Ibura ry’umwunganizi ryasubikishije urubanza rwa Seyoboka ushinjwa ibyaha bya Jenoside

Yanditswe na Kanamugire Emmanuel
Kuya 28 Ugushyingo 2016 saa 12:11
Yasuwe : XX
0

Ibura rya Me Albert Nkundabatware ryatumye Urukiko rw’ibanze rwa gisirikare ruri i Nyamirambo, rusubika iburanisha ry’urubanza rwa Sous-lieutenant Henry Jean Bosco Seyoboka ushinjwa ibyaha bya jenoside, woherejwe na Canada ngo akurikiranwe n’inkiko zo mu Rwanda.

Kuri uyu wa 28 Ugushyingo, ni bwo Urukiko rw’ibanze rwa Gisirikare rwagombaga kuburanisha urubanza ku ifungwa n’ifungurwa ry’agateganyo rya Sous-lieutenant Seyoboka.

Ubwo iburanisha ryatangiraga, inteko y’abacamanza iyobowe na Maj. Muhigirwa Gerard yabanje kubanza Seyoboka umwirondoro we wuzuye, avuga ko yari asanzwe atuye muri Canada mu Mujyi wa Quebec ari na ho yakoreraga ubucuruzi.

Yibukije ko mbere yo kujya muri Canada yari atuye mu Kiyovu, ubu ni muri Rugenge, mu Murenge wa Nyarugenge ho mu Karere ka Nyarugenge, akaba yaragiye mu Gisirikare kuwa 21 Mutarama 1991.

Nyuma yo kuvuga umwirondoro we, Seyoboka yahise abwira Urukiko ko nta kindi aza kuvuga mu gihe adafite umwunganizi.

Umucamanza Maj. Muhigirwa yahise abaza Ubushinjacyaha icyo bubivugaho, maze Capt. Kagiraneza Kayihura ubuhagarariye muri urwo rubanza, asubiza ko ubwo burenganzira butangwa n’Itegeko Nshinga, bityo akaba akwiye kuburana yunganiwe.

Capt. Kagiraneza yaboneyeho gusaba Urukiko kubaza Seyoboka impamvu umwunganizi we ataje, maze asubiza ko we atabimenya kuko baheruka kuvugana kuwa Gatanu w’icyumweru gishize, kandi bumvikanye ko bahurira ku rukiko bakaburana.

Seyoboka yavuze ko uwo bumvikanye kumwunganira yitwa Me Albert Nkundabatware , atanga nimero ze za telefoni, maze Capt. Kagiraneza uhagarariye Ubushinjacayaha aramuhamagara nk’uko Umucamanza yari abisabye, ariko basanga iyo nimero itari ku murongo.

Nyuma yo kubyunguranaho ibitekerezo n’impande zombi z’ababuranyi, Umucamanza yafashe umwanzuro wo gusubika iburanisha, rikazasubukurwa kuwa 1 Ukuboza 2016.

Seyoboka aregwa icyaha cya Jenoside, ubwicanyi nk’icyaha cya jenoside, kurimbura imbaga nk’icyaha cyibasiye inyokomuntu, bikekwa ko yakoreye mu Kiyovu n’ahandi hatandukanye yayoboraga ibitero akanagenzura za bariyeri.

Seyoboka ashinjwa no kuba yarakoze inama zateguraga zikanashishikariza abantu gukora Jenoside, izwi cyane ni iyabaye kuwa 21 Mata 1994 yateguye igitero cyagiye kwica Abatutsi bari bahungiye ahitwa kuri CELA ‘Centre d’Etudes des Langues Africaines’, aho bukeye bwaho abarenga 72 bishwe.

Sous-lieutenant Seyoboka yatangiye gukurikiranwa mu 1998 nyuma yo gutangwaho ubuhamya mu rukiko mpuzamahanga mpanabyaha (ICTR). Mu 2002 ni bwo ICTR yamumenyesheje ko hari umutangabuhamya wamushinje ko yishe umuturanyi we w’umugore n’abana be babiri muri Jenoside, nyuma y’uko yanze ko basambanira kuri bariyeri.

Uwo mugabo w’imyaka 50 yari amaze imyaka 20 aba muri Canada, aho yageze mu 1996, akaba kandi yaraburanishijwe adahari n’Urukiko Gacaca rwa Nyarugenge, rukamukatira igifungo cy’imyaka 19, gusa iki gihano Ubushinjacayaha bukaba bugomba kubanza gusaba urukiko ko giseswa mbere y’uko aburanishwa mu mizi bundi bushya.

2Lt Henry Jean Bosco Seyoboka ushinjwa ibyaha bya jenoside ari imbere y'urukiko
Ibura ry'umwunganizi mu rubanza rwa Seyoboka ryatumye rusubikwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza