Kwamamaza

Huye: Icyarabu cyafatiwe umwanzuro bamwe bise ‘umuti ushaririye’

Yanditswe kuya 22-11-2016 saa 11:59' na Prudence Kwizera


Nyuma y’igihe kirenga imyaka itandatu Ubuyobozi bw’Akarere ka Huye bufunze inzu ziri mu mujyi wa Huye ahazwi nko mu Cyarabu, aho bwari bwumvikanye na banyirazo kuvugurura bakubaka amagorofa, ariko bikaba bigaragara ko nta cyakozwe, kuri ubu hafashwe umwanzuro bamwe mu bahafite amazu bise ‘umuti ushaririye’.

Uyu mwanzuro wafashwe wemeza ko umuntu wese uhafite inzu atagomba kurenza tariki ya 21 Ukuboza 2016, ataratangira kuvugurura.

Mu nama yabereye mu Karere ka Huye kuri uyu wa Mbere tariki ya 21 Ugushyingo 2016, yahuje Guverineri w’Intara y’Amajyepfo Marie Rose Mureshyankwano, Ubuyobozi bw’Akarere ka Huye n’abafite inzu mu Cyarabu, ko uzarenza iyi tariki ataratangira imirimo, azahabwa ingurane n’Akarere ka Huye akimuka,kakahaha Rwiyemezamirimo ufite ubushobozi akahubaka inzu zijyanye n’igihe.

Umuyobozi w’Akarere ka Huye, Kayiranga Muzuka Eugene, yagaragaje ko kuva mu mwaka wa 2008 hakozwe inama nyinshi zigamije kureba uko Icyarabu cyavugururwa, ariko abagomba kubishyira mu bikorwa ntibabikore uko bikwiye.

Muzuka yagize ati “Tumaze gukora inama nyinshi, mbere yo gufunga mu Cyarabu twarabanje turaganira, hari abatangaga umwaka, hari n’abatangaga amezi atandatu, hari n’abatangaga atatu, barabyibuka uko twagendaga tuganira, ariko wa mwaka washira ukabona birabananiye, bati ‘nimutwongere amezi atatu’, nayo tukayabaha, nta numwe twongereye munsi y’inshuro ebyiri, kugeza ubwo tuvuze tuti ‘kuva 2008 tugenda twongera, twongera, tuzageza ryari?’”

Gutanga ibitekerezo byabanje kugorana

Ubwo Guverineri w’Intara y’Amajyepfo yasabaga ko abitabiriye inama by’umwihariko abafite inzu mu Cyarabu, batanga ibitekerezo ku cyatuma havugururwa vuba, abenshi bifashe ntibagira icyo bavuga, kugeza ubwo hafashwe umwanzuro ko bagiye guhera ku murongo buri wese agahabwa ijambo.

Icyarabu kimaze igihe kinini gifunze byatumye gihinduka nk'amatongo

Abavuze bagaragaje imbogamizi bahuye na zo zituma batavugurura, zirimo ubushobozi bucye, kuba inzu zo hejuru mu igorofa zitabona abazikodesha, gucika intege zuko abafite inyubako z’amagorofa mu mu mujyi wa Huye bababwira ko babuze ubwishyu bw’inguzanyo bafashe muri banki n’izindi.

Gusa ubuyobozi bwabasabye ko ikigamijwe ari ukurebera hamwe icyakihutisha kuvugurura Icyarabu, iby’imbogamizi bakabireka, kuko hashize igihe kirenga imyaka itandatu ibisabwa biri mu magambo gusa.

Abafite inzu mu Cyarabu bagaragaye mu nama ni mbarwa

Ubwo Guverineri w’Intara y’Amajyepfo, Marie Rose Mureshyankwano, yabazaga impamvu ba nyiri inzu batari gutanga ibitekerezo, byaje kugaragara ko abenshi mu bafite inzu mu Cyarabu batitabiriye inama, ahubwo bohereje ababahagarariye.

Abo babahagarariye batanze ibitekerezo byabo birumvwa, ari nabyo byaje gufatwaho umwanzuro w’inama, wo kuvugurura Icyarabu mu gihe gito gishoboka.

Guverineri Mureshyankwano yavuze ko yasanze abafite inzu mu Cyarabu bari mu byiciro bitatu.

Icyiciro cya mbere kirimo abafite ubushake bwo kuvugurura inzu zabo kandi banabitangiye, icya kabiri kikaba kigizwe n’abafite ingamba zifatika kandi berekana uko bagiye guhita batangira kuvugurura, mu gihe icya gatatu kirimo abataragize icyo bakora ahubwo bahora basaba kongererwa igihe gusa.

Imiterere y'izi nzu zo mu Cyarabu ngo yangiza isura y'Umujyi wa Huye

Nyuma yaho hafashwe umwanzuro wemeza ko mu gihe cy’ukwezi kumwe, ni ukuvuga kuva tariki ya 21 Ugushyingo, kugeza kuya 21 Ukuboza 2016, umuntu ufite inzu mu Cyarabu uzaba ataratangira kuvugurura, Akarere kazamubarira imitungo ye ihari akimurwa.

Icyo gihe ngo Akarere ka Huye kazabishyira mu ngengo y’imari, mu Cyarabu kahagure nyuma kahahe ba Rwiyemezamirimo bafite ubushobozi bahubake inzu zijyanye n’igishushanyo mbonera cy’Umujyi wa Huye.

Bamwe bumvise umwanzuro bitsa imitima

Nyuma yuko Guverineri avuze ko uyu mwanzuro ariwo ufashwe, bamwe mu bari mu nama bikije imitima, maze abasaba ko bawutorera, ariko biza kugaragara ko bose babyemeye usibye umuntu umwe wavuze ko yifashe.

Nyuma y’iyo nama Guverineri Mureshyankwano yaganiriye n’Itangazamakuru, yongera gushimangira ko ikigamijwe ari uguteza imbere umujyi wa Huye ukajyana n’icyerekezo, nk’uko n’ubundi yari yabanje kubibwira abari bitabiriye inama igitangira.

Kuba izi nzu zidakorerwamo hari abavuga ko bibakururira abajura bazihishamo

Guverineri Mureshyankwano yongeye gushimangira umwanzuro wafashwe, avuga ko hagiye no gushyirwaho itsinda rizakora ubugenzuzi.

Yagize ati “Umwanzuro inama ifashe, ni uko dutanze igihe cy’ukwezi kumwe, bakaba bakuyeho inzu zishaje batangiye gushyiraho izijyanye n’igihe, hanyuma ukwezi kwarangira, twumvikanye ko dushyiraho itsinda rizaza kureba aho bigeze, abo tuzasanga baratangiye nta kibazo bazakomeza bubake, abo tuzasanga byananiye burundu,(…) Akarere kazashaka amafaranga kabahe ingurane ikwiye, hanyuma bajye gushaka ahandi bashyira ibikorwa byabo, ibibanza bazaba bavuyemo bisigare ari iby’AKarere, noneho igihe hazajya haboneka abikorera babigure, ya mafaranga Akarere kazaba kasohoye kayabone.”

Bamwe bati ni ‘Uyu mwanzuro ni umuti ushaririye’

Bamwe mubafite inzu mu Cyarabu, nyuma yo gusohoka mu nama babwiye IGIHE ko umwanzuro ufatiwemo bawishimiye kandi bazagerageza kuwubahiriza, ariko bavuga ko ari ‘umuti ushaririye, kandi ari wo uvura’.

Eustache Mudatsikira, uhagararie umwe mu bafite inzu mu Cyarabu ati “Mu by’ukuri ni umwanzuro ukomeye, kuko iminsi 30 ni mikeya, irabarirwa ku ntoki, ariko nkuko bisanzwe burya ‘umuti uvura ni usharira’, uragusharirira ariko ukawunywa kandi ukagukiza indwara.Wavunitse ugashaka ko umuntu akanda buhoro buhoro burya iyo mvune ntiyazakira, (…) uyu mwanzuro uko byamera kose ugomba kujya mu bikorwa”.

Aphrodis Misago, umwe mu babashije kubaka inzu mu mujyi wa Huye kandi ijyanye n’igihe, we avuga ko yishimiye umwanzuro wafashwe.

Ati “Cyane cyane, njyewe nishimiye ko iyi nama ifashe umwanzuro wari ngombwa, kuko ikibazo cy’inzu zifunze mu Cyarabu cyari kimaze gutera umwanda mu mujyi wacu, (…) kuko inzu barazifunze mu gikari hakabamo abantu ba ‘Mayibobo’ badafite ubushobozi, habamo abajura, (…) nkumva rero ko iki cyemezo bafashe kituganisha heza”.

Guverineri Mureshyankwano yabwiye abanye-Huye ko bakwiye guhindura imyumvire ntibumve ko bazakomeza gukorera mu nzu zishaje batavugurura, kuko umujyi wa Huye ufatwa nk’umwe muya kabiri yunganira Kigali, ugomba kugira icyerekezo cyiza.

Gahunda y’imbaturabukungu igamije kurwanya ubukene mu Rwanda (EDPRS 2), iteganya ko imijyi ya Huye, Musanze, Muhanga, Rubavu, Nyagatare na Rusizi igomba kuba imijyi iri hejuru kandi y’ishoramari, bityo igomba kugira ibikorwa remezo bijyanye n’igihe.

Inkuru bifitanye isano: Huye: Amezi atandatu yo kuvugurura mu ‘Cyarabu’, abaye imyaka y’amagambo gusa

Guverineri w'Intara y'Amajyepfo, Marie Rose Mureshyankwano yasabye ko bitarenze ukwezi kumwe abafite inzu mu Cyarabu bagomba kuba batangiye kuzivugurura
Imyanzuro yafatiwe muri iyi nama hari abayigereranyije n'umuti usharira

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved