwanzuro.

Yagize ati “Huye nk’umujyi wa kabiri yagombye gushingira ku Burezi, Ubukerarugendo na Serivisi, ibyo rero nibyo byifujwe ko byashyirwa muri manifesito yacu bigashyirwamo imbaraga, umujyi wacu ugakomeza kuba umujyi wa kabiri nk’uko byifuzwa kandi byanemejwe”.

“Usinya niwe usinyura ibyo bigo bishobora kugarurwa”

Umuyobozi w’Ikigo cy’Igihugu cy’Imiyoborere mu Rwanda RGB, Prof. Shyaka Anastase, ubwo yagiranaga ibiganiro n’abikorera mu Karere ka Huye tariki ya 16 Ukwakira 2015 yabijeje ko ibyo bigo bishobora kugaruka bigasubira ku isoko, biramutse bigaragaye ko kwimurwa kwabyo bigira uruhare mu gusubiza inyuma iterambere ry’umujyi wa Huye.

Yagize ati “Bigaragaye ko igicumbi cy’ibyo bigo kibaye muri Huye igihugu cyakunguka inshuro eshatu […], usinya ni na we usinyura, wa wundi wasinye ngo bigende azasinya bigaruke, nta wabitindaho kuko ntabwo byagiye i Kigali kugira ngo duhombe; ibyo abantu babiganiraho”.

Ikindi abanye-Huye bagaragaza gishobora gutuma imijyi ifatwa nk’iya kabiri idatera imbere, ni kuba inama ndetse n’imikino mpuzamahanga bibera mu Rwanda bishyirwa mu mujyi wa Kigali gusa, aho bifuza ko byajya bijyanwa no mu ntara bikazifasha kuzamura iterambere.

Muri gahunda y’imbaturabukungu (EDPRS II ), biteganyijwe ko imijyi nka Huye, Musanze, Muhanga, Nyagatare, Rubavu na Rusizi igomba gutezwa imbere ikaba imijyi iri hejuru kandi y’ishoramari yunganira Kigali.

Bamwe bakaba babona ko kuvana ibigo bikomeye muri Huye bikajyanwa i Kigali ari nko kuvuguruza iyo gahunda.

Kayiranga Muzuka Eugene, Umuyobozi w'Akarere ka Huye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza