Kwamamaza

I&M Bank yafunguye ishami rishya mu nyubako ya CHIC

Yanditswe kuya 7-10-2016 saa 11:00' na Niyonsenga Schadrack


Mu rwego rwo kurushaho kwegera no kuzirikana abakiriya bayo, by’umwihariko mu cyumweru cyabahariwe ku Isi yose, I&M Bank yafunguye ishami rishya mu nyubako y’ubucuruzi ya CHIC (Champion Investment Corporation) iherereye mu Mujyi wa Kigali.

Iki gikorwa cyabaye kuri uyu wa Kane tariki ya 6 Ukwakira 2016, cyahuriranye n’isozwa rya poromosiyo “KIRA" iyi banki yari imaze amezi atatu itangije, aho umunyamahirwe mukuru yahawe miliyoni eshanu z’amafaranga y’u Rwanda.

Umuyobozi Mukuru wa I&M Bank mu Rwanda, Robin Bairstow yatangaje ko iri shami kimwe n’andi azafungurwa mu minsi ya vuba biri mu rwego rwo kuzirikana abakiriya babo.

Ati “Nkigera hano narebye ishami riherereye muri Mateus mbona ukuntu abakiriya bacu bagorwa no kubona aho baparika imodoka, twaribajije tuti ’ni hehe heza twabashyirira ishami bakabona serivisi zose za banki batavunitse?’ Aha muri CHIC twabazanye urabona ko ari ahantu heza, ni inyubako igezweho kandi bazanabona aho baparika imodoka zabo.”

Robin Bairstow yemeza ko mu Rwanda hari ikirere cyiza ku bantu bifuza gushora imari muri Afurika.

Yagize ati “U Rwanda ni igihugu cyiza, hari uburyo bafite bwo korohereza abashoramari, ubona ko bifasha abantu, nagenze mu bihugu birenga cumi na bine byo muri Afurika ariko hano iyo urebye ukuntu bakira abakiriya n’uburyo borohereza abashaka gushora imari ubona ko bari imbere y’abandi.”

Umuyobozi w’Umujyi wa Kigali wungirije ushinzwe iterambere ry’Ubukungu, Busabizwa Parfait witabiriye umuhango wo gutangiza ku mugaragaro ishami rishya ryo muri CHIC,yatangaje ko I&M Bank ari umufatanyabikorwa mu iterambere ry’igihugu, anasaba n’ibindi bigo kubaha abakiriya bigana uko iyi banki yabigenje.

Yagize ati “Ibi byose bakora ni ukugira ngo batwegereze serivisi, igihe umuntu wese azaba azikeneye azabashe kuzibona hafi. Batubwiye ko bari muri gahunda yo gukomeza kunoza serivisi zihabwa abakiriya, ibyo ni ingenzi cyane kuko igihugu cyacu kiri gutera imbere ndetse n’inama nyinshi twakira ntabwo twabigeraho tutakira neza abatugana.”

Bitewe n’uko byahuriranye n’icyumweru cyahariwe abakiriya ku isi yose, I&M Bank yasoje poromosiyo ya “KIRA” yari igamije gushishikariza abakiriya b’iyi banki kugana serivisi zayo by’umwihariko iz’ikoranabuhanga.

Umunyamahirwe mukuru w’iyi poromosiyo yabaye sosiyete y’ubucuruzi Ruzira General Trading Ltd, yahawe miliyoni eshanu z’amafaranga y’u Rwanda.

Iyi poromosiyo yari imaze amezi atatu aho buri wa Gatandatu,umwe mu bakiriya ba I&M Bank yatomboraga miliyoni y’amafaranga y’u Rwanda.

Kugeza ubu I&M Bank ibarizwa mu bihugu by’u Rwanda, Kenya na Tanzania. Iyi banki yahoze yitwa BCR (Banque Commerciale du Rwanda) yafunguwe mu mwaka wa 1963, ni yo Banki yageze mu Rwanda bwa mbere.

Umuyobozi w’Umujyi wa Kigali wungirije ushinzwe iterambere ry’Ubukungu, Busabizwa Parfait afungura ku mugaragaro ishami rishya rya I&M Bank
Umuyobozi mukuru wa I&M Bank Rwanda, Robin Bairstow, yatangaje ko u Rwanda ari igihugu cyorohereza abashaka gushora imari
Abakiriya ba I&M Bank bishimiye ishami rishya ryafunguwe mu nyubako ya CHIC

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved