Ibinyabiziga birenga 1200 birimo za moto byafatiwe mu muhanda bigiye gutezwa cyamunara

Yanditswe na Umurerwa Emma Marie
Kuya 13 Ukwakira 2017 saa 11:40
Yasuwe :
0 0

Polisi y’u Rwanda yatangaje ko hagiye gutezwa cyamunara ibinyabiziga birenga 1200 byiganjemo za moto, byagiye bifatirwa mu makosa atandukanye mu muhanda, ba nyira byo bagaterera agati mu ryinyo ntibajye kubigombora.

Umuyobozi w’Ishami rya Polisi rishinzwe umutekano wo mu muhanda, CP George Rumanzi, yatangaje kuri uyu wa Kane tariki ya 12 Ukwakira 2017, ko ibyo binyabiziga bigiye gutezwa cyamura biparitse ku biro bya Polisi ku Kacyiru.

Yagize ati “Ubu hano twafashe moto zirenga 1200 zitagira ubwishingizi, nyuma y’iminsi 30 nk’uko itegeko ribiteganya zizatezwa cyamunara.”

Yakomeje avuga ko izi moto zafatiwe mu makosa atandukanye, arimo gutwarwa n’abadafite uruhushya rwo gutwara ibinyabiziga; izidafite ubwishingizi; izibwe n’andi makosa atandukanye.

Polisi yanavuze ko mu binyabiziga byafashwe harimo imodoka nini n’intoya byiganjemo ibyibwe, bidafite ubwishingizi, ibyahindujwe ibyuma n’ibyafatiwe mu yandi makosa atandukanye.

Uretse guteza cyamura ibyo binyabiziga, Umuyobozi wa Polisi y’u Rwanda, IGP Emmanuel Gasana, yanamenyesheje ko hagiye guhindurwa aho ibinyabiziga byafatwaga bigaparikwa , kandi ko buri munsi hari amafaranga bizajya byishyuzwa agomba kwishyurwa na nyir’ikinyabiziga.

Yavuze ko Umujyi wa Kigali ugiye gushaka aho bizashyirwa ndetse hakazashakwa n’ikigo kibicungira umutekano.

Yagize ati “Umujyi wa Kigali ugiye kubitegura neza, buri munsi hari igiciro cy’amafaranga ugomba gukatwa gituma kijya muri ya sanduku ndetse kikanafasha n’abarinzi b’iyo company [ibicunga]. Nyir’ikinyabiziga uzajya atinda kuza kugifata bizajya bituma amafaranga acibwa yiyongera.”

Polisi yatangaje ko ibinyabiziga birenga 1200 birimo za moto byafatiwe mu muhanda bigiye gutezwa cyamunara
Moto zirenga 1200 zizatezwa cyamunara
Imodoka z'ubwoko butandukanye zafatiwe mu makosa atandukanye ziparitse kuri Polisi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza