Ibihugu birindwi bigiye guhurira mu imurikagurisha rizabera mu Karere ka Rubavu

Yanditswe na Mukwaya Olivier
Kuya 2 Ukuboza 2019 saa 03:22
Yasuwe :
0 0

Akarere ka Rubavu gafatanyije n’urugaga rw’abikorera mu Karere ndetse n’ihuriro ry’abafatanyabikorwa (JADF Icyerekezo Rubavu), bateguye imurikagurisha 2019 n’imurikabikorwa 2019-2020 bizabera ku nkengero z’ikiyaga cya Kivu.

Rizahuza ibihugu bisaga birindwi ahitezwe ko rizitabirwa cyane bitewe n’uko umupaka w’u Rwanda na Repuburika Iharanira Demokarasi ya Congo watangiye gukora amasaha 24/24 nka One Stop Boarder Post.

Iri murikagurisha ndetse n’imurikabikorwa bizaba kuva kuwa 13- 27 Ukuboza 2019, imiryango ikaba izajya iba ifunguye kuva saa mbili za mu gitondo kugeza saa sita z’ijoro.

Iri murikagurisha rizitabirwa n’abazaturuka mu Rwanda, Congo- Kinshasa, Kenya, Misiri, u Buhinde, Ghana na Tanzania.

Umunyamabanga Uhoraho mu rugaga rw’abikorera i Rubavu, Maniragaba Pascal, asaba abaturage kuzitabira ku bwinshi kugira ngo bihahire basoze umwaka bishimye.

Ati “Turasaba abaturage kwitabira kugira ngo barusheho gushyigikira gahunda ya Made in Rwanda no gusoza umwaka bafite aho kuruhukira no kwihahira ibikoresho bitandukanye”.

Akomeza avuga ko kandi bazerekwa serivisi bahabwa n’imiryango itari iya leta kuko nayo izaba imurika ibikorwa bikorerwa abaturage.

Umuyobozi w’Akarere ka Rubavu wungirije ushinzwe iterambere ry’ubukungu, Nzabonimpa Deogratias, yishimiye uko iri murikagurisha rikomeje gutegurwa mu bufatanye n’inzego zose, asaba ko rirushaho gushyirwamo imbaraga kugira ngo rizabe ryiza kurusha ayaribanjirije.

Yagize ati “Ni byiza ko mu mpera z’umwaka mu mujyi nka Rubavu hategurwa ibikorwa nk’ibi bigamije gufasha abaturage ndetse n’abahagenda kwishima ndetse no kwidagadura ariko no kugaragariza abaturage ibibakorerwa ahahuzwa imurikabikorwa n’imurikagurisha”.

Yongeraho ko ibi bikorwa ari amahirwe ku bikorera mu karere kuko bazaba babonye umwanya wo kugaragariza abaguzi ibyo bakora.

Akarere ka Rubavu ni kamwe mu twungaira Umujyi wa Kigali kakaba n’Irembo ry’Igihugu mu Ishoramari n’Ubukerarugendo.

Abikorera bavuga ko mu gutegura iryo murikagurisha hashowemo amafaranga miliyoni zigera kuri 30 naho iriheruka umwaka ushize rikaba ryaritabiriwe n’abaturage 60 000 mu gihe cy’iminsi 14 ryamaze aho ryabaye ku wa 13-27 Ugushyingo 2018.

Umuyobozi w’Akarere ka Rubavu wungirije ushinzwe iterambere ry’ubukungu, Nzabonimpa Deogratias avuga ko iri murukagurishwa rizaba ritandukanye n'ayandi
Inzego zitandukanye zitabiriye inama itegura imurikagurisha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza