Kwamamaza

Ibibazo bitatu byabaye izimano ku Mukuru w’Igihugu

Yanditswe kuya 28-09-2016 saa 13:13' na Jean Pierre Tuyisenge


Muri gahunda yo kwegera abaturage, Perezida Kagame asura uturere dutandukanye tw’igihugu kamwe ku kandi, akaganira nabo kuri gahunda zinyuranye zirimo iterambere, ubuzima, umutekano n’izindi; bakanamugezaho bimwe mu bibazo bafite bigashakirwa umuti ibindi bigahabwa inzego zinyuranye ngo zibikurikirane.

Gusa muri ibyo bibazo hari bimwe bigaruka kenshi mu turere tunyuranye, aho usanga byari kuba byarakemuwe n’abayobozi bo mu nzego z’ibanze ariko bigategereza Umukuru w’Igihugu, hakaba n’ibibonerwa umuti ari uko araye ari bubasure.

Ibibazo Perezida Kagame akunda kugezwaho aho ageze hose ni bitatu by’ingenzi.

Usibye kugezwaho ibibazo, Abaturage baba bishimiye kumubona

1. Abaturage batahawe ingurane

Ku wa 25 Werurwe 2016 ubwo Perezida Kagame yasuraga abaturage bo mu Karere ka Rubavu, umuturage witwa Binywama Theobard utuye mu Kagari ka Kanyundo, mu Karere ka Rubavu, yabwiye Umukuru w’Igihugu ko akarere ka Rubavu gafatanyije n’umushinga PAREFU ukorera muri Minisiteri y’Ibikorwa Remezo bateye ibiti mu masambu y’abaturage, harimo n’iye ariko ntibahabwe ingurane.

Ikibazo cy’uwo musaza cyaje gikurikira icyabajijwe n’umwe mu baturage bo mu Murenge wa Busasa, tariki 18 Kamena 2015 avuga ko akarere ka Rutsiro kohereje umushinga PAREFU ugatera ibiti mu mirima y’abaturage nyamara bo ntibagire icyo bahabwa.

Iki kibazo kijya gusa kandi n’icyo yasanganijwe ubwo yasuraga abaturage bo mu Karere ka Gakenke ku wa 23 Werurwe 2016 , aho umwe mu bafite imirima yegereye umugezi wa Base yamubwiye ko baranduriwe imyaka n’ubuyobozi bw’akarere bubabwira ko hari hagamijwe kubungwabungwa ibidukikije, ariko ntibahabwe ingurane y’ibyabo.

Mu ruzinduko Perezida Kagame yakoreye i Karongi kuva kuwa 16-17 Gicurasi 2016, umuturage yamugejejeho ikibazo cy’uko isambu ye ubuyobozi bwayubatsemo inzu y’abatishoboye mu 2008, ariko kugeza aho Perezida Kagame yagiraga i Karongi yari atarahabwa ingurane.

2. Ibibazo by’akarengane gakorerwa abaturage

Ubwo Perezida Kagame yasuraga abaturage bo mu Murenge wa Jabana, mu Karere ka Gasabo ku wa 11 Ugushingo 2014, Umuturage witwa Mukasinzi Clarisse wo mu Karere ka Kicukiro, yagaragarije Perezida Kagame ko Paul Jules Ndamage wari Meya w’aka karere yatanze imitungo ye, mu buryo budasobanutse.

Iki kibazo gisa neza n’icyo Mukarugaba Odette wo mu Karere ka Karongi yagejeje kuri Perezida Kagame ubwo yasuraga Karongi ku wa 17 Gicurasi 2016, ikibazo cy’imitungo igizwe n’inzu yambuwe, nyamara yari yakigejeje kuri Perezida wa Repubulika ahagana mu 2000 hakiriho amakomini.

Ubwo yari yasuye Akarere ka Rubavu kuwa 27 Werurwe 2016, Umukuru w’Igihugu kandi yagejejweho ikibazo n’umugore wavugaga ko umwana we yambuwe n’abajura amafaranga Miliyoni 2.5, ariko bagafatwa na Polisi bagifite amwe muri ayo mafaranga, akavuga ko ayo mafaranga polisi itigeze iyamusubiza. Iki kibazo cyatunguye Perezida Kagame yibaza impamvu polisi itasubije uwo muturage amafaranga ye, ahita ayitegeka kuyamuha akiri aho; nyuma uyu muturage yaje kurenganurwa.

Umuturage umwe ageza ikibazo cye ku Mukuru w'Igihugu

3. Kwamburwa na ba rwiyemezamirimo

Ubwo Perezida Kagame yasuraga Akarere ka Karongi ku wa 17 Werurwe 2016, umuturage yamugejejeho ikibazo cy’uko we n’abandi bambuwe amafaranga yabo na rwiyemezamirimo bakoreye ubwo hubakwaga urwibutso rwa Jenoside rwa Bisesero mu mwaka wa 2012, nyamara akarere ntikagire icyo gakora kugira ngo abo baturage babone amafaranga yabo.

Ikibazo kimeze nk’iki kandi, Perezida Kagame yakibajijwe na Rubayiza Faustin ubwo yasuraga Akarere ka Rutsiro ku wa 18 Kamena 2015, aho yamubwiye ko bambuwe amafaranga bakoreye bubaka ibyumba by’amashuri y’uburezi bw’ibanze bw’imyaka 12 mu mwaka wa 2014.

Ubwo Perezida wa Repubulika kandi yasuraga Akarere ka Ngoma ku wa 28 Mata 2016 , Umuturage wo muri ako karere witwa Hitimana Jean Baptiste, yamugejejeho ikibazo cy’uko rwiyemezamirimo wahawe akazi n’akarere ka Ngoma yabambuye amafaranga nyuma yo gutera ibiti ku nkengero z’ibiyaga.

Nkuko byagiye bigaragara mu turere dutandukanye Perezida Kagame yasuraga, ibibazo byakunze kugenda bimugezwaho bisa, nyamara agasanga bitarakemuwe mbere kandi ubuyobozi bwaragaba bubizi ndetse bunafite ubushobozi bwo kubikemura.

Abadepite batangiye gushaka impamvu ibibazo bitegereza Umukuru w’Igihugu

Iki ni ikibazo abadepite batekerejeho ndetse ubwo hagaragazwaga ibyagezweho n’Inteko Ishinga Amategeko imitwe yombi mu gihembwe cya mbere cy’umwaka wa 2016, ku wa 05 Mata 2016.

Visi Perezida w’Inteko Ishinga Amategeko umutwe w’abadepite, Mukama Abbas, yavuze ko mu ngengo y’Imari (y’Inteko Ishinga Amategeko) y’umwaka wa 2016-2017 hagomba gushyirwamo amafaranga menshi mu ngendo zo kwegera abaturage kugira ngo ibibugarije bimenyekane, aho kumenyekana ari uko Perezida Kagame yabasuye.

Izo ngendo mu baturage zaratangiye gusa ntawuzi niba koko zizakemura ibibazo ku buryo Perezida Kagame atazajya abisanganizwa mu turere twose asura kandi byakabaye bikemurwa mbere y’uko ahagera.

Perezida Kagame ntiyumva impamvu hari ibibazo bigaruka buri gihe

Umukuru w’Igihugu wakundaga guhita asaba inzego zibishinzwe gukurikirana no gukemura byihuse ibi bibazo yabaga amaze gusanganizwa, yongeye kugaragaza ko atishimiye iyi myitwarire ya bamwe mu bayobozi badakemura ibibangamiye abaturage bikarinda kumugeraho.

Ubwo ku wa 31 Werurwe 2016 yasozaga itorero ry’abajyanama b’Uturere n’Umujyi wa Kigali i Gabiro muri Gatsibo, Perezida Kagame yagaragaje ko gahunda ya Girinka, aho agiye hose bayimusanganiza ko yajemo ibibazo akibaza impamvu icyo kibazo kigaragara ahantu hose.

Yagize ati “Hari akarere porogaramu ya Girinka itarageramo? Hari akarere iyo porogaramu itagira ibibazo? Karahari? Nimukambwire. Mbwira uti mu karere kanjye cyangwa ako nzi iyo porogaramu nta kibazo kijya kivuka. Hari ako muzi? Kubera iki? […] Abo baturage mugenda mugafata inka zabo ntimuzibahe, ndabibona aho mba nagiye hose , umuturage aba agira ati ’ndakennye, ndapfuye, banyimye inka cyangwa ngo bari banshyize ku rutonde umuyobozi runaka yarayitwariye’.”

Perezida Kagame yibaza impamvu ibibazo bidakemurwa mbere y'uko agenderera uturere
Aho agiye hose asiga akemuye ibibazo bitabarika

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved