IBUKA irifuza ko ibihano by’uwahamwe n’ingengabitekerezo ya Jenoside byakongerwa

Yanditswe na Kanamugire Emmanuel
Kuya 19 Mata 2017 saa 09:13
Yasuwe :
0 0

Impuzamiryango irengera inyungu z’abarokotse Jenoside yakorewe Abatutsi (IBUKA) irasaba ko itegeko rihana ingengabitekerezo ya Jenoside ryavugururwa, ibihano bahamwa abahamwe n’iki cyaha bikongerwa.

Ubusanzwe uhamwe n’iki cyaha ahanishwa igifungo kuva ku myaka itanu kugeza ku icyenda.

Ubwo yifatanyaga n’abaturage b’i Nyange mu muhango wo kwibuka ku nshuro ya 23 Jenoside yakorewe Abatutsi, kuri uyu wa 19 Mata 2017, Perezida wa IBUKA, Prof. Dusingizemungu Jean Pierre yavuze ko hirya no hino mu gihugu hari abantu bakigaragaraho ingengabitekerezo ya Jenoside, asaba inzego bireba kuvugurura itegeko riyihana.

Yagize ati “Igihano cy’ingengabitekerezo ya Jenoside uko giteye ubungubu twumva kidahagije. Tubona uhanwa atabivanamo isomo rihagije kuko no mu bahohotera abacitse ku icumu hari abongera kugaragara muri ibyo byaha. Bigaragara ko n’igikorwa cyo kubagorora kigomba kongerwamo ingufu.”

Ni igitekerezo Perezida wa Sena, Bernard Makuza yavuze ko ashyigikiye bitewe n’uburemere bw’ingengabitekerezo ya Jenoside muri iki gihe. Ati “Aho bigikenewe ko amategeko yuzuzwa ngo byumvikane neza, nta kizabuza ko bikorwa.”

Bernad Makuza yasabye inzego za leta, abikorera n’amadini gutahiriza umugozi umwe zishaka ineza y’abaturage aho kwishyira hamwe bagambiriye kubarimbura nk’uko byabayeho mu mateka by’umwihariko i Nyange.

Muri uyu muhango hashyinguwe mu cyubahiro imibiri 242 y’abazize Jenoside yari itaraboneka kuva Jenoside irangiye.

Urwibutso rwa Nyange rushyinguyemo imibiri 7478 yiganjemo abari bahungiye muri Kiliziya ya Paruwasi ya Nyange, Padiri Athanase Seromba wayiyoboraga agatanga itegeko ryo kubica bayibasenyeyeho.

Padiri Seromba yahanishijwe igifungo cya burundu n’Urukiko mpuzamahanga mpanabyaha rwashyiriweho u Rwanda (TPIR) akaba afungiye muri Benin.

Umuhango wo Kwibuka i Nyange wari witabiriwe n'abayobozi mu nzego zinyuranye
Perezida wa Sena, Bernard Makuza ageza ubutumwa ku bitabiriye uyu muhango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244