Kwamamaza

Huye Mountain Coffee yabaye ishuri ry’inganda zitunganya Kawa mu Rwanda

Yanditswe kuya 17-10-2016 saa 22:23' na Kwizera Prudence


Abashoramari 65 bafite inganda zitunganya Kawa baturutse mu turere twose tw’Igihugu bakoreye urugendoshuri mu Karere ka Huye kureba ibanga uruganda ‘Huye Mountain Coffee’ rukoresha kugira ngo Kawa rutunganya ihige izindi zose mu Rwanda no muri Afurika.

Ni urugendoshuri rwateguwe n’Ikigo Rwanda Trading Company gishinzwe gutunganya Kawa y’u Rwanda kikanayicuruza mu mahanga, kugira ngo abayitunganya hirya no hino mu gihugu babashe kuzamura ubwiza bwayo.

Umuyobozi ushinzwe kugenzura ibikorwa(Operations Manager) muri Rwanda Trading Company, Jean Jack Ndayisenga, avuga ko bateguye urugendoshuri ku bafite inganda zitunganya Kawa kugira ngo banoze imikorere.

Ati “Dufite abanyenganda dukorana na bo, ni abafatanyabikorwa, tuba dushaka kugira ngo tubigishe uburyo bwiza bwo gutunganya Kawa baguze mu baturage kugira ngo izagire ubwiza buhagije, kuko ari cyo gituma tuyigurisha neza noneho inyungu ikaboneka.”

Kuki bahisemo kuza kwigira kuri Huye Mountain Coffee?

Ndayisenga avuga ko Rwanda Trading Company imaze imyaka igera kuri irindwi ikorana n’Uruganda rutunganya Kawa mu Karere ka Huye (Huye Mountain Coffee), kandi babonye ari uruganda rufite byinshi rwakigisha abandi, bityo bahitamo ko babazana kuhakorera urugendoshuri.

Ati “Huye Montain ni uruganda tumaze igihe kinini dukorana kuva muri 2010, ni uruganda rwagaragaje imikorere myiza no kwitwara neza, bigaragara ko nyirarwo afite icyerekezo, tukaba twarabonye ko ari urugero rwiza abandi bose bakwiye kwigiraho”.

Bimwe mu byo Ndayisenga yavuze byatumye bazana abandi banyenganda kwigira kuri Huye Mountain Coffee, harimo uburyo uruganda rukora, imikoranire n’abahinzi, uko nyirarwo akorana n’abafatanyabikorwa, ndetse n’ibanga rukoresha mu kugira Kawa iryoshye.

Yagize ati “Turagira ngo barebe imikorere ye (Umuyobozi wa Huye Mountain Coffee), uburyo akorana n’abaturage n’abandi bafatanyabikorwa be, noneho bakaba bagerageza gutera ikirenge mu cye”.

Bageze aho Huye Mountain coffee ikorera babaye nk’abanyeshuri imbere ya mwarimu

Abanyenganda zitunganya Kawa bo mu turere dutandukanye tw’Igihugu ubwo bageraga ahakorera Huye Mountain Coffee ku wa 13 Ukwakira 2016, basuye ibice bitandukanye ari na ko basobanurirwa imikorere y’uruganda.

Umuyobozi Mukuru wa Huye Mountain Coffee, David Rubanzangabo, afatanyije n’abandi bakozi b’uruganda basobanuriye Abanyenganda imikorere yabo.

Yabanje kubigisha uburyo uruganda rukorana n’abahinzi ba Kawa ndetse n’uburyo bababumbiye hamwe mu matsinda kugira ngo Kawa bahinga ibagirire akamaro.

Rubanzangabo yababwiye ko uburyohe bwa Kawa n’ubwiza bwayo bihera mu murima aho umuhinzi ayitaho igakura neza.

Yavuze ko begera abahinzi bagakorana umunsi ku wundi, bakabigisha uburyo bita kuri kawa, uko bayirinda ibyonnnyi ndetse bakumva n’ibibazo bafite bagafatanya kubikemura.

Uyu muyobozi yakomeje abasobanurira uburyo kawa isarurwa, uburyo itunganyirizwa mu ruganda n’uko ishyirwa mu byiciro, ubundi ikajyanwa ku isoko.

Abanyenganda bavuga ko bize byinshi

Bamwe muri aba banyenganda baganiriye na IGIHE, bavuga ko nyuma yo kubona imikorere ya Huye Mountain Coffee bungutse byinshi bakaba bagiye kuvugurura imikorere yabo.

Jean Claude Mugabo waturutse mu Karere ka Gatsibo ati “Ikintu nigiye aha twe twakoragamo amakosa ni uko twihutiraga kwakira umusaruro mwinshi tutitaye ku bwiza bwawo n’aho waturutse. Ikindi tugiye guhindura ni ukwegera abahinzi tugatangira gukorana na bo Kawa ikiri mu murima kugeza igeze ku ruganda. Ikindi cyambereye isomo ni uburyo amafaranga ufashe y’inguzanyo ugomba kuyakoresha icyo wayasabiye utavanzemo ibindi”.

Agnes Mukamushayija waturutse muri Gicumbi ati “Jyewe nza hano numvaga mfite amatsiko menshi yo kumenya uko Rubanzangabo akora, kuko nagize amahirwe yo kujyana na we mu Buyapani nsanga yarahubatse izina rikomeye cyane. Kawa atunganya irakunzwe cyane muri kiriya gihugu. Amatsiko rero yashize kuko yadusobanuriye byose.”

Yakomeje agira ati “Icya mbere namwigiyeho, nasanze ari umuntu ufite gahunda, azi aho ava n’aho ajya, ikindi ni ugukora inyigo ihagije y’ibikorwa, kandi nkirinda gucika intege, ahubwo nkareba ahari intege nke mu mikorere nkahongera ingufu”.

Abanyenganda kandi bahuriza ku miyoborere ya Huye Mountain Coffee, aho ubuyobozi bukurikirana abakozi mu mashami atandukanye, ku buryo iyo Kawa igize ikibazo bamenya aho cyabereye.

Umuyobozi Mukuru wa Huye Mountain Coffee yavuze ko kuba abanyenganda baza kubigiraho ari ishema kuri bo kandi bibatera imbaraga n’umurava wo gukomeza gukora ibyiza kandi bagahora ari aba mbere.

Ubuyobozi bwa Rwanda Trading Company buvuga ko kugeza ubu mu gihugu hose bakorana n’inganda 70 zituganya kawa.

Abagera kuri 65 bakoze urugendoshuri ngo bitezweho umusaruro ukomeye wo kuvugurura imikorere yabo, bizatuma Kawa y’u Rwanda igira uburyohe, ikagura isoko hirya no hino mu mahanga.

Abanyenganda baturutse mu bice bitandukanye by'igihugu basobanuriwe imikorere y'uruganda, Huye Mountain Coffee
Umuyobozi ushinzwe kugenzura ibikorwa muri Rwanda Trading Company, Jean Jack Ndayisenga, avuga ko abanyenganda hari byinshi bakwigira kuri Huye Mountain Coffee
Umuyobozi Mukuru wa Huye Mountain Coffee, David Rubanzangabo asobanura imikorere y'uruganda
Abanyenganda batambagijwe ibice bitandukanye bya Huye Mountain Coffee
Abanyenganda bahawe amasomo ahagije ajyanye no gutunganya Kawa

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved