“Ibango ry’Amateka ya Jenoside yakorewe Abatutsi muri Kamonyi”, izina ry’igitabo cya Mucundanyi

Yanditswe na David Eugène Marshall
Kuya 22 Mata 2018 saa 10:28
Yasuwe :
1 0

Visi Perezida wa Ibuka mu Karere ka Kamonyi, Mucundanyi Robert, aritegura kwandika igitabo kigaruka ku mateka ya Jenoside yakorewe Abatutsi mu 1994 muri Kamonyi.

Kamonyi yahoze igizwe n’amakomine atandatu ariyo Runda, Taba, Rutobwe, Kayenzi, Mugina na Musambira, yabereyemo ubwicanyi ndengakamere muri Jenoside yakorewe Abatutsi, bwatijwe umurindi n’Interahamwe zari ziyobowe na Akayezu Jean Paul n’abambari be.

Aya mateka kimwe n’andi y’uburyo umugambi wa Jenoside wacuzwe ukanashyirwa mu bikorwa muri aka gace agiye gukusanyirizwa hamwe mu gitabo “Ibango ry’Amateka ya Jenoside yakorewe Abatutsi muri Kamonyi”, Mucundanyi usanzwe ari Umujyanama mu Nama Njyanama y’Umurenge wa Musambira n’Umwarimu mu Ishuri rya Ecose Musambira, ari gutunganya.

Mu kiganiro yagiranye na IGIHE ku mpamvu yamuteye kwandika iki gitabo, Mucundanyi, yavuze ko biri muri gahunda yo kubika amateka azafasha abakibyiruka.

Yagize ati “Mu by’ukuri habayeho gutekereza ko hari igihe abantu babayeho mu gihe Jenoside yabaga bazagenda bagabanuka uko imyaka yicuma, ndetse nta n’uwashidikanya ko mu myaka iri imbere hazaba nta n’umwe ukiriho, bityo mpitamo gutanga umusanzu wanjye wo gutangira kwandika igitabo. Nk’umuntu wacitse ku icumu by’umwihariko, unavuka mu Karere ka Kamonyi, ntekereza ko bizafasha mu gusigasira ayo mateka ngo atazima.”

Yakomeje avuga ko igitabo yacyise ‘‘Ibango ry’Amateka ya Jenoside yakorewe Abatutsi mu Karere ka Kamonyi’’, mu rwego rwo kugira ngo atazitira undi wese washishikazwa no kusa ikivi azaba yaratangiye, kuko amateka ya Jenoside yakorewe Abatutsi muri Kamonyi ari maremare.

Yagize ati “Ubu kugira ngo umuntu asobanure neza ibyabaye muri icyo gihe, bisaba ko yifashisha ubuhamya bw’ababaye muri Jenoside bakayibonesha amaso yabo, abantu bakavuga uko byagenze. Hatabayeho kwandika no kubika ibyo byose rero, byazazimira igihugu kikaba gitakaje byinshi, ari naho nahereye mfata umwanzuro. N’ubwo bitoroshye kubera ikibazo cy’amikoro n’ibikoresho nka za mudasobwa, utwuma dufata amajwi twabugenewe two kumfasha kunoza neza ibyo bikorwa, binsaba kuzenguruka utugari n’imidugudu yose bigize Kamonyi.”

Mucundanyi Robert agiye kwandika ku mateka ya Jenoside yakorewe Abatutsi muri Kamonyi

Mucundanyi yavuze ko iby’amikoro make bitazamukoma mu nkokora, ngo ku mpamvu z’uko n’Ingabo za RPF Inkotanyi zahagaritse Jenoside mu Rwanda, zitabigezeho kubera intwaro karahabukata zari zitwaje.

Yagize ati “Ubutwari nazigiyeho, buzamfasha guhera kuri duke mfite turimo n’ubushake no kumva neza akamaro k’icyo ngamije. Bizafasha kubaka byinshi birimo no kuzaba mu gihe u Rwanda ruzaba rwibuka ku nshuro ya 25 Jenoside yakorewe Abatutsi mu mwaka utaha, nteganya kuzaba nashyize hanze icyo gitabo.”

Amateka avunaguye kuri Jenoside yakorewe muri Kamonyi

Komisiyo y’Igihugu yo kurwanya Jenoside mu Rwanda (CNLG) kuri Jenoside yabereye muri Kamonyi, itangaza ko mu yahoze ari Komine Taba by’umwihariko yayoborwaga na Jean Paul Akayesu, wanabaye uwa mbere wahamwe n’icyaha cya Jenoside yakorewe Abatutsi mu Rwanda, ngo Jenoside yabanjirijwe n’amakimbirane hagati ya MDR na MRND, amashyaka yahoraga arebana ay’ingwe. Icyo gihe ibikorwa by’iterabwoba byakorwaga ku manywa y’ihangu, maze Interahamwe zitangira kwitoza kwica Abatutsi, imyitozo ngo zajyaga gukorera mu gutera amagerenade mu mugezi wa Nyabarongo, zirushanwa kurasa imvubu.

Ibyo kandi ngo byanabimburiwe n’Abatutsi izo Nterahamwe ziciye Rugalika na Ruyenzi, mu matariki abanza indege yari itwaye Habyarimana Juvénal ikimara kuraswa ku wa 6 Mata 1994, bucyeye bwaho Abatutsi bo muri utwo duce barishwe.

Hakurikiyeho inama Sindikubwabo Théodore yari aherekejwemo na Kambanda Jean wari Minisitiri w’Intebe bagiranye na ba Burugumestri bose b’amakomine agize Perefegitura za Gitarama ku itariki ya 18 Mata 1994; ba Burugumesitiri ngo muri iryo joro, nabo bakoresheje inama nk’iyo mu makomine yabo, bashishikariza abaturage kwica Abatutsi.

Burugumesitiri Akayesu akiva mu nama we, yahise akoresha indi i Remera-Rukoma yahejwemo uwitwa Umututsi wese, ku buryo bwacyeye Abatutsi bicwa ku itariki ya 19 Mata 1994.

Muri icyo gihe kandi hakurya gato muri Taba, Burugumesitiri Akayesu Jean Paul na Kubwimana Silas wari Rwiyemezamirimo mu by’ubwubatsi bafashijwe n’Interahamwe z’i Gihinga bishe Abatutsi benshi.

Izi nterahamwe ni nazo zishe Abatutsi bari bahungiye mu Kigo Nderabuzima cya Kigese, zica Abatutsi babahungiraga i Kabgayi; ni nazo zishe abaguye i Kiyumba no ku Mugina aho Abatutsi bahungiye mu Kiliziya yaho batwikiwe muri yo.

Mu bandi bicanyi ba ruharwa, barimo Munyandamutsa bitaga "Rutuku" wabagaga amatungo na Gisimba Daniel wigishiga i Gihinga.

Abanya-Kamonyi ntibazibagirwa impunzi za Nyacyonga zari zikambitse ku musozi wa Nyamugari no ku Kigo Nderabuzima cya Kamonyi bagize uruhare mu kwica Abatutsi bahasanze.

Izo mpunzi ni nazo zishe Ababikira 12 bari bavuye i Kigali k’ Umushumba Mwiza, biciwe mu Kagari ka Shenga kayoborwaga na Karekezi Innocent. Kamonyi kandi yari yuzuyemo Interahamwe zagiye zimuka ziva mu duce Inkotanyi zimaze gufata.

Kamonyi kandi yari yuzuyemo Interahamwe zagiye zimuka ziva mu duce Inkotanyi zari zimaze gufata, Jenoside yahagaze ku itariki ya 4 Nyakanga 1994. Komisiyo y’Igihugu yo kurwanya Jenoside (CNLG) itangaza ko Abatutsi biciwe muri Kamonyi bamaze kumenyekana ari 47 278.

Mu bice by’ahahoze ari muri Komine Kayenzi na Taba yayoborwaga na Jean Paul Akayesu wakatiwe bwa mbere n'Urukiko Mpanabyaha kuri Jenoside yakorewe Abatutsi mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza