Ibiranga rwiyemezamirimo utanga icyizere cyo kugera kure

Yanditswe na Mukaneza M.Ange
Kuya 14 Kanama 2018 saa 04:36
Yasuwe :
0 0

Kubaka ikigo cy’ubucuruzi si urugendo ruri ku muvuduko uringaniye, ahubwo ni isiganwa rigizwe n’utununga, imiyaga, ubushyuhe n’ivumbi ryinshi.

Nk’uko Jean Claude Mutajogire, Umuyobozi Mukuru w’Ikigo
Business Partners Rwanda abisobanura, ba rwiyemezamirimo babasha kurenga ibi bihe biba bitoroshye si uko baba bazi kwihuta cyangwa bafite imbaraga ziruta iz’abandi, ahubwo baba bafite ubushobozi bwo guhangana n’ibicantege byose.

Nyuma yo gukorana imyaka myinshi na ba rwiyemezamirimo batandukanye mu rugendo rwabo rwo kwiyubaka, Mutajogire yagerageje gukora urutonde rw’ibintu umunani biranga umuntu ufite ubushobozi bwo kuba yageza ubushabitsi bwe ku rwego rwo hejuru.

1. Ashobora kwishyiriraho umurongo ngendarwaho uhamye

Kimwe mu bigaragaza rwiyemezamirimo ufite ubushobozi bwo kugeza ibyo akora ku rwego rwisumbuyeho, ni ukuba ari umuntu uzi kwishyiriraho umurongo ngenderwaho, amasaha y’akazi, umuvuduko, ingano y’ibyo ari bukore ndetse n’umusaruro ugomba kuvamo hatabayeho imbaraga ziturutse hanze zirimo nk’amasezerano y’akazi, intambwe imaze guterwa n’urungano rwe, cyangwa isaha iri ku gikuta.

Ba rwiyemezamirimo bishyiriraho amahame n’intego bifuza kugeraho kandi bakazishyira ku rwego ruhanitse. Umukoresha wabo n’ibiri mu bitekerezo byabo, akenshi usanga binabasaba gukora cyane.

2. Ubushobozi bwo gukora byinshi binyuranye no kwagura

Ubushabitsi bwibanda ku gicuruzwa kimwe, umukiliya umwe n’ishami rimwe akenshi usanga budatera imbere kuko bubangamirwa no guhomba amasezerano akomeye, gufungura kw’abandi bakora nk’ibyawe, kuza kw’isoko kw’ibicuruzwa byinshi bimeze nk’ibyawe kandi bihendutse.

Uwihangiye imirimo aba agomba gushakisha uko yagura ibyo akora binyuze mu gushaka amasoko mashya, ibicuruzwa bishya n’abakiliya, ku buryo agira ibikorwa birenze kimwe yishingikirije.

3. Kubaka umubano ukomeye n’abandi

Ba rwiyemezamirimo batanga icyizere iteka baharanira kubaka umubano n’abakiliya, ababagemurira ibyo bacuruza, abo bakora bimwe, inshuti n’umuryango.

Ibi babikora batagamije kumenyekanisha no guteza imbere ubucuruzi bwabo gusa ahubwo bakigira ku bandi, kandi bakanabikuramo andi mahirwe y’ibyo bashoramo imari n’amakuru arebana n’impinduka ziri ku isoko.

4. Imitekerereze y’uwigobotoye ibyari bimuboshye

Ibicantege umuntu agomba guhora abyiteguye mu bushabitsi bwose, iyo bije rwiyemezamirimo utanga icyizere arahaguruka, akihanagura ivumbi ubundi agakomeze urugendo.

Ikizamukubwira ni uko usanga nta mwanya wo guta mu maganya afite, kandi nubwo yihutira kugaragaza aho intege nke zaturutse, imbaraga nyinshi azishyira mu kongera kwiyubaka no gukomeza urugendo.

5. Ubushobozi bwo kwigira ku makosa

Ba rwiyemezamirimo bose bakora ibishoboka byose ngo birinde kugwa mu makosa, ikizakubwira abazageza ibikorwa byabo ku rundi rwego ni uko uzasanga badatinda ku bitaragenze neza gusa ahubwo bashakisha icyakorwa kugira ngo ikosa ryakozwe ntibazongere kurigwamo.

Bitewe n’ibyabaye kandi nyuma y’ikosa, kuri bo ni n’ubundi buryo rwiyemezamirimo ashobora gukoresha mu gushakisha amahirwe y’ishoramari yagaragajwe n’imbogamizi yahuye nazo ndetse no kureba niba yahindura icyerekezo cyangwa agashakisha amasoko mashya.

6. Umuco wo kugenzura uko umutungo ukoreshwa

Ba rwiyemezamirimo batanga icyizere barangwa no guhitamo kubaho ubuzima buciriritse, ibi ahanini babiterwa n’uko iteka batekereza ku birebana n’imikoreshereze y’amafaranga yinjizwa n’ubucuruzi bwabo.

Barizigama ndetse aho biri ngombwa bakagabanya amafaranga basohora bitabaye ngombwa ko ubucuruzi bwabo buhungabana. Iteka usanga bazi abafitiye ibigo byabo ideni, igihe bizeye kwinjiza amafaranga, abo bafitiye ideni ndetse n’aho bageze ku birebana n’intego bihaye.

7. Babona ibintu mu buryo bwagutse

Biroroshye ko buri wese ufite igikorwa cy’ubucuruzi ashobora kuzimirira mu nzira no kutabasha kwakira ubwinshi bw’amakuru, ibibazo n’ibikorwa asabwa gukora. Rwiyemezamirimo utanga icyizere ariko we usanga afite ubushobozi bwo kwitegereza no kubona ibiri kuba mu buryo bwagutse, kandi akaba afite ishusho nyayo y’urwego ibikorwa bye bizaba biriho mu myaka 10 iri imbere.

Iyi mitekerereze ituma abasha kumenya aho ashyira imbaraga nyinshi kurusha ahandi, kandi ntacibwe intege n’imbogamizi zidahoraho ashobora guhura nazo.

8. Bita ku migendekere ya buri kintu cyose

Mutajogire uhamya ko ba rwiyemezamirimo bose bashobora kugera kure igihe bagize kwihangana no kwita ku byo bakora, avuga ko utanga icyizere uzamubwirwa no guha agaciro imigendekere ya buri kintu cyose kibera mu kigo cye, atibagiwe no guhoza ijisho ku ntego z’igihe kirekire yihaye.

Iteka agenzura ibirebana n’amafaranga yinjiye, ayasohotse, ibiciro, amasezerano, ubwishingizi, imikorere y’abakozi, umusaruro ndetse n’ibindi bintu bitabarika bishobora kuba imbogamizi mu rugendo rwo kugeza ubucuruzi bwe ku ntego yihaye.

Business Partners Rwanda n’ikigo gifite ubunararibonye mu birebana no gufasha ibigo bito n’ibiciriritse kumenya ko bihangana n’ibibazo by’ubukungu. Iki kigo giteza imbere kwihangira imirimo binyuze mu gutanga inkunga, ubumenyi na serivisi zituma ubucuruzi burushaho gutera imbere. Ku bindi bisobanuro wasura www.businesspartners.rw.

Umuyobozi wa Business Partners Rwanda, Jean Claude Mutajogire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza