Kwamamaza

IBUKA yamaganiye kure ivanjiri ‘rutwitsi’ ya Padiri Nahimana

Yanditswe kuya 23-11-2016 saa 10:49' na IGIHE


Umuryango urengera inyungu z’abaciste ku icumu rya Jenoside yakorewe Abatutsi, Ibuka, wamaganye inyigisho n’ibitekerezo bya politiki ya Padiri Nahimana, uboneraho gusaba ko leta y’u Rwanda yabimuryoza kuko bisubiza inyuma Abanyarwanda.

Padiri Nahimana w’imyaka 45 ukomoka muri Diyoseze ya Cyangugu amaze imyaka isaga 10 mu Bufaransa, benshi bafata politiki akora nk’iy’urwango n’amacakubiri, akarangwa byimazeyo no kunenga imiyoborere y’igihugu ari ko yitsa no ku moko.

Uyu wiyambuye umwamburo w’ubupadiri ndetse na Kiliziya Gatolika mu Rwanda ikitandukanya na we, kuri ubu ari mu nzira agaruka mu gihugu aho yemeza ko aje kwandikisha ishyaka rye ‘Ishema ry’u Rwanda’ akaboneraho no kwiyamamariza kuruyobora mu matora y’umwaka utaha.

Mu kiganiro IGIHE yagiranye na Perezida wa Ibuka, Prof. Jean Pierre Dusingizemungu, yavuze ko Abanyarwanda badakeneye ibitekerezo bya Padiri Nahimana bitwika, bibasubiza inyuma, biganisha ku macakubiri kandi bigaca intege abantu.

Yongeyeho ko uwo ariwe wese wajya mu murongo nk’uwa Padiri Nahimana akwiye kubibazwa kuko mu Rwanda hari amategeko asobanutse ahana ibitekerezo nka biriya.

Yagize ati “Ibuka ibona ko ibitekerezo bya Padiri Thomas Nahimana ari ibitekerezo biganisha bikanakangurira Abanyarwanda gucikamo ibice, tuzi ko bene ibyo bitekerezo aho byageze aribyo byaganishije kuri Jenoside yakorewe Abatutsi, igihugu gikwiye kurinda abaturage bacyo ibitekerezo nk’ibyo kandi bitambutswa n’umuntu wabaye umupadiri ushobora kumvwa n’abantu benshi.”

Yakomeje agira ati “Twumva ko ibyo bitekerezo bikwiye kuba bihanwa kuko hari amategeko mu Rwanda abihana ku buryo bwumvikana, bityo akaba akwiye gukoreshwa.”

Prof. Dusingizemungu agaruka ku rugero rwiza rwatanzwe na Kiliziya ubwo yitandukanyaga na Padiri Nahimana ku bitekerezo bye bidafite aho bihuriye n’umurimo w’ubupadiri agomba gukora.

Kiliziya Gatolika ivuga ko ishyaka Padiri Nahimana yashinze ritunga Abanyarwanda. Yemeza kandi ko umupadiri washinze ishyaka aba yikuye muri Kiliziya, keretse iyo yabyumvikanyeho n’umwepiskopi we bagasanga bifitiye inyungu rubanda rwose.

Padiri Thomas Nahimana watangije urubuga rwa internet ‘Le Prophète’ yakunze kujya anyuzaho inyandiko zitavugwaho rumwe ku Rwanda, zaba izipfobya zikanahakana Jenoside yakorewe Abatutsi n’andi magambo yagiye atangaza ku bitangazamakuru mpuzamahanga, avuga ko hakwiye ‘kwibuka bose’.

Perezida wa Ibuka, Prof. Jean Pierre Dusingizemungu, yavuze ko Abanyarwanda badakeneye ibitekerezo bya Padiri Nahimana bitwika, bibasubiza inyuma, biganisha ku macakubiri kandi bigaca intege abantu

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved