I&M Bank yakoreye ibirori abana 200 b’abakozi bayo, ibafasha kwidagadura mu biruhuko

Yanditswe na Evariste Nsengimana
Kuya 19 Kanama 2018 saa 06:02
Yasuwe :
0 0

Banki y’Ubucuruzi ya I&M Bank Rwanda yahurije hamwe abana 200 b’abakozi bayo mu birori bigamije kubafasha gusobanukirwa imirimo y’ababyeyi babo no kubakangurira gukurana umuco wo kwizigama.

Iki gikorwa cyabereye mu Kigo cy’Imyidagaduro cya Masaka Spiderman Game Center mu Karere ka Kicukiro ku wa Gatandatu, tariki ya 18 Kanama 2018.

Abacyitabiriye baridagaduye, bakina imikino itandukanye irimo koga, kugendera ku binyabiziga nk’amagare, imodoka, indege, moto, kwicunda n’indi.

Umuyobozi ushinzwe Ibikorwa muri I&M Bank, Ruhumuriza Jean Marie Vianney, yabwiye IGIHE ko bahuza abana b’abakozi bakora muri iyi banki bagasabana.

Yagize ati “Buri mwaka tugira umunsi wihariye duteranyiriza hamwe abana b’abakozi kugira ngo tubakorere ibirori nk’ibi kuko tubafata nk’umuryango wa I&M Bank. Ni abana bakeneye kumenya ngo ababyeyi birirwa he, bakorana na bande, abana b’abo babyeyi ni bande?”

Yasobanuye ko iyo bahujwe bituma bamenyana, bakanakunda ikigo ababyeyi babo bakorera, bijyana no gufashwa kwidagadura mu biruhuko.

Umwe mu bana yagize ati “Kuza hano bimfasha kuruhuka mu mutwe kandi bikazamfasha gutsinda, bikampa umunezero nkumva ndishimye.”

Umubyeyi w’abana batatu ukora muri I&M Bank, Niwemutoni Gaudence, yavuze ko iki gikorwa gikwiye no kugera mu bindi bigo.

Ati “Turabyishimira cyane, abana bamaze kubimenyera. Ni igikorwa cyiza ntekereza ko n’ibindi bigo bikwiye kugikora. Bitwereka ko I&M Bank itatwitaho gusa ahubwo izirikana n’imiryango yacu kugira ngo turusheho kurema umuryango umwe.”

I&M Bank yashinzwe mu 1963, ihuza abana b’abakozi bayo mu kwishimira umusaruro ibakesha.

Abana 200 bitabiriye iki gikorwa bahawe impano zirimo imipira yanditseho amagambo abashishikariza gukurana umuco wo kwizigama bakiri bato.

Mu kubafasha kuryoherwa n’ibirori no kwidagadura basusurukijwe n’umuhanzi, Bruce Melodie ukunzwe cyane na benshi, banagira ibihe byo gufata amafoto y’urwibutso bari kumwe.

Abana bari guhabwa impano z'imipira yanditseho amagambo abashishikariza kwizigama
Abana bagize amahirwe yo gukina ku mafarashi
Abana bari mu mikino bambaye imipira yanditseho amagambo avuga ngi ndi umwana ubika
Abana babonye umwanya wo gukina imikino itandukanye
Abana bagize umwanya wo koga no kwidagadura
Abana bifotozanyije na Bruce Melodie
Bruce Melodie yasusurikije abana baririmbana indirimbo ze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza