Ibitaro bya Faisal byagize ibibazo by’amashanyarazi, abarwayi bamwe basohorwa ku bw’umutekano

Yanditswe na Akayezu Jean de Dieu, Habimana James
Kuya 27 Mata 2019 saa 07:48
Yasuwe :
0 0

Mu masaha y’umugoroba w’uyu wa Gatandatu mu bitaro byitiriwe Umwami Faisal mu Mujyi wa Kigali habaye ikibazo cy’umuriro w’amashanyarazi cyatumye abarwayi bamwe basohorwa mu bitaro kubera umutekano wabo.

Nyuma y’insinga zaturitse, habayeho kwikanga ko hari ikibazo gikomeye cyabaho bituma abarwaye bidakomeye basohorwa. Ubuyobozi bw’ibitaro bwagerageje no gucana moteri ariko ntiyaka.

Umuyobozi w’Akarere ka Gasabo Rwamurangwa Stephen yabwiye IGIHE ko Ikigo cy’Igihugu gishinzwe Ingufu (REG) kirimo kureba ahavutse ikibazo ngo gikemuke.

Yagize ati “Ikibazo cyo ntiyacyabura kuko basohoye abarwayi bose usibye abari basanzwe bakeneye ubufasha bukomeye, REG irimo gusuzuma ngo irebe niba hari agace kamwe abarwayi babimuriramo ngo barebe icyateye iki kibazo, gusa nta murwayi wagize ikibazo kuko abaganga barimo gukora ibishoboka byose.”

Yavuze ko ikibazo cy’amashanyarazi cyanageze ku gice kinini muri Kacyiru, hakabaho ikizima nubwo ibibazo byatangiye gukemuka.

Kaneza Diana ushinzwe itangazamakuru mu Bitaro byitiriwe Umwami Faisal, yavuze ko ikibazo cyatangiye ahagana saa kumi n’ebyiri, habanza guturika mu gice gihurizwamo ibijyanye n’ingufu z’amashanyarazi, maze ibintu byose birazima.

Gusa byabaye mu gihe mu cyumba gitangirwamo ubuvuzi bukomeye nko kubaga nta muntu urimo, ndetse mu gice cy’abana cyangwa abantu bakuru bari bakeneye umwuka utangwa n’imashini, bahise bashyirwaho uwimukanwa uba muri ‘Airbag’.

Kaneza yakomeje ati “Abaganga bose bari bahari kuko no muri weekend buri murwayi aba afite umuforomo umuriho, bose bahise babashyira kuri ‘Airbag’ batangira kwimura abarwayi kubera ko hejuru hari hatangiye gucumba umwotsi, bose bagenda babimura.”

“Nta murwayi n’umwe wahaburiye ubuzima, abarwayi batari bagishoboye gukoresha uriya mwuka wundi mu gihe runaka bagiye babajyana CHUK cyangwa i Kanombe. Kugeza ubu umuriro wagarutse mu bice bimwe na bimwe, baracyarimo kugerageza gukemura ikibazo cyose uko cyakabaye.”

Inzego zishinzwe ubutabazi zirimo Polisi n’Ikigo cy’Igihugu gishinzwe ingufu, REG, zahise zitabara, zitangira gushaka uko icyo kibazo cyakemurwa ubuzima bugakomeza mu bitaro nk’ibisanzwe.

Hanze y'ibitaro hari umwijima ukomeye
Ubwo umuriro wari utangiye kugaruka mu Bitaro byitiriwe Umwami Faisal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza