Kwamamaza

I Kigali hatangiye inama ku mihindagurikire y’ikirere izitabirwa na John Kerry

Yanditswe kuya 11-10-2016 saa 07:48' na IGIHE


Abahagarariye ibihugu bisaga 200 bateraniye i Kigali mu Rwanda mu nama ya 28 y’Ibihugu byasinye Amasezerano Mpuzamahanga ya Montreal ajyanye no kurengera akayunguruzo k’imirasire y’izuba.

Iyi nama izitabirwa n’Umunyamabanga wa Leta Zunze Ubumwe za Amerika, John Kerry, izafata icyemezo gikomeye mu guhangana n’ingaruka z’imihindagurikire y’ikirere kuva hakemezwa Amasezerano ya Paris: ivugururwa ry’Amasezerano ya Montreal.

Iri vugururwa ry’Amasezerano ya Montreal riramutse ryemejwe ryaca burundu ikora n’ikoreshwa ry’imyuka izwi nka “hydrofluorocarbons” yifashishwa mu byuma bikonjesha ariko ikaba ifite ubukana bukabije mu kuzamura urugero rw’ubushyuhe bw’isi.

Mu gihe aya masezerano yavugururwa, abatuye Isi baba birinze izamuka ry’ubushyuhe ringana na 0.5°C mbere y’uko iki kinyejana kirangira. Ibi kandi byanagabanya hagati ya toni 100 na 200 z’imyuka ihumanya ikirere izwi nka “carbones” bitarenze umwaka wa 2050.

Mbere y’ishyirwa mu bikorwa ry’Amasezerano ya Paris rizatangira tariki 4 Ugushyingo 2016. Inama y’i Kigali ni amahirwe ku Muryango Mpuzamahanga yo gutera indi ntambwe mu gufata ingamba zo guhangana n’ingaruka z’imihindagurikire y’ibihe, bemeza ivugururwa ry’Amasezerano ya Montreal.

Ibi bikozwe byarinda izamuka ry’ubushyuhe bw’isi ho dogere 1.5°C – imwe mu ntego y’ingenzi y’Amasezerano ya Paris kandi ikaba inashyigikiwe n’ibihugu byibasiwe n’ingaruka z’imihindagurikire y’ibihe birimo n’u Rwanda.

Mu minsi itatu iri imbere, abahagarariye ibihugu byashyize umukono ku Masezerano ya Montreal bazaganira ku ivugururwa ry’aya Masezerano.

Ibizibandwaho ni ukwemeranya ku nyandiko y’Amasezerano avuguruye, kumvikana ku ngengabihe y’ibikorwa bizaba biteganyijwe muri aya Masezerano, igihe ikoreshwa ry’imyuka ya ‘Hydrofluorocarbons’ rizahagarikwa burundu, ibyo ibihugu bizasabwa mu kugabanya iyi myuka ndetse n’uburyo bwo kubona amafaranga yo gushyira mu bikorwa iyi gahunda.

Ibihugu birenga 100 byagaragaje ko bishyigikiye kuvugurura aya masezerano. Mu biganiro byabaye mu minsi mike ishize, ibihugu byemeranyijwe gushyiraho itsinda ry’abanyamategeko risuzuma inyandiko y’ibanze y’ivugururwa ry’Amasezerano ya Montreal.

Iyi ikaba ari intambwe ikomeye kandi itanga icyizere ko Amasezerano ya Montreal avuguruye azemezwa mbere y’uko iyi nama irangira kuri uyu wa Gatanu.

Atangiza iyi nama uyu munsi, Minisitiri w’Umutungo Kamere, Dr. Vincent Biruta yagarutse ku kamaro ko guhurira hamwe, hagashyirwaho amasezerano rusange buri wese yakwishimira.

Minisitiri Biruta yagize ati “Duhuriye hano i Kigali dufite intego imwe yo kwemeza ivugururwa ry’Amasezerano ya Montreal hagamijwe guhagarika ikoreshwa ry’imyuka ya hydrofluorocarbons.”

“Dufite amahirwe adasanzwe yo gushyigikira iki gikorwa cyiza no kongera imbaraga mu kubungabunga ikirere, dufasha abaturage bacu kugira ngo bagire ejo hazaza habakwiye. Kuvugurura aya Masezerano ya Montreal ni ngombwa mu kwita ku buzima bw’isi n’abayituye ndetse ni n’ifatiro mu gushimangira ingamba zo guhangana n’imihindagurikire y’ibihe.”

“Ndashishikariza abitabiriye iyi nama bose gushyigikira ibiganiro no gukomeza kugaragaza ubufatanye bwakomeje kuranga abashyize umukono ku Masezerano ya Montreal.”

Mu izina ry’abateguye iyi nama, Umunyamabanga Nshingwabikorwa w’Ubunyamabanga bushinzwe kurengera akayunguruzo k’imirasire y’izuba mu Ishami ry’Umuryango w’Abibumbye ryita ku bidukikije (UNEP), Tina Birmpili yagize ati:

“Iyi nama iduhurije i Kigali ni amateka akomeye kuri twe abayitabiriye. Iki ni kimwe mu bishishikaje isi kugira ngo hacibwe burundu imyuka yongera ubushyuhe bw’isi izwi nka HFCs . Kugira ngo ibi bigerweho, birasaba ko ibihugu byateye imbere bifasha ibikiri mu nzira y’amajyambere guhindura ikoreshwa ry’iyi myuka. Ibi kandi bigomba kugendana no kongera imbaraga mu gushyigikira iterambere ritangiza ibidukikije, inganda zigateza imbere ikoranabuhanga ridasesagura ingufu ndetse hakanongerwa imbaraga mu guhanga udushya. Iyi ntsinzi, ni mwebwe tuyitegerejeho, muri iki cyumweru cy’ibiganiro bigamije kuvugurura Amasezerano ya Montreal.”

Icyiciro gitegura Inama y’Ivugururwa ry’Amasezerano kizakurikirwa n’Icyiciro cy’Urwego rwo Hejuru rurimo abayobozi bo ku rwego rw’Abaminisitiri n’Ababandi bayobozi mu nzego nkuru z’ibihugu bazaganira ku bibazo bitandukanye, kandi koi bi biganiro bizasozwa no gushyira umukono ku Masezerano ya Montreal avuguruye.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved