IGIHE.com > Amakuru > U Rwanda
Huye : Umunyeshuri yarakubiswe arahungabana, bimuviramo kugana iy’ibitaro

Huye : Umunyeshuri yarakubiswe arahungabana, bimuviramo kugana iy’ibitaro


Yanditswe kuya 1er-06-2013 - Saa 12:02' na H. Joseph Curio

Umunyeshuri witwa Kankuyo Marie Jeanne wiga mu ishuri ryisumbuye rya Mutagatifu Jean Bosco Simbi, mu karere ka Huye, ubu arwariye mu bitaro bya Kabutare, nyuma yo gukubitwa n’umuyobozi w’ikigo yigamo bikamuviramo ihungabana.

Kankuyo Marie Jeanne afite imyaka 21 yiga mu mwaka wa gatandatu, ishami ry’Imibare, Ubukungu n’Ubumenyi bw’Isi (MEG). Kuva ku wa Gatanu tariki ya 25 Gicurasi 2013 ari mu bitaro bya Kabutare. Bitangazwa ko yakubiswe n’umuyobozi w’ikigo yigamo mbere ho icyumweru, bimuviramo guhungabana.

Nk’uko Jean Paul Rukema, ufite imyaka 25, akaba musaza wa Kankuyo yabitangarije IGIHE, ngo saa saba z’ijoro ryo ku itariki ya 18 Gicurasi 2013 Umuyobozi w’Ishuri ryitiriwe Mutagatifu Jean Bosco yatumye umuyobozi w’abakobwa (Animatrice/Matron) kumuzanira Kankuyo mu biro bye. Rukema avuga ko yamukubise amuhora ko yari yagiye gutegura ubukwe bw’abantu bafitanye inzigo n’uwo muyobozi nyamara ngo yari yabahaye uruhushya.

Rukema avuga ko yabajije abanyeshuri bajyanye na Kankuyo bakamubwira ko umuyobozi w’ikigo yari yabahaye uruhushya mu magambo ngo bajye gutegura ubukwe bw’uwahoze ari aumuyobozi wabo, utuye hafi y’ikigo, wari kurongorwa ku itariki ya 18 Gicurasi bukeye bwaho.

Abo banyenshuri ngo bagarutse mu ma saa tatu n’igice z’ijoro z’itariki ya 17 Gicurasi bagarukana na bamwe mu barimu babo ndetse n’umuyobozi wabo mushya.

Abanyeshuri Rukema yabajije bamubwiye ko uwo muyobozi yamukubise inkoni nini, abandi bakavuga umukoropesho mu gihe umuyobozi w’abakobwa we yamubwiye akanyafu.

Amaze gukubitwa, Kankuyo Marie Jeanne yasubiye aho arara abibwira mugenzi we bararana ariko amusaba kubiceceka kuko ngo iyo bimenyekanye bitera igisebo mu bandi banyeshuri muri icyo kigo.

Mu gitondo cyo ku wa gatandatu tariki ya 18 Gicurasi, Umuyobozi w’ikigo yaje gusaba imbabazi Kankuyo amubwira ko ibyo yakoze yahubutse, ariko noneho amuhaye uruhushya ngo atahe ubukwe. Yagiye muri ubwo bukwe ariko atangira kugenda agaragaza kutavuga nk’uko bisanzwe nk’uko musaza we abivuga.

Rukema avuga ko Kankuyo Marie Jeanne akiri muto bigeze kumutera inshinge nyinshi zamugizeho ingaruka kugeza ubu. Ku wa Mbere Kankuyo yagiye mu ishuri nk’uko bisanzwe ariko ngo kwicara bikamubabaza cyane, bigatuma asohoka buri kanya. Bagenzi be n’abarimu bakomeje kumubaza impamvu ariko akabihorera. Yamaze icyumweru cyose ameze atyo kugeza ku wa Kane tariki ya 23 Gicurasi ubwo Kankuyo yacecekaga burundu, ntavuge, ntarye, ntananywe.

Kuwa Gatanu tariki ya 24 Gicurasi, bamujyanye ku ivuriro ry’icyo kigo rikorwamo n’ababikira. Ibimenyetso bye bari ukuvuga amagambo yabwiye Cadette bararana akimara gukubitwa. Ati “Diregiteri yankubise, aranyihakana ko yampaye agahushya. Cade, urankarabya ?!’’

Umwarimu uziranye na Rukema yamuhamagaye ku wa Gatanu amubwira ko mushiki we arwaye cyane ariko Rukema ajyayo kuwa Gatandatu. Yasanze bwamwandikiye kumwohereza ku bindi bitaro (transfer) ariko umuyobozi w’ikigo yanga ko bahita bamwohereza. Saa kumi n’imwe ni bwo imbangukiragutabara yaje kumujyana ku bitaro bya Kabutare.

Rukema avuga ko kugeza ubu Kankuyo arimo koroherwa ariko adashobora kuvuga. Ngo yavuganye n’umuganga umukurikirana amubwira ko afite ibimenyetso byo guhungabana.

Uwahoze ari umuyobozi w’abakobwa wari gukora ubukwe, na we yatwemereye ko yari yamusabiye uruhushya mbere, y’umuyobozi w’ikigo akarubaha. Ariko uwahoze ari animatirise we yatubwiye ko Kankuyo ari we munyeshuri wenyine wajyiyeyo uwo munsi, gusa yemeza ko animatirise mushya bari kumwe ndetse n’abandi barezi, ari nabo basubiranye mu kigo.

Tuvugana na muganga ukurikirana Kankuyo mu bitaro bya Kabutare yatubwiye ko amufite koko ariko yatwemereye kuduha andi makuru nyuma.

Iki kibazo bakigejeje ku buyobozi bwa polisi mu karere ka Huye, ndetse ngo n’ubuyobozi bw’akarere bwaba bubizi.

Umuyobozi w’akarere ka Huye Kayiranga Muzuka Eugene yabwiye IGIHE ko bo nk’akarere ikibazo bagishyize mu maboko ya Polisi kandi ngo irimo kugikurikirana.

Turacyagerageza kuvugana n’inzego za polisi muri aka karere, ndetse n’umuyobozi w’Ishuri n’uw’abakobwa mushya.

Amafoto ya Kankuyo Marie Jeanne

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO