I Bugarama, Meya wa Rusizi ati ‘umutarage azasonza ariko ntabwo azagira inzara’

Yanditswe na Mathias Hitimana
Kuya 11 Mutarama 2017 saa 12:56
Yasuwe :
0 0

Abaturage bo mu mirenge ihinga mu kibaya cya Bugarama bahuye n’uruzuba rwacanye kuva mu Kwakira 2016 kugeza ubu, biri gutuma Umuyobozi w’Akarere ka Rusizi abona ko bazasonza nubwo atabyita inzara.

Ikibaya cya Bugarama cya hegitare 1500 gihuriweho n’imirenge itanu, Bugarama, Muganza , Nyakabuye , Gikundamvura, gifatwa nk’ikigega cy’imyaka itunga Rusizi n n’ibihugu by’abaturanyi birimo Repebulika iharanira Demokarasi ya Congo (RDC ) kubera umusaruro gitanga ariko ubu abaturage bahangayikishijwe n’ukuntu imyaka yose yumye.

Imyaka yera muri iki kibaya irimo umuceri, ibigori , ibishyimbo ariko ngo nyuma yo gutera imbuto hegitare zimwe zarumye, kuko imvura yahise ibura kuva mu Ukwakira 2016.

Abaturage baganiriye na IGIHE bavuze ko biteze inzara mu gihe kiri mbere.

Maniraguha Laurence yagize ati “Nahinze ubunyobwa hariya bwarumye …. aha hose ubona gutya byarumye, izuba rikuraho umwanda wakubitamo umwambi umuriro ukaka.”

Umuhinzi Hakizumwami Pie yunzemo ati “Iki kibazo ukuntu kimeze guhera mu kwizi kwa 10 dutangiye gutera ibigori hagwaga akavura gake gake biramera imvura ihita icika, nta mutonyi wongeye kugera hasi n’ibyameze ni ukubera ubukonje bwo hasi, Iyi saha tuba turi gukubita ibishyimbo turya n’ibigori ubu dutegereje kuribwa n’inzara nta kundi.”

Ibyo ni ibigori byishwe n'izuba (Ifoto/Sitio Ndoli)

Umuyobozi w’Aakarere ka Rusizi, Harerimana Frederic, mu kiganiro n’itangazamakuru yavuze ko bitazateza ikibazo cy’inzara, ariko ko hazabaho guhungabana kuw’ibitunga abaturage.

Yagzie ati “Nibyo umuturage azasonza ariko ntabwo azagira inzara kuko inzara ni ikintu gikomeye kiba cyarenze igaruro, ariko uyu muturage kuba niba yari afite hegitare imwe y’ibishyimbo ntabwo azasarura kuri ya hegitare.”

Yakomje agaragaza ko ikihutirwa cyaba ari ugushakira aba baturage ubwunganizi bw’ibiribwa.

Yagize ati “Ni ukuvuga ngo uwamufasha kubona ibyo arya, nawe se mu bundi bushobozi yarasanganykwe ashobora kugira icyo yakora, ni n’amahire bari muri koperative, irabagoboka , ubuyobozi tukabagoboka ariko ntabwo twavuga ko hari inzara cyane ko ubundi mu muco nyarwanda uwahinze, uwejeje asanzwe asagura, cyangwa se ntabwo abaturage bose batunzwe n’umwuga w’ubuhinzi gusa, uwahuye n’iki kibazo yahungabana ariko ntabwo twavuga ngo hari inzara igiye kubaho mu Bugarama.”

Akomeza avuga ko ubu bafashe ingamba zo kurwanya icyo kibazo, bamenyesha abaturage amakuru y’iteganyigihe, gukomeza gushyira ingufu mu kuhira bifashishije amazi yo mu migezi n’ibindi.

Hegitari 541 z’ibigori, hegitare 80 z’ibishyimbo na hegitari 40 z’umuceri zabuze amazi mu kibaya cya Bugarama ku buryo nta musaruro uzavamo, aho hakaba kandi ahahingwa mu giterane hatabariwemo abahinze ku giti cyabo.

Abatuye ikibaya cya Bugarama biteze gusonza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza