Ibihano bishya ku bavugira kuri telefone batwaye byazamuye impaka

Yanditswe na Jean Pierre Tuyisenge
Kuya 11 Gashyantare 2018 saa 01:48
Yasuwe :
0 0

Ingamba nshya za Polisi y’u Rwanda zo guhana abashoferi bavugira kuri telefone batwaye ibinyabiziga zakuruye impaka mu bantu benshi, bamwe bavuga ko kwifashisha udukoresho dutuma bumva amajwi badafashe telefone turimo ‘ecouteur’ na ‘Bluetooth’ bitagakwiye gushyirwa mu cyiciro kimwe n’abazikoresha batatwambaye.

Igenzura rigamije kurwanya impanuka mu muhanda ryatangijwe ku wa Kane w’icyumweru gishize ryaje rikurikiye raporo nyinshi zavugaga ku mpanuka zabaye ryagaragaje ko inyinshi zatewe no kuvugira kuri telefone abantu batwaye, umuvuduko ukabije, kutubahiriza amategeko y’umuhanda cyane ku banyamaguru no gutwara nabi.

Umuyobozi w’Ishami rya Polisi y’u Rwanda rishinzwe Umutekano wo mu muhanda, CP Rafiki Mujiji, yagize ati “Twafashe ingamba ku kibazo cyo gukoresha telefone ngendanwa mu gihe abantu batwaye, ndetse no gukoresha Bluetooth cyangwa ‘ecouteur’ birabujijwe.”

Abatwara ibinyabiziga baganiriye na Sunday Times dukesha iyi nkuru, bavuze ko bitumvikana uburyo babuzwa kuvugira kuri telefone bakoresheje ‘ecouteur’ cyangwa ‘Bluetooth’ kandi ngo nta mpanuka byateza, bagasaba ko nta bihano byagenerwa.

Uwitwa Ines Buki, yasubije Mujiji kuri Twitter avuga ati “Ndemeranya namwe ku byo kuvugira kuri telefone ariko Bluetooth cyangwa ecouteur nicyo byakorewe, ndakeka ko imodoka zigezweho zinafite ibyo byombi.”

Umunyarwanda umaze imyaka icumi muri Leta Zunze Ubumwe za Amerika Davis Nteziryayo yavuze ko kuva na kera utwo dukoresho twakorewe gufasha abashoferi kwirinda gufata telefone batwaye tudakwiye gutuma bahanwa.

Yagize ati “Aya mabwiriza ateye ikibazo. Mba muri Amerika, natembereye mu bihugu byinshi aho abatwara ibinyabiziga bemererwa kwifashisha utwo dukoresho. Nta kibazo mbibonamo kereka wenda umuntu aramutse atwaye ku muvuduko ukabije.”

Uwitwa Wanjala Davidi we yagize ati “Ikintu cyose gishobora kugira uruhare nubwo rwaba ari 1% mu kurangaza umushoferi gikwiriye gukumirwa hagamijwe kubahiriza amategeko y’umuhanda.”

Ishami rya Polisi rishinzwe umutekano wo mu muhanda ryatangije ibikorwa bigamije gukumira gutwara nabi no kwica amategeko y’umuhanda ku wa 8 Gashyantare 2018. Raporo yagaragaje ko mu isaha imwe, abashoferi 45 bahanwa.

Umuvugizi w’Ishami rya Polisi rishinzwe umutekano wo mu muhanda, Jean Marie Vianney Ndushabandi, yavuze ko ibyo bikorwa byatangijwe mu gihe impanuka mu modoka zitwarira abantu hamwe zagabanutse ariko bitameze nko mu z’abantu ku giti cyabo.

Yavuze ko ikoreshwa ry’utugabanyamuvuduko mu zitwarira abantu hamwe, ryagabanyije impanuka kugera kuri 65%, gusa mu zitwara abantu ku giti cyabo zagabanutseho gato.

Yagize ati “ Ecouteur na Bluetooth biracyari imbogamizi zikomeye cyane, inyigo yakozwe yagaragaje ko bishobora gutera impanuka, ibyo rero ntitubishaka.”

Yakomeje agira ati “ Ibyo dusaba abashoferi ni ukureka kuvugira kuri telefone kuko bishobora kubabuza gushyira umutima ku gutwara. Birakwiye ko twese tuba abashoferi bazi ibyo bakora.”

Hari amakuru avuga ko ibihano byahabwaga abamotari bavugira kuri telefone batwaye bingana n’ibihumbi 10 Frw bizikuba inshuro icumi.

Gusa CP Mujiji yavuze ko igitekerezo cyo kongera ibihano kiri mu mabwiriza mashya agenga umutekano wo mu muhanda ariko kugeza ubu atari yashyirwa mu itegeko.

Ndushabandi yavuze ko itegeko risanzweho riteganya ko ibihano ku bica amategeko y’umuhanda biri hagati y’ibihumbi 10 Frw na 150 Frw bitewe n’icyaha cyakozwe.

Yagize ati “Turashaka kuringaniza ibihano ku bavugira kuri telefone n’ibindi byaha mu itegeko riri kuvugururwa rirebana n’umutekano wo mu muhanda. Gusa biracyari umushinga ukiri kuganirwaho.”

Yavuze ko abazanyuranya n’ayo mabwiriza batazacibwa ibihumbi 100 Frw nk’uko byari bimaze iminsi bihwihwiswa, mbere y’uko itegeko rishya rigenga ay’umuhanda ryemezwa.

Ubushakashatsi bwashyizwe ahagaragara na Kaminuza ya Sussex yo mu Bwongereza mu 2016, bwagaragaje ko kuvugira kuri telefone hifashishijwe Bluetooth cyangwa ecouteur bishobora kurangaza umushoferi nko kuba ayifite mu ntoki.

Ibihano bishya ku bavugira kuri telefone batwaye ibinyabiziga byazamuye impaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza